મોક્ષોપાય · અધ્યાય 3.35
અથ પ્રોડ્ડયનોદ્યુક્તતુરઙ્ગમતરઙ્ગકઃ ।
ઉત્તાણ્ડવ ઇવામત્તો બભૂવ સ રણાર્ણવઃ ॥
છત્ત્રદિણ્ડીરવિશ્રાન્તશિતેષુશફરોત્કરઃ ।
અશ્વેભસૈન્યોલ્લલનકલ્લોલાકુલકોટરઃ ॥
નાનાયુધનદીનીતસૈન્યાવર્તવિવૃત્તિમાન્ ।
મત્તહસ્તિઘટાપીઠચલાચલકુલાકુલઃ ॥
કચચ્ચક્રશતાવર્તવૃત્તિભ્રાન્તશિરસ્તૃણઃ ।
ધૂલીજલધરાપીતભ્રમત્ખડ્ગપ્રભાજલઃ ॥
મકરવ્યૂહવિસ્તારભગ્નાભગ્નભટોગ્રનૌઃ ।
મહાગુડુગુડાવર્તપ્રતિશ્રુદ્ઘનકન્દરઃ ॥
મીનવ્યૂહવિનિષ્ક્રાન્તશરબીજૌઘસર્ષપઃ ।
હેતિવીચિઘટાલૂનપતાકાવીચિમણ્ડલઃ ॥
શસ્ત્રવારિક્ષતામ્ભોદસદૃશાવર્તકુણ્ડલઃ ।
સંરમ્ભઘનસઞ્ચારઘટાતિમિતિમિઙ્ગિલઃ ॥
કૃષ્ણાયસપરીધાનચલત્સેનામ્બુભીષણઃ ।
કબન્ધાવર્તલેખાન્તર્બદ્ધસૈન્યાદ્રિભીષણઃ ॥
શરશીકરનીહારસાન્ધકારકકુબ્ગણઃ ।
નિર્ઘોષાશેષિતાશેષશબ્દૈકઘનઘુઙ્ઘુમઃ ॥
પતનોત્પતનવ્યગ્રશિરશ્શકલશીકરઃ ।
આવર્તચક્રવ્યૂહાન્તઃપ્રભ્રમદ્ભટકાષ્ટકઃ ॥
કષ્ટટાઙ્કારકોદણ્ડકુણ્ડલોર્મિઘટોદ્ભટઃ ।
અશઙ્કમ્ એવ પાતાલાદ્ ઇવોદ્યત્સૈનિકોર્મિમાન્ ॥
ગમાગમપરાનન્તપતાકાચ્છત્રફેનિલઃ ।
વહદ્રક્તનદીરંહઃપ્રોહ્યમાનરથદ્રુમઃ ॥
ગજપ્રતિમસમ્પન્નમહારુધિરબુદ્બુદઃ ।
સૈન્યપ્રવાહવિવલદ્ધયહસ્તિજલેચરઃ ॥
સ સઙ્ગ્રામો ઽમ્બરગ્રામ ઇવાશ્ચર્યકરો નૃણામ્ ।
અભૂત્ પ્રલયભૂકમ્પકમ્પિતાચલચઞ્ચલઃ ॥
તરત્તુરઙ્ગવિહગઃ પતત્કરિઘટાતટઃ ।
ભ્રમદ્ભીરુમૃગાનીકસ્ સ્ફૂર્જદ્ઘુરઘુરારવઃ ॥
સરચ્છરાલીશરભશ્ શરભઙ્ગુરસૈન્યભૂઃ ।
તરત્તુરઙ્ગશરભશ્ શરભારવહાવનિઃ ॥
વલદ્વીરેભનિર્હ્રાદો રસતૂર્યગુહાગૃહઃ ।
વિસરત્સૈન્યજલદો લુઠદ્ભટમૃગાધિપઃ ॥
પ્રસરદ્ધૂલિજલદો વિગલત્સૈન્યસાનુમાન્ ।
પતદ્રથવરાઢ્યઙ્ગઃ પ્રપતત્ખડ્ગમણ્ડલઃ ॥
પ્રોત્પતત્પટ્ટપુષ્પાઢ્યઃ પતાકાછત્રવારિદઃ ।
વહદ્રક્તનદીપૂરઃ પતત્સારાવવારણઃ ॥
સો ઽભૂત્ સમરકલ્પાન્તો જગત્કવલનાકુલઃ ।
પર્યસ્તસધ્વજચ્છત્રપતાકારથપત્તનઃ ॥
પતદ્વિમલહેત્યોઘભૂરિભાસ્કરભાસ્વરઃ ।
કઠિનપ્રાણિસન્તાપતાપિતાખિલમાનવઃ ॥
કોદણ્ડપુષ્કરાવર્તશરધારાનિરન્તરઃ ।
વહત્ખડ્ગશિલાલેખાવિદ્યુદ્વલયિતામ્બરઃ ॥
ઉચ્છૂનરક્તજલધિપતિતેભકુલાચલઃ ।
નભોવિકીર્ણનિપતદ્યન્ત્રાશ્મગણતારકઃ ॥
ચક્રકલ્પામ્બુદાવર્તપૂર્ણવ્યોમશરામ્બુદઃ ।
અસ્ત્રકલ્પાગ્નિનિર્દગ્ધસૈન્યલોકાન્તરાન્તરાઃ ॥
હેતિવર્ષાશનિચ્છિન્નભૂતભૂતલભૂધરઃ ।
ગજરાજગિરિવ્રાતપાતપિષ્ટજનવ્રજઃ ॥
શરધારાધરાનીકમેઘચ્છન્નમહીનભઃ ।
મહાનીકાર્ણવક્ષોભસઙ્ઘટ્ટકઠિનારવઃ ॥
વ્યાપ્ત ઉગ્રાનિલોદ્ધૂતૈર્ જલવ્યાલાનલાચલૈઃ ।
અન્યોઽન્યદલનવ્યગ્રૈર્ અસ્ત્રોત્પાતફલોત્થિતૈઃ ॥
શૂલાસિચક્રશરશક્તિગદાભુસુણ્ડીપ્રાસાદયો વિદલનેન મિથો ધ્વનન્તઃ ।
દીપ્તા દધુર્ દશદિશં શતશો ભ્રમન્તઃ કલ્પાન્તવાતપરિવૃત્તપદાર્થલીલામ્ ॥
મૂળ પાઠ: Mokṣopāya · Edition: Susanne Krause-Stinner Das erste und zweite Buch: Vairāgyaprakaraṇa; Mumukṣuvyavahāraprakaraṇa Wiesbaden Harrassowitz Walter Slaje Anonymus Casmiriensis: Mokṣopāya. Historisch-kritische Gesamtausgabe 1 Akademie der Wissenschaften und der Literatur, Mainz. Veröffentlichungen der Indologischen Kommission / Veröffentlichungen der Fächergruppenkommission für Außereuropäische Sprachen und Kulturen. Stu · Data entry Walter Slaje Susanne Krause-Stinner Peter Stephan Anett Krause Jürgen Hanneder Stanislav Jager · GRETIL (Göttingen) · CC BY-NC-SA 4.0