મોક્ષોપાય · અધ્યાય 3.39

અથ વીર ઇવારક્તઃ કાલેનાસ્તમિતો રવિઃ ।
શશ્વત્તેજઃપરિમ્લાનપ્રતાપો ઽબ્ધૌ સમુજ્ઝિતઃ ॥

રણરક્તરુચિવ્યોમદર્પણપ્રતિબિમ્બિતા ।
અહ્નસ્ સૂર્યશિરશ્છેદે સન્ધ્યાલેખોદભૂત્ ક્ષણાત્ ॥

ભૂપાતાલનભોદિગ્ભ્યઃ પ્રલયાબ્ધિજલૌઘવત્ ।
સમાજગ્મુસ્ તમસ્તાલા વેતાલવલયા ઇવ ॥

દૃષ્ટં ધ્વાન્તાસિદલિતે દિનનાગેન્દ્રમસ્તકે ।
સન્ધ્યારાગારુણાકીર્ણં તારાનિકરમૌક્તિકમ્ ॥

નિસ્સત્ત્વેષુ તમોઽન્ધેષુ સરસ્સ્વ્ અરસશાલિષુ ।
સઙ્કોચમ્ આયયુઃ પદ્મા મૃતાનાં હૃદયેષ્વ્ ઇવ ॥

મીલત્પક્ષાઃ ક્ષણાત્ સુપ્તાઃ કચ્છવ્રુડિતકન્ધરાઃ ।
કુલાયેષુ ખગા આસન્ સર્વાઙ્ગેષ્વ્ ઇવ હેતયઃ ॥

આસન્નચન્દ્રસુભગાલોકાઃ કુમુદપઙ્ક્તયઃ ।
ઉલ્લસદ્ધૃદયા જાતા વીરપક્ષેષ્વ્ ઇવ શ્રિયઃ ॥

રક્તવારિમયી સાયસઙ્ગગુપ્તશિલીમુખા ।
સઙ્કુચદ્વક્ત્રપદ્માભૂદ્ રણભૂમિર્ ઇવાબ્જિની ॥

ઉપર્ય્ અભૂદ્ વ્યોમસરસ્ તારાકુમુદમણ્ડિતમ્ ।
અધસ્ ત્વ્ અભૂદ્ વારિવિયત્ સ્ફુરત્કુમુદતારકમ્ ॥

તમાંસ્ય્ અપીતકાર્યાણિ ભૂતાનિ ચાખિલાન્ય્ અલમ્ ।
પયાંસીવ વિસેરૂનિ પ્રસૃતાનિ દિશં પ્રતિ ॥

આસીદ્ રણાઙ્ગનં ગાયદ્વેતાલકુલસઙ્કુલમ્ ।
ક્વણત્કઙ્કાલકણ્ઠસ્થકઙ્કકાકોલકેલિમત્ ॥

રથકાષ્ટચિતિજ્વાલાસતારામ્બરભાસુરમ્ ।
પચત્પચપચાશબ્દમેદોમાંસમયાનલમ્ ॥

શવાઙ્ગાસ્થિસ્ફુટાસ્ફોટલુઠચ્ચિતિચયોલ્મુકમ્ ।
વેતાલલલનારબ્ધજલલીલાતિરોહિતમ્ ॥

શ્વકાકયક્ષવેતાલતાલકોલાહલોલ્બણમ્ ।
સમાગમેન ભૂતાનાં સમુડ્ડીનવનોપમમ્ ॥

રક્તમાંસવસામેદોહરણવ્યગ્રડાકિનમ્ ।
ચર્વિતાસૃગ્વસામાંસસ્રવત્સૃક્વિપિશાચકમ્ ॥

સભ્યમધ્યચિતાલોકપ્રકટાસૃક્શવવ્રજમ્ ।
ખરૂપિકાનીયમાનાશ્વસન્ન્યસ્તમહાશવમ્ ॥

ઉત્તાણ્ડવોગ્રકુમ્ભાણ્ડમણ્ડલોડ્ડામરોદરમ્ ।
છમચ્છમિવિલાપાન્તં મેદોઽસૃગ્બાષ્પસામ્બુદમ્ ॥

વહદ્રક્તનદીરંહોરૂઢભૂચરરૂપિકમ્ ।
વેતાલાકુલકઙ્કાલકર્ષણાકુલકાકકમ્ ॥

મૃતેભોદરમઞ્જૂષાસુપ્તવેતાલબાલકમ્ ।
વિવિક્તૈકતરૂદ્દેશપાનક્રીડાસ્થરાક્ષસમ્ ॥

મત્તવેતાલકલહે ચિતાલાતરણોજ્જ્વલમ્ ।
વહદ્રક્તવસામિશ્રગન્ધબન્ધુરમારુતમ્ ॥

રૂપિકાપેટકે વેગરણદ્રુટરુટારવમ્ ।
અર્ધપક્વશવાસ્વાદલુબ્ધયક્ષોલ્લસત્કિલિ ॥

તુઙ્ગવઙ્ગકલિઙ્ગાઙ્ગતઙ્ગનાઙ્ગલગત્ખગમ્ ।
તારાપાતોપમભવત્સંમુખજ્વાલરૂપિકમ્ ॥

પતદ્વેતાલસોલ્લાસમધ્યસ્થાસૃક્સુરૂપિકમ્ ।
પિશાચાકર્ણિતાભ્યર્ણયોગિનીગણગાયનમ્ ॥

પ્રસૃતાન્ત્રમહાતન્ત્રીપ્રાયસમ્પન્નવાદનમ્ ।
પિશાચવાસનોત્ક્રાન્તપિશાચીભૂતમાનવમ્ ॥

રૂપિકાલોકનાપૂર્વત્રાસાર્ધમૃતસદ્ભટમ્ ।
ક્વચિદ્વેતાલરક્ષોભિર્ અહનીવોન્નમદ્રણમ્ ॥

ખરૂપિકાસ્કન્ધપતચ્છવત્રસ્તનિશાચરમ્ ।
નભસ્સઙ્ઘટિતાપૂર્વભૂતપેટકસઙ્કટમ્ ॥

અતિપ્રયત્નાપહૃતમ્રિયમાણનરાધિપમ્ ।
સુભક્ષાપેક્ષિયક્ષેક્ષાવિક્ષિપ્તશવરાશિમત્ ॥

શિવામુખાનલશિખાખણ્ડૈશ્ છમિતનક્તગૈઃ ।
સમુડ્ડીનનવાશોકપુષ્પગુચ્છમ્ ઇવાભિતઃ ॥

કબન્ધકન્ધરાબદ્ધવ્યગ્રવેતાલબાલકમ્ ।
યક્ષરક્ષઃપિશાચાજિકચદાકાશગોલ્મુકમ્ ॥

આકાશભૂધરનિકુઞ્જગુહાન્તરાલ પિણ્ડોપમસ્થિતતમોઽમ્બુદપીઠપૂરમ્ ।
વ્યાલોલભૂતરભસાકુલકલ્પવાત વ્યાધૂતલોકકરકાણ્ડકવાટકલ્પમ્ ॥