મોક્ષોપાય · અધ્યાય 3.33

ભગવન્ યુદ્ધમ્ એતન્ મે સમાસેન મનાગ્ વદ ।
શ્રુતિર્ આહ્લાદ્યતે શ્રોતુર્ યસ્માદ્ એતાભિર્ ઉક્તિભિઃ ॥

અથ ખે તત્ર તે દેવ્યૌ સઙ્ગ્રામં તદ્ અવેક્ષિતુમ્ ।
વિમાને કલ્પિતે કાન્તે રુદ્ધે રુરુહતુસ્ સ્થિરે ॥

એતસ્મિન્ન્ અન્તરે તત્ર લીલેશપ્રતિપક્ષતઃ ।
તામ્યન્ સોઢુમ્ અશક્તસ્ સન્ દુઃખવ્યતિકરં રણે ॥

પ્રલયાર્ણવકલ્લોલ ઇવોત્પત્યોદ્ભટો ભટઃ ।
જહૌ સાનાવ્ ઇવ શિલાં ભટસ્યોરસિ મુદ્ગરમ્ ॥

અથ પ્રવૃત્તઃ પ્રસભં પ્રલયાર્ણવરંહસા ।
સેનયોશ્ શસ્ત્રસમ્પાતઃ કિરન્ન્ અનલવિદ્યુતઃ ॥

તરત્તરલધારાગ્રરેખાઙ્કિતનભસ્તલઃ ।
ધ્વનજ્ઝણઝણાશબ્દમધ્યલક્ષિતઝાઙ્કૃતિઃ ॥

વીરહુઙ્કારમિશ્રજ્યાઘર્ઘરારાવઘસ્મરઃ ।
પ્રવૃત્તશરધારાભ્રભાસ્કરાર્ચિર્વિતાનકઃ ॥

રણત્કઙ્કટટાઙ્કારપ્રોડ્ડીનકણપાવકઃ ।
પરસ્પરાહતિચ્છિન્નહેતિખણ્ડખગામ્બરઃ ॥

વીરદોર્દ્રુમસઞ્ચારવહદ્વનનભસ્તલઃ ।
કોદણ્ડચક્રક્રેઙ્કારદ્રવદ્વૈમાનિકાઙ્ગનઃ ॥

મહાહલહલારાવભૃઙ્ગીકૃતઘનધ્વનિઃ ।
નિર્વિકલ્પસમાધિસ્થ ઇવૈકઘનતાવશાત્ ॥

નારાચાસારધારાગ્રલૂનશૂરશિરઃકણઃ ।
પરસ્પરાંસસઙ્ઘટ્ટરણત્કઙ્કટસઙ્કટઃ ॥

હુઙ્કારહતહેત્યગ્રસઙ્ઘટ્ટકટુટાઙ્કૃતઃ ।
તરદ્ધારાતરઙ્ગોગ્રદન્તુરાશેષદિઙ્મુખઃ ॥

હેતિસઙ્ઘટ્ટવિક્ષોભમુષ્ટિગ્રાહ્યઝણજ્ઝણઃ ।
વિકચત્સ્ફોટકસ્ફોટરટચ્ચટચટારવઃ ॥

પ્રવહત્ખડ્ગટાઙ્કારજ્વલચ્છણશણધ્વનિઃ ।
સરચ્છરભરોદ્વાન્તલસચ્છવશવસ્વનઃ ॥

ધગ્ ધગ્ ધગ્ ઇતિ વિચ્છિન્નકણ્ઠોત્થવ્રણલોહિતઃ ।
છિન્નબાહુશિરઃખડ્ગખણ્ડનિર્વિવરામ્બરઃ ॥

કઙ્કટોત્થસ્ફુરદ્વહ્નિચ્છટાપ્લુષ્ટશિરોરુહઃ ।
રણત્પતદસિવ્રાતદત્તપીનઝણજ્ઝણઃ ॥

કુન્તકુણ્ઠિતમાતઙ્ગતરઙ્ગોદ્ગતલોહિતઃ ।
દન્તિદન્તવિનિષ્પેષતારક્રેઙ્કારકર્કશઃ ॥

મહામુસુલસમ્પાતપિષ્ટવૃન્દોદ્ધુરસ્વરઃ ।
તરચ્છૂરશિરઃપદ્મપ્રકરાચ્છાદિતામ્બરઃ ॥

વ્યોમવ્યસ્તભુજાહીન્દ્રપૂર્ણધૂલિમયામ્બુદઃ ।
છિન્નહેતિનરારબ્ધકેશાકેશિપ્રતિક્રિયઃ ॥

નખાનખિનિકૃષ્ટાક્ષિકર્ણનાસોમહાભયઃ ।
પતત્સમદમાતઙ્ગકમ્પિતોર્વીલુઠદ્રથઃ ॥

રણપ્રાસરયોત્પન્નવ્રણરક્તપરિચ્છદઃ ।
રજોરચિતનીહારકચત્પ્રવહદાયુધઃ ॥

એકીકૃતઘનક્ષોભસૈન્યસાગરગર્વિતઃ ।
મત્તહાસવિલાસેન મૃત્યુના પરિચર્વિતઃ ॥

ગર્વિતાદ્રીન્દ્રનાગેન્દ્રખર્વિતામ્ભોદગર્જિતઃ ।
વૃક્ષપાર્શ્વતટીસન્નચક્રશક્ત્યૃષ્ટિમુદ્ગરઃ ॥

