મોક્ષોપાય · અધ્યાય 3.49

વવુર્ વલિતનીહારા વિકીર્ણઘનપલ્લવાઃ ।
વાયવો ધૂતવૃક્ષૌઘાઃ પતનોત્પાટનોદ્ભટાઃ ॥

વિકુટ્ટિતાટવીષણ્ડાશ્ શ્વભ્રભિત્તિવિભેદિનઃ ।
તેનાતિભીમવાતેન વિદૂરથરથો ઽપ્ય્ અથ ॥

ઉહ્યમાનો ઽભવન્ નદ્યા યથા જર્જરપલ્લવઃ ।
વિદૂરથો ઽથ તત્યાજ પર્વતાસ્ત્રં મહાસ્ત્રવિત્ ॥

વ્યોમાપિ ઘનતાં યેન સમાધાતુમ્ ઇવોદ્યતમ્ ।
તેન શૈલાસ્ત્રઘાતેન વિરરામ સમીરણઃ ॥

શમં ચ તેન શાન્તેન પ્રયયૌ વાયુના યતઃ ।
અન્તરિક્ષગતા વૃક્ષપઙ્ક્તયઃ પતિતા ભુવિ ॥

નાનાજનાશનવ્યૂહે કાકાનામ્ ઇવ કોટયઃ ।
શેમુશ્ શીત્કારડક્કારભાક્કારોક્કારકા દિશામ્ ॥

પ્રલાપા ઇવ વિધ્વસ્તપ્રથાઃ પવનવીરુધામ્ ।
ગિરીન્ અપશ્યન્ નભસઃ પતતઃ પર્ણપત્ત્રવત્ ॥

સિન્ધુસ્ સિન્ધુર્ ઇવોત્પન્નાન્ મૈનાકાદીન્ ઇતસ્ તતઃ ।
વજ્રાસ્ત્રમ્ અસૃજદ્ દીપ્તં તેરુર્ વજ્રઘનાસ્ તતઃ ॥

પિબન્તો ઽદ્રીન્ પ્રતિગિરં વહ્નિદાહાદ્ ઇવાગ્નયઃ ।
તે ગિરીણાં પુરીણાં ચ કોટિતુણ્ડાવખણ્ડનૈઃ ॥

શિરાંસિ શાતયામ્ આસુઃ ફલાનીવોલ્બનાનિલાઃ ।
વિદૂરથો ઽથ વજ્રાસ્ત્રશાન્ત્યૈ બ્રહ્માસ્ત્રમ્ અભ્યદાત્ ॥

તતો બ્રહ્માસ્ત્રવજ્રાસ્ત્રે સમં પ્રશમમ્ આગતે ।
શ્યામાશ્યામં પિશાચાસ્ત્રમ્ અથ સિન્ધુર્ અચોદયત્ ॥

તેનોદગુઃ પિશાચાનાં પઙ્ક્તયો ઽનન્તભીતિદાઃ ।
સન્ધ્યાયામ્ ઇવ ભીત્યેવ દિવસશ્ શ્યામતાં યયૌ ॥

પિશાચા ભુવનં જહ્રુર્ અન્ધકારભરા ઇવ ।
ભાસ્મનસ્તમ્ભસદૃશાસ્ તાલોત્તાલવિલાસિનઃ ॥

દૃશ્યમાનમહાકારા મુષ્ટિગ્રાહ્યા નકિઞ્ચન ।
ઊર્ધ્વકેશાઃ કૃશાઙ્ગાશ્ ચ કેચિચ્ ચ શ્મશ્રુલા અપિ ॥

કૃશાઙ્ગા મલિનાઙ્ગાશ્ ચ ગ્રામ્યા ઇવ નભશ્ચરાઃ ।
સભાયાં મૂઢદૃષ્ટાશ્ ચ યત્કિઞ્ચનકરાઃ ખલાઃ ॥

દીના બહ્વાશિનઃ ક્રૂરા દીના ગ્રામ્યજના ઇવ ।
તરુકર્દમરથ્યાન્તશ્શૂન્યગેહગૃહાશ્ ચલાઃ ॥

લેલિહાનાઃ પ્રેતરૂપાઃ કૃષ્ણાઙ્ગાશ્ શ્વપચા ઇવ ।
જગૃહુસ્ તે તદા મત્તા હતશિષ્ટમ્ અરેર્ બલમ્ ॥

આસન્નસૈનિકાસ્ તત્ર વિત્રસ્તક્ષુબ્ધચેતનાઃ ।
ત્યક્તાયુધતનુત્રાણાસ્ ત્રસ્તપ્રાણાસ્ સ્ખલદ્ગમાઃ ॥

નેત્રૈર્ અઙ્ગૈર્ મુખૈઃ પાદૈર્ વિકારભયકારિણઃ ।
ત્યક્તકૌપીનવસના નિર્નગ્ના હસનોત્તરાઃ ॥

વિષ્ઠાં મૂત્રં ચ કુર્વન્તસ્ સ્થિરમ્ આરબ્ધનર્તનાઃ ।
પિશાચરાજો રાજાનમ્ અથ યાવદ્વિદૂરથમ્ ॥

સમાક્રામતિ તાવત્ સ માયાં તાં બુબુધે બુધઃ ।
પિશાચસઙ્ગ્રામકરીં માયાં વેત્તિ સ ભૂમિપઃ ॥

