મોક્ષોપાય · અધ્યાય 3.34

અથ રાજ્ઞાં યુયુત્સૂનાં ભટાનાં મન્ત્રિણામ્ અપિ ।
રભસપ્રેક્ષકાણાં ચ તત્રેમાઃ પ્રોદગુર્ ગિરઃ ॥

ચલત્પદ્મં સર ઇવ વહદ્વિહગમ્ એવ વા ।
નભશ્ શૂરશિરઃકીર્ણં ભાતિ તારકિતાકૃતિ ॥

પશ્ય રક્તપૃષત્પૂરસિન્દૂરારુણમારુતૈઃ ।
સન્ધ્યા ઇવ વિભાન્ત્ય્ એતે મધ્યાહ્ને ઽમ્બુદભાનવઃ ॥

કિમ્ ઇદં ભગિનિ વ્યોમ પલાલભરિતં સ્થિતમ્ ।
નેદં પલાલં વીરાણામ્ એતે શરભરામ્બુદાઃ ॥

યાવન્તો ભુવિ શામ્યન્તિ રુધિરૈર્ અણુરેણવઃ ।
તાવન્ત્ય્ અબ્દસહસ્રાણિ ભટાનામ્ આસ્પદં દિવિ ॥

મા ભૈષ્ટ નૈતે નિસ્ત્રિંશા નીલોત્પલદલત્વિષઃ ।
અમી વીરાવલોકિન્યા લક્ષ્મ્યા નયનવિભ્રમાઃ ॥

વીરાલિઙ્ગનલોલાનાં નિતમ્બે સુરયોષિતામ્ ।
મેખલાશ્ શિથિલીકર્તું પ્રવૃત્તઃ કુસુમાયુધઃ ॥

લલદ્ભુજલતાલોલરક્તપલ્લવપાણયઃ ।
મઞ્જરીમત્તનયના મધ્વામોદસુગન્ધયઃ ॥

યાચન્ત્યો મધુરાલાપૈર્ નન્દનોદ્યાનદેવતાઃ ।
તવાગમનમ્ આશઙ્ક્ય પ્રવૃત્તાઃ પરિનર્તિતુમ્ ॥

પ્રત્યનીકં ભિનત્ત્ય્ અન્તઃ કુઠારૈઃ કઠિનૈર્ ઇયમ્ ।
સેના ગ્રામ્યેવ વનિતા દયિતં દુષ્ટચેષ્ટિતૈઃ ॥

હા પિતુર્ મમ ભલ્લેન શિરો જ્વલિતકુણ્ડલમ્ ।
સૂર્યસ્ય નિકટં નીતં કાલેનેવાષ્ટમો ગ્રહઃ ॥

આપાદં શૃઙ્ખલાપ્રોતભ્રમત્સ્થૂલોપલદ્વયમ્ ।
ભ્રમયંશ્ ચિત્રદણ્ડાખ્યં ચક્રમ્ ઊર્ધ્વભુજો જવાત્ ॥

યોધો યમ ઇવાયામી યામ્યાદ્ આયાતિ દિક્તટાત્ ।
સર્વતસ્ સંહરન્ સેનામ્ એહિ યામો યથાગતમ્ ॥

સદ્યશ્છિન્નશિરશ્શ્વભ્રમજ્જત્કઙ્કકુલાકુલાઃ ।
કબન્ધાઃ પશ્ય નૃત્યન્તિ તાલોત્તાલા રણાઙ્ગને ॥

ગીર્વાણગણગોષ્ઠીષુ પ્રવૃત્તા સઙ્કથા મિથઃ ।
વદ લોકાન્તરં વીરાઃ કથં યાસ્યન્તિ કે કુતઃ ॥

નિગિરન્ત્ય્ આગતાસ્ સેનાસ્ સ્રવન્તીર્ ઇવ સાગરાઃ ।
સમત્સ્યમકરવ્યૂહા અહો નુ વિષમા ભટાઃ ॥

કટેષુ કરિણાં કીર્ણા ધારાનારાચરાશયઃ ।
પતિતા ઇવ સમ્પૂર્ણાશ્ શૃઙ્ગસઙ્ઘેષુ વૃષ્ટયઃ ॥

હા કુન્તેન શિરો નીતં મમેત્ય્ એવં વિવક્ષતઃ ।
શિર આનીતમ્ ઇત્ય્ એવ ખે ખગેનેવ વાશિતમ્ ॥