શરોર્ણાતન્તુનીરન્ધ્રવૃક્ષયોધાદિમેષકઃ ।
મેઘવિભ્રાન્તિવિચ્છિન્નપતાકાપટ્ટચામરઃ ॥

યન્ત્રપાષાણચક્રૌઘદ્રુતવિદ્રુતખેચરઃ ।
મરણવ્યગ્રકૃત્તાઙ્ગયોધાક્રન્દાતિઘર્ઘરઃ ॥

કુધારાઘાતસઙ્ઘાતવિદલન્મસ્તકવ્રણઃ ।
દૂરોડ્ડીનકચત્ખડ્ગખણ્ડતારકિતામ્બરઃ ॥

શઙ્કુનિર્મુક્તશક્ત્યોઘવિષક્તેભાવૃતાવનિઃ ।
સૈન્યવ્યાકુલવેતાલવલ્ગનોન્મુક્તમુદ્ગરઃ ॥

ગગનોત્તમ્ભિતોત્તુઙ્ગશૂરતોમરતોરણઃ ।
ભુસુણ્ડીભગ્નખડ્ગૌઘખણ્ડાલીવ્યોમકુણ્ડલઃ ॥

કુન્તવેણુવનવ્યસ્તતાપામ્બરકચચ્છિખી ।
ખડ્ગર્ષ્ટિવૃષ્ટિસન્તુષ્ટરાજપૂજિતસૈનિકઃ ॥

શૂરોત્તમ્ભિતસચ્છૂરગ્રહણોદ્યમિતાપ્સરાઃ ।
ગદાનુસારવિગલત્સ્ફુરિતાઙ્ગદદિઙ્મુખઃ ॥

પ્રાસપ્રસભનિષ્પિષ્ટકષ્ટચેષ્ટભટોત્કટઃ ।
ચક્રિચક્રખસઞ્ચારચ્છિન્નાચતુરવારણઃ ॥

પરશુવ્રાતસમ્પાતપતત્સમદવારણઃ ।
લગુડાલોડનોડ્ડીનપ્રોડ્ડામરરણદ્ભટઃ ॥

યન્ત્રપાષાણસમ્પાતપિષ્ટકેતુરથદ્રુમઃ ।
કરવાલવિલૂનોગ્રચ્છત્ત્રપઙ્કજપાણ્ડુરઃ ॥

ક્ષેપણક્ષોભસઙ્ક્ષીણસૈન્યક્ષોણ્યોપલક્ષિતઃ ।
કબન્ધબન્ધમત્તેભપાતસમ્પિષ્ટપાર્શ્વગઃ ॥

શઙ્કુશઙ્કિતશઙ્ખસ્થવીરવારિતવારણઃ ।
પાશાવેશવિશેષજ્ઞવીરાતિપરિદેવનઃ ॥

ક્ષુરિકાકુક્ષિનિર્ભેદગલત્પદ્મપતજ્જનઃ ।
ત્રિશૂલવદનોદાત્તશૂલશઙ્કરનર્તનઃ ॥

ધાવદ્ધાનુષ્કસમ્પૂર્ણતૂણકૂજનકાકલિઃ ।
ભિણ્ડિપાલભટાટોપપત્રાતારભટીનટઃ ॥

વજ્રમુષ્ટિવિનિષ્પિષ્ટપૃષ્ઠસદ્ભટસઙ્કટઃ ।
શ્યેનવદ્ વ્યોમપદવીં પ્રોત્પતત્સૂતપટ્ટિશઃ ॥

અઙ્કુશાક્રાન્તશૂરેન્દ્રમહેભહયકેતનઃ ।
હાલાહલહલાલૂનહેલાકુલબલાચલઃ ॥

સુતાલોત્તાલકુદ્દાલનિખાતબલભૂતલઃ ।
ધનુર્દ્વિગુણદત્તાસ્ત્રલૂનલોકશિલાવલિઃ ॥

ક્રકચોભયપાર્શ્વેહાચ્છિન્નમત્તમતઙ્ગજઃ ।
સઙ્ગ્રામોલૂખલાપૂર્ણલોકતણ્ડુલમૌસુલી ।
અભ્રાભશૃઙ્ખલાજાલબદ્ધસેનાવિહઙ્ગમઃ ॥

નારાચવર્ષવરવારિદવીરપૂર મત્તાભ્રસમ્ભ્રમસનૃત્તકબન્ધબર્હી ।
કલ્પાન્તકાલ ઇવ વેગવિવર્તમાનમાતઙ્ગશૈલવલિતો રણસમ્ભ્રમો ઽભૂત્ ॥