તયા પિશાચસૈન્યં તત્ પરસૈન્યે ન્યયોજયત્ ।
તતસ્ સ્વસૈનિકાસ્ સ્વસ્થાઃ પરયોધાઃ પિશાચિનઃ ॥

તસ્યાથ રૂપિકાસ્ત્રં તદ્ દદૌ ચાન્યદ્ અસૌ રુષા ।
ઉદગુર્ ભૂતલાદ્ વ્યોમ્નો રૂપિકાસ્ સ્તબ્ધમૂર્ધજાઃ ॥

નિર્નગ્ના વિકરાલાક્ષ્યો લમ્બશ્રોણિપયોધરાઃ ।
ઉદ્ભિન્નયૌવના વૃદ્ધાઃ પીવરાઙ્ગ્યો ઽથ જર્જરાઃ ॥

સ્વરૂપારૂપજઘના દુર્નાટ્યવિકસદ્ભગાઃ ।
નરપદ્મશિરોહસ્તા રુધિરારુણગાત્રકાઃ ॥

અર્ધચર્વિતમાંસાસૃક્સ્રવત્સૃક્વાક્તલાલનાઃ ।
નાનાનાનાઙ્ગવલનાનનોન્નમનસન્નમાઃ ॥

સિરાલભુજવક્ત્રોરુકુચપાર્શ્વકરાઙ્ગિકાઃ ।
તાડીકૃતાર્ભકશવાદ્ અનુકૃષ્ટાન્ત્રરજ્જવઃ ॥

શ્વકાકોલૂકવદના નિમ્નવક્ત્રહનૂદરાઃ ।
જગૃહુસ્ તાઃ પિશાચાંસ્ તાન્ દુર્બલાન્ દુશ્શિશૂન્ ઇવ ॥

પિશાચરૂપિકાસૈન્યં તદાસીદ્ એકતાં ગતમ્ ।
નિર્નગ્નં નર્તનોત્તાનવદનાઙ્ગવિલોચનમ્ ॥

પરસ્પરાક્રાન્તિકરં ભીષયંશ્ ચ પરસ્પરમ્ ।
નિષ્કાસિતમહાજિહ્વં નાનામુખવિકારદમ્ ॥

શવભારાઢ્યમ્ અન્યોઽન્યં હ્રિયમાણશવાઙ્ગકમ્ ।
રુધિરામ્ભસિ મજ્જત્ તદુન્મજ્જચ્ ચ લસત્તનુ ॥

લમ્બોદરં લમ્બભુજં લમ્બકર્ણોષ્ઠનાસિકમ્ ।
રક્તમાંસવસાપઙ્કેષ્વ્ અન્યોઽન્યં વેલ્લનાત્મ તત્ ॥

મન્દરોદ્ધૂતદુગ્ધાબ્ધિલસત્કલકલાકુલમ્ ।
યથૈવ માયાસઞ્ચારસ્ તેન તસ્ય કૃતઃ પુનઃ ॥

તેનાપિ તસ્યાશુ તથા કૃતો બુદ્ધ્વાશુ લાઘવમ્ ।
વેતાલાસ્ત્રં તતો દત્તં તેનોત્તસ્થુશ્ શવવ્રજાઃ ॥

અમૂર્ધાનસ્ સમૂર્ધાનો વેતાલાવેશવલ્ગિતાઃ ।
તતઃ પિશાચવેતાલરૂપિકૌઘકબન્ધવત્ ॥

ઉદ્બભૂવ બલં ભીમમ્ ઊર્વીનિગરણક્ષમમ્ ।
અથેતરો ઽપિ ભૂપાલો માયાં સઞ્ચાર્ય ચાપરામ્ ॥

રાક્ષસાસ્ત્રં સસર્જાશુ ત્રૈલોક્યાક્રમણોન્મુખમ્ ।
ઉદગુઃ પર્વતાકારાસ્ સર્વતસ્ સ્થૂલરાક્ષસાઃ ॥

દેહમ્ આશ્રિત્ય નિષ્ક્રાન્તાઃ પાતાલાન્ નરકા ઇવ ।
અથાભૂત્ તદ્ બલં ભીમં સસુરાસુરભીતિદમ્ ॥

ગર્જદ્રક્ષોમહામ્ભોદવાદ્યનૃત્યત્કબન્ધકમ્ ।
રૂપિકાદારિકારૂપં પિશાચસ્થાનસુસ્થિતિ ॥

આત્તક્વણિતવંશાઢ્યં શિરઃ પદ્મોત્કરાકુલમ્ ।
લોલાન્ત્રમાલાવલિતં રુધિરામ્બુસમુક્ષિતમ્ ॥

વેતાલતાલસોલ્લાસં લસદ્ધામ પિશાચકમ્ ।
મેદોમાંસવસાદ્યાઢ્યં રુધિરાસવસુન્દરમ્ ।
ક્ષીબવેતાલકુમ્ભાણ્ડયક્ષતાણ્ડવસઙ્કટમ્ ॥

કુમ્ભાણ્ડકોત્તાણ્ડવદણ્ડપાદક્ષુબ્ધાસૃગુત્ક્ષિપ્તતરઙ્ગસિક્તૈઃ ।
સન્ધ્યાભ્રધારોત્કરકોટિકાન્તૈર્ ભૂતૈર્ અસૃક્સ્રોતસિ દત્તસેતુ ॥