મોક્ષોપાય · અધ્યાય 3.47

એતસ્મિન્ વર્તમાને તુ ઘોરે સમરસમ્ભ્રમે ।
લીલાદ્વયમ્ ઉવાચેદં જ્ઞપ્તિં ભગવતીં પુરઃ ॥

દેવિ કસ્માદ્ અકસ્માન્ નો ભર્તા જયતિ નો રણે ।
વદ ત્વય્ય્ અપિ તુષ્ટાયામ્ અસ્મિન્ વિદ્રુતવારણે ॥

ચિરમ્ આરાધિતાનેન વિદૂરથનૃપારિણા ।
અહં પ્રતિજયાર્થેન ન વિદૂરથભૂભુજા ॥

તેનાસાવ્ એવ જયતિ જીયતે ન વિદૂરથઃ ।
જ્ઞપ્તિર્ અન્તર્ગતા સંવિદ્ એષાસૌ યદ્ યથા યદા ॥

ચોદયત્ય્ આશુ તત્ તસ્ય તદા સમ્પાદયામ્ય્ અહમ્ ।
યો યથા ચોદયતિ માં તસ્ય તિષ્ઠામિ તત્ફલા ॥

ન સ્વભાવોદ્યતં ધત્તે વહ્નેર્ ઔષ્ણ્યમ્ ઇવૈષ મે ।
જયસ્ સ્યાન્ મમ સંગ્રામ ઇત્ય્ અનેનાસ્મિ પૂજિતા ॥

પ્રતિમારૂપિણી તેન ફલમ્ આપ્નોત્ય્ અસૌ તથા ।
વિદૂરથેનૈતમ્ અર્થં અસઞ્ચિન્ત્યાસ્મિ બોધિતા ॥

અનેન ચૈવ મુક્તસ્ સ્યામ્ અહમ્ ઇત્ય્ અસ્મિ ભાવિતા ।
તસ્માદ્ વિદૂરથો દેહં તં પ્રાપ્ય સહ ભાર્યયા ॥

ત્વયાનયા ચ કાલેન બાલે મુક્તો ભવિષ્યતિ ।
એતદીયસ્ ત્વ્ અયં શત્રુસ્ સિન્ધુનામ મહીપતિઃ ।
હત્વૈનં વસુધાપીઠે જયી રાજ્યં કરિષ્યતિ ॥

એવં દેવ્યાં વદન્ત્યાં તુ બલયોર્ યુધ્યમાનયોઃ ।
રવિર્ દ્રષ્ટુમ્ ઇવાશ્ચર્યમ્ આજગામોદયાચલમ્ ॥

ચેલુસ્ તિમિરસંઘાતા બલાનીવાલિરૂપિણઃ ।
અસૃજીવ શવાન્ય્ આસન્ સન્ધ્યાયાં તારકા દિવિ ॥

શનૈર્ વિકટતાં જગ્મૂ રણાકાશાદ્રિભૂમયઃ ।
ભુવનં કજ્જલામ્ભોધેર્ ઇવોત્ક્ષિપ્તમ્ અરાજત ॥

પેતુઃ કનકનિષ્ષ્યન્દસુન્દરા રવિરશ્મયઃ ।
શૈલેષુ વરવીરેષુ રણરક્તચ્છટા ઇવ ॥

અદૃશ્યત તતો વ્યોમ તથા રણમહીતલમ્ ।
બાહુભિર્ ભ્રાન્તભુજગં પ્રભાભિઃ કીર્ણકાઞ્ચનમ્ ॥

કુણ્ડલૈઃ કીર્ણરત્નૌઘં શિરોભિર્ વૃદ્ધપઙ્કજમ્ ।
આયુધૈઃ ખગનીરન્ધ્રં શરૈશ્ શરભનિર્ભરમ્ ॥

રક્તાભાસ્થિરસન્ધ્યાઢ્યં સસિદ્ધપુરુષં શવૈઃ ।
હારૈસ્ સસર્પનિર્મોકં પટૈર્ એવાંશુસઙ્કુલમ્ ॥

લસલ્લતાપતાકાભિર્ ઊરુભિઃ કૃતતોરણમ્ ।
હસ્તપાદૈઃ પલ્લવિતં શરૈશ્ શરવનોપમમ્ ॥

શસ્ત્રાંશુશાદ્વલશ્યામં શસ્ત્રતાર્ણૈસ્ સસૈકતમ્ ।
કીર્ણમ્ આયુધમાલાભિર્ ઉન્મત્તમ્ ઇવ ભૈરવમ્ ॥