યન્ત્રપાષાણવર્ષેણ યેનાસ્માન્ પરિષિઞ્ચતિ ।
સેનાસ્યાં શૃઙ્ખલાજાલવલના ક્રિયતાં બલાત્ ॥

સર્વાન્ સમગ્રતો મૂઢાન્ નયતાર્ધમૃતાન્ નરાન્ ।
નિજાન્ પાદપ્રહારેણ મૈતાન્ મારયતાધમાઃ ॥

ધમ્મિલ્લવલનાવ્યગ્રે ઘનોત્કણ્ઠાપ્સરોગણે ।
ભટો દિવ્યશરીરેણ પાર્શ્વં પ્રાપ્તો વિલોક્યતામ્ ॥

ફુલ્લહેમારવિન્દાસુ ચ્છાયાશીતજલાનિલૈઃ ।
સ્વર્ગનદ્યાસ્ તટીષ્વ્ એવં દૂરાયાતં વિલોકય ॥

વિવિધાયુધસઙ્ઘટ્ટખણ્ડિતોગ્રાદ્રિકોટયઃ ।
ખે ચરન્ત્યો ઝણત્કારૈઃ પ્રમૃતાસ્ તારકા ઇવ ॥

વ્યોમ્નિ શૂન્યનદીવાહે વહત્સાયકવારિણિ ।
ચક્રાવર્તિનિ ગચ્છન્તિ ગિરયો ઽપ્ય્ અણુપઙ્કતામ્ ॥

ભ્રમદ્ભિર્ ગ્રહમાર્ગેષુ શિરોભિર્ વીરભૂભૃતામ્ ।
આયુધાંશુલતાનાલલગ્નાસિદલકણ્ટકૈઃ ॥

કેતુપટ્ટમૃણાલાઙ્કતલૈર્ લગ્નશિલીમુખૈઃ ।
વહદ્વાતલલત્પદ્મં નભઃ પદ્મસરઃ કૃતમ્ ॥

મૃતમાતઙ્ગસઙ્ઘાતે ગિરાવ્ ઇવ પિપીલિકાઃ ।
ભીરવઃ પરિલીયન્તે સ્ત્રિયઃ પુંવક્ષસીવ વા ॥

અપૂર્વોત્તમસૌન્દર્યકાન્તસઙ્ગમશંસિનઃ ।
વાન્તિ વિદ્યાધરસ્ત્રીણામ્ અલકોલ્લાસિનો ઽનિલાઃ ॥

છત્ત્રેષૂડ્ડીય યાતેષુ છિન્નેષુ વ્યોમચન્દ્રિકામ્ ।
ઇન્દુનૈત્ય યશોમૂર્ત્યા કૃતા શુભ્રાતપત્રતા ॥

ભટો મરણમૂર્છાન્તે નિમેષેણામરં વપુઃ ।
સ્વકલ્પશિલ્પિરચિતં પ્રાપ્તસ્ સ્વપ્નપુરં યથા ॥

શૂલશક્ત્યૃષ્ટિચક્રાણાં વૃષ્ટયો મુક્તમુષ્ટયઃ ।
વ્યોમાબ્ધૌ મત્સ્યમકરકુલીરાશ્ શૂરવત્ સ્થિતાઃ ॥

શરોત્કૃત્તપતચ્છત્ત્રકલહંસૈર્ નભસ્તલમ્ ।
ભાતિ સઞ્ચિતપૂર્ણેન્દુબિમ્બલક્ષૈર્ ઇવાવૃતમ્ ॥

ક્રિયતે ગગનોડ્ડીનૈશ્ ચામરૈશ્ ચારુઘર્ઘરૈઃ ।
વાતાવધૂતસારાવતરઙ્ગનિકરદ્યુતિઃ ॥

દૃશ્યન્તે તે ઽતિદલિતાશ્ છત્ત્રચામરકેતવઃ ।
આકાશક્ષેત્રનિક્ષિપ્તા યશશ્ શાલિલવા ઇવ ॥

