મોક્ષોપાય · અધ્યાય 3.51

હતો રાજા હતો રાજા પ્રતિરાજેન સંયુગે ।
ઇતિ શબ્દે સમુદ્ભૂતે રાષ્ટ્રમ્ આસીદ્ ભયાકુલમ્ ॥

ભાણ્ડોપસ્કરભારાઢ્યવિદ્રવત્સકલપ્રજમ્ ।
સાક્રન્દાર્તકલત્રાઢ્યદ્રવન્નાગરં દુર્ગમમ્ ॥

પલાયમાનસાક્રન્દમાર્ગાહૃતવધૂગણમ્ ।
અન્યોઽન્યલુણ્ઠનવ્યગ્રલોકલગ્નમહાહવમ્ ॥

પરરાષ્ટ્રજનાનીકતાણ્ડવોલ્લાસનારવમ્ ।
નિરધિષ્ઠિતમાતઙ્ગહયચારપતજ્જનમ્ ॥

કવાટપાટનોડ્ડીનકોશોત્થારવઘર્ઘરમ્ ।
લુણ્ઠિતાસઙ્ખ્યકૌશેયપ્રાવૃતારિભટોદ્ભટમ્ ॥

ક્ષુરિકોત્પાટિતાર્દ્રાન્ત્રમૃતરાજગૃહાઙ્ગનમ્ ।
રાજાન્તઃપુરવિશ્રાન્તચણ્ડાલશ્વપચોત્કરમ્ ॥

ગૃહાપહૃતભોજ્યાન્નભોજનોન્મુખપામરમ્ ।
સહેમભારચૌરૌઘપાદાહતરુદચ્છિશુ ॥

અપૂર્વતરુણાક્રાન્તકેશાન્તઃપુરિકાઙ્ગનમ્ ।
ચૌરહસ્તચ્યુતાનર્ઘરત્નદન્તુરમાર્ગદિક્ ॥

હયેભરથસઙ્ઘટ્ટવ્યગ્રસામન્તમણ્ડલમ્ ।
અભિષેકોદ્યમાદેશપરમન્ત્રિપુરસ્સરમ્ ॥

રાજધાનીવિનિર્માણસાનુસ્થસ્થપતીશ્વરમ્ ।
કૂપવાતાયનશ્વભ્રનિપતદ્રાજવલ્લભમ્ ॥

જયશબ્દશતોદ્ઘોષસિન્ધુરાજન્યનિર્ભરમ્ ।
અસઙ્ખ્યનિજરાજૌઘવૃતસિન્ધુકૃતસ્થિતિમ્ ॥

ગ્રામાન્તરસમાક્રાન્તવિદ્રવદ્રાજવલ્લભમ્ ।
મણ્ડલાન્તરસઞ્જાતનગરગ્રામલુણ્ઠનમ્ ॥

અનન્તચૌર્યમૌખર્યરુદ્ધમાર્ગગમાગમમ્ ।
મહાનુભાવવૈધુર્યસનીહારદિનાતપમ્ ॥

મૃતબન્ધુજનાક્રન્દૈર્ શ્રુતતૂર્યરવૈર્ અપિ ।
હયેભરથશબ્દૈશ્ ચ પિણ્ડગ્રાહ્યઘનધ્વનિ ॥

સિન્ધુદેવો જયત્ય્ એકચ્છત્ત્રભૂમણ્ડલાધિપઃ ।
ઇત્ય્ અનન્તરમ્ આરેમુર્ ભેર્યઃ પ્રતિપુરં તદા ॥

રાજધાનીં વિવેશાથ સિન્ધુર્ ઉદ્ધતકન્ધરઃ ।
પ્રજાસ્ સ્રષ્ટું યુગસ્યાન્તે મનુર્ જગદ્ ઇવાપરઃ ॥

પ્રવૃત્તા દશદિગ્ભ્યો ઽથ પ્રવેષ્ટું સૈન્ધવં પુરમ્ ।
નરાઃ કરિહયાગારૈ રત્નપૂરા ઇવામ્ભુધિમ્ ॥

નિબન્ધનાનિ ચિહ્નાનિ શાસનાનિ દિશાં પ્રતિ ।
ક્ષણં નિવેશયામ્ આસુર્ મણ્ડલં પ્રતિ મન્ત્રિણઃ ॥

ઉદભૂદ્ અચિરેણૈવ દેશે દેશે પુરે પુરે ।
જીવિતે મરણે માને નિયમો યમતો યથા ॥

અથ શેમુર્ નિમેષેણ દેશોપપ્લવવિભ્રમાઃ ।
પ્રશાન્તોત્પાતપવનાઃ પદાર્થાવૃત્તયો યથા ॥

સૌમ્યતામ્ આજગામાશુ દેશો દશદિગન્વિતઃ ।
ક્ષીરોદઃ ક્ષુભિતાવર્તો દ્રાગ્ ઇવોદ્વૃત્તમન્દરઃ ॥

વવુર્ અલકચયાન્ વિલોલયન્તો મુખકમલાલિમુખાનિ સૈન્ધવીનામ્ ।
જલલવવલનાકુલાસ્ સમીરા અશિવગુણા ઇવ સર્વતઃ ક્ષણેન ॥