ફુલ્લાશોકવનાકારં શસ્ત્રસંઘટ્ટવહ્નિભિઃ ।
ઉદ્ઘુઙ્ઘુમં મહાશબ્દૈર્ વિદ્રવત્સિદ્ધનાયકમ્ ॥

સૌવર્ણરચિતાકારં બાલાર્કકચિતાયુધૈઃ ।
પ્રાસાસિચક્રશક્ત્યૃષ્ટિમુદ્ગરારણિતાન્તરમ્ ॥

એતસ્મિન્ન્ અન્તરે સેનાસ્ સર્વાસ્ સઙ્ક્ષયમ્ આયયુઃ ।
આસીદ્ રણાઙ્ગનં શૂન્યમ્ ઇવાલ્પોભયસૈનિકમ્ ॥

છિન્નભિન્નમૃતધ્વસ્તયાતવિદ્રુતમાનવમ્ ।
પતચ્છવમહારાશિપઙ્કસ્રવદસૃક્સરિત્ ॥

વહદ્રક્તનદીરંહઃપ્રોહ્યમાનશવોત્કરમ્ ।
ભુસુણ્ડીશક્તિકુન્તાસિસ્થૂલપાષાણસઙ્કુલમ્ ॥

શૂરશસ્ત્રાહતિચ્છિન્નકબન્ધપતનાન્વિતમ્ ।
તાલતાણ્ડવિવેતાલકુલારબ્ધકલારવમ્ ॥

શૂન્યે રણાઙ્ગને દીપ્તૌ પદ્મસિન્ધુરથૌ ચલૌ ।
અદૃશ્યેતાં નભશ્ચિહ્નૌ ચન્દ્રસૂર્યૌ દિવીવ તૌ ॥

ચક્રશૂલભુસુણ્ડર્ષ્ટિપ્રાસાયુધસમાકુલૌ ।
સહસ્રેણ સહસ્રેણ વીરાણાં પરિવારિતૌ ॥

વિચરન્તૌ યથાકામં મણ્ડલે વિતતાવનૌ ।
સચીત્કારમહાચક્રપિષ્ટાનેકમૃતામૃતૌ ॥

તરન્તૌ રક્તસરિતો મત્તવારણલીલયા ।
કેશશેવલસઞ્છન્નચક્રરક્તજલાર્દ્રકૌ ॥

વહચ્ચક્રાહતિક્ષોભપાતિતાકુલવારણૌ ।
મણિમુક્તાઝણત્કારરણત્કૂવરકોટરૌ ॥

વાતાહતપતાકાગ્રપટત્પટપટારવૌ ।
અનુયાતૌ મહાવીરૈર્ ભૂરિભિર્ ભીતસૈનિકૈઃ ॥

ભારાન્ દધદ્ભિઃ કુન્તાનાં શરાણાં ધનુષામ્ અપિ ।
શક્તીનાં પ્રાસશઙ્કૂનાં ચક્રાણાં કચતાં રુચા ॥

તત્ર તૌ ક્ષણમ્ આવૃત્ય મણ્ડલૈર્ ભૂરિમણ્ડલૈઃ ।
ઉભૌ વ્યતિબભૂવાતે સંમુખાવ્ આયુધામ્બુદૌ ॥

નારાચધારાનિકરવિક્ષેપકરકાઘનૌ ।
અન્યોઽન્યમ્ અભિગર્જન્તૌ મત્તાબ્ધિજલદાવ્ ઇવ ॥

તયોઃ પ્રહરતોર્ બાણાન્ વસુધા નરસિંહયોઃ ।
પાષાણમુસુલાકારા વ્યોમવિસ્તારિણો ઽભવન્ ॥

કરવાલફલાઃ કેચિન્ મુદ્ગરાનનકાઃ પરે ।
શિતચક્રમુખાઃ કેચિત્ કેચિત્ પરશુવક્ત્રકાઃ ॥

કેચિચ્ છક્તિમુખા બાણાઃ કેચિત્ ક્ષુરમુખા અપિ ।
કેચિત્ કુન્તોગ્રફલકા અર્ધચન્દ્રમુખાસ્ તથા ॥

સિંહોપલમુખાઃ કેચિત્ કેચિચ્ છૂલશિખામુખાઃ ।
ત્રિશૂલવદનાઃ કેચિત્ સ્થૂલા ઇવ મહાશિલાઃ ॥

પ્રલયપવનપાતિતાઃ શિલૌઘા ઇવ વિચરન્તિ શિલીમુખાસ્ તદા સ્મ ।
પ્રમિલિતમ્ અભવત્ તયોસ્ તદાનીં પ્રલયવિજૃમ્ભિતસિન્ધુસંભ્રમેણ ॥