વહદ્ભિર્ વ્યોમ્ન્ય્ અસઙ્ખ્યેયૈઃ પશ્ય નીતા શરૈઃ ક્ષયં ।
શક્તિવૃષ્ટિર્ ઉપાયાન્તી સસ્યશ્રીશ્ શલભૈર્ ઇવ ॥

એષા પ્રસૃતદોર્દણ્ડભટખડ્ગચ્છનત્કૃતિઃ ।
કઠિનાત્ કઙ્કટાજ્ જાતા મૃત્યોર્ એવોગ્રહુઙ્કૃતિઃ ॥

હેતિકલ્પાનિલક્ષુણ્ણા દન્તનિર્ઝરવારયઃ ।
જનતાક્ષયકાલે ઽસ્મિન્ ભગ્નનાગા નગા ઇવ ॥

સચક્રનાથસૂતાશ્વં વ્યૂહરક્તમહાહ્રદે ।
હા હા ધિગ્ બ્રુડિતં ભ્રષ્ટં વિનષ્ટં રથપત્તનમ્ ॥

કટુકઙ્કટકુટ્ટાકખડ્ગસઙ્ઘટ્ટટાઙ્કૃતૈઃ ।
કાલરાત્ર્યા પ્રનૃત્યન્ત્યા રણે વીણેવ વાદ્યતે ॥

નરેભાશ્વશવાદ્રિભ્યો યે ચ્યુતા રક્તનિર્ઝરાઃ ।
પશ્ય તદ્બિન્દુસિક્તેન વાયુનારુણિતા દિશઃ ॥

શસ્ત્રાંશુજલધેર્ વ્યોમ્નિ કાલીચિકુરમેચકી ।
શરકોરકભારસ્રગ્ ઘેમવિદ્યુદ્ ઇવોમ્ભિતા ॥

અનન્તરક્તસંરક્તસેનાવનિભિર્ આયુધૈઃ ।
ભુવનં ભાત્ય્ અતિજ્વાલમ્ અગ્નિલોકમ્ ઇવાકુલમ્ ॥

ભુસુણ્ડીશક્તિશૂલાસિમુસુલપ્રાસવૃષ્ટયઃ ।
અન્યોઽન્યચ્છેદભેદાભ્યાં કણપ્રકરતામ્ ઇતાઃ ॥

અક્ષોભૈકપ્રહરણાદ્ અબુદ્ધાન્યોઽન્યચેષ્ટિતમ્ ।
સંરમ્ભાણ્વેષણપ્રજ્ઞં રણં સુપ્તમ્ ઇવ સ્થિતમ્ ॥

અનન્યશબ્દાવિરતહતહેતિઝણઝણૈઃ ।
ગાયતીવ ક્ષયક્ષોભમુદિતો રણભૈરવઃ ॥

અન્યોઽન્યહતહેત્યગ્રચૂર્ણપૂર્ણો રણાર્ણવઃ ।
વાલુકામય એવાભૂચ્ છિન્નચ્છત્ત્રતરઙ્ગકઃ ॥

અતિરભસરસદ્વિદારિતૂર્ય પ્રતિરવપૂરિતલોકપાલલોકઃ ।
રણગિરિર્ અયમ્ ઉગ્રપક્ષદક્ષઃ પ્રવિસૃતનૃત્ત ઇવામ્બરે યુગાન્તે ॥

હા હા ધિક્ પ્રવિકટકઙ્કટાટનોદ્યત્પ્રોડ્ડીનપ્રકટતડિચ્છટાઃ પ્રદીપ્તાઃ ।
ક્રેઙ્કારસ્ફુરિતગુણેરિતા રણન્તો નારાચાશ્ શિખરિશિલાભિદો વહન્તિ ॥

છિન્નેચ્છા ચ્છમ્ ઇતિ ન યાવદ્ અઙ્ગભઙ્ગં કુર્વન્તિ જ્વલદનલોજ્જ્વલાઃ પૃષત્કાઃ ।
તાવદ્ દ્રાગ્ દ્રુતમ્ ઇત એહિ મિત્ર યામો યામો ઽયં પ્રવહતિ વાસરશ્ ચતુર્થઃ ॥