મોક્ષોપાય · અધ્યાય 3.32

અથ વીરવરોત્કણ્ઠનૃત્યદપ્સરસિ સ્થિતા ।
લીલા વિલોકયામ્ આસ વ્યોમ્નિ વિદ્યાન્વિતાવનૌ ॥

સુરાષ્ટ્રમણ્ડલે ભર્તૃપાલિતે વનમાલિતે ।
કસ્મિંશ્ચિદ્ વિતતારણ્યે દ્વિતીયાકાશભીષણે ॥

સેનાદ્વિતયમ્ અક્ષુબ્ધં સૌમ્યાબ્ધિદ્વિતયોપમમ્ ।
મહારમ્ભઘનં મત્તં સ્થિરં રાજદ્વયાન્વિતમ્ ॥

યુદ્ધસજ્જં સુસન્નદ્ધસિદ્ધમ્ અગ્નિમ્ ઇવાહુતમ્ ।
પૂર્વપ્રહારસમ્પાતપ્રેક્ષાક્ષુબ્ધાક્ષિલક્ષકમ્ ॥

ઉદ્યતામલનિસ્ત્રિંશધારાસારબ્રુડજ્જનમ્ ।
કચત્પરશ્વધપ્રાસભિણ્ડિપાલર્દ્ધિસઙ્કુલમ્ ॥

ગરુત્મત્પક્ષવિક્ષુબ્ધવનસમ્પાતકમ્પિતમ્ ।
ઉદ્યદ્દિનકરાલોકકચત્કનકકઙ્કટમ્ ॥

પરસ્પરમુખાલોકકોપપ્રોદ્ધાસિતાયુધમ્ ।
અન્યોઽન્યબદ્ધદૃષ્ટિત્વાચ્ ચિત્રભિત્તાવ્ ઇવાર્પિતમ્ ॥

લેખામર્યાદયા દીર્ઘબદ્ધયા સ્થાપિતસ્થિતિ ।
અનિવાર્યમહાહાર્યઝાઙ્કારાશ્રુતસઙ્કથમ્ ॥

પૂર્વપ્રહારસ્મયતશ્ ચિરસંશાન્તદુન્દુભિ ।
નિબદ્ધયોધસંસ્થાનનિશ્ચલાનીકમન્થરમ્ ॥

ધનુર્દ્વિતયમાત્રાત્મશૂન્યમધ્યૈકસેતુના ।
વિભક્તં કલ્પવાતેન મત્તમ્ એકાર્ણવં યથા ॥

કાર્યસઙ્કટસંરમ્ભચિન્તાપરવશેશ્વરમ્ ।
રવવદ્ભેકકણ્ઠત્વગ્ભઙ્ગુરાતુરહૃદ્ગુહમ્ ॥

પ્રાણસર્વસ્વસન્ન્યાસસોદ્યોગાસઙ્ખ્યસૈનિકમ્ ।
કર્ણસ્થસશરજ્યૌઘત્યાગોન્મુખધનુર્ધરમ્ ॥

પ્રહારપાતસમ્પ્રેક્ષાનિસ્સ્પન્દાસઙ્ખ્યસૈનિકમ્ ।
અન્યોઽન્યોત્કટકાઠિન્યભટભ્રૂકુટિસઙ્કટમ્ ॥

પરસ્પરાંસસઙ્ઘટ્ટકટુટાઙ્કારકઙ્કટમ્ ।
વીરયોધદુરાધર્ષભીરુપ્રોજ્ઝિતકોટરમ્ ॥

મિથસ્સંસ્થાનકાલોકમાત્રસન્દિગ્ધજીવિતમ્ ।
સમસ્તાઙ્ગરુહાસક્તપાંસુવૃદ્ધાભમાનવમ્ ॥

પૂર્વપ્રહારસમ્પ્રેક્ષાવ્યગ્રપ્રાણિતયા તયા ।
સંશાન્તકલ્લોલરવં નિદ્રામુદ્રપુરોપમમ્ ॥

સંશાન્તશઙ્ખસઙ્ઘાતતૂર્યનિર્હ્રાદદુન્દુભિ ।
ભૂતલાવશસંલીનસર્વપાંસુપયોધરમ્ ॥

પલાયનપરૈઃ પશ્ચાત્ ત્યક્તમ્ અઙ્ગુલમ્ અઙ્ગુલમ્ ।
વિસારિમકરવ્યૂહમત્સ્યસંસ્થાબ્ધિભાસુરમ્ ॥

પતાકામઞ્જરીપુઞ્જવીજિતદ્રુમનાયકમ્ ।
હાસ્તિકોત્તમ્ભિતકરકાનનીકૃતખાન્તરમ્ ॥

તરત્તરલભાપૂરસપક્ષસકલાયુધમ્ ।
ધમદ્ ધમ્ ઇતિ શબ્દૈશ્ ચ શ્વાસોત્થૈર્ વ્યાપ્તખાન્તરમ્ ॥

ચક્રવ્યૂહકરાક્રાન્તદુર્વૃત્તસુભટાસુરમ્ ।
ગરુડવ્યૂહસંરમ્ભવિવલન્નાગસઞ્ચયમ્ ॥

શ્યેનવ્યૂહાવિભિન્નોગ્રસન્નિવેશોન્નમદ્ધ્વનિ ।
અન્યોઽન્યસ્ફોટનિષ્પેષપ્રપતચ્છૂરવૃન્દકમ્ ॥

વિવિધવ્યૂહવિન્યાસમ્ આન્તરારાવભૈરવમ્ ।
કરપ્રતોલનોલ્લાસમત્તમુદ્ગરમન્દિરમ્ ॥

કૃષ્ણાયુધાંશુજાલેન શ્યામીકૃતદિવાકરમ્ ।
અનિલાધૂતશલ્મીલશૂત્કરાભશરધ્વનિ ॥

અનેકકલ્પકલ્પાન્તસધર્મમ્ ઇવ સંસ્થિતમ્ ।
પ્રલયાનિલસઙ્ક્ષુબ્ધમ્ એકાર્ણવમ્ ઇવોત્થિતમ્ ॥

પાતાલકુહરાક્ષુબ્ધમ્ અન્ધકારમ્ ઇવોત્થિતમ્ ।
લોકાલોકમ્ ઇવોન્મત્તનૃત્તલોલલસત્તટમ્ ।
મહાનરકસઙ્ઘાતં ભિત્ત્વાવનિમ્ ઇવોત્થિતમ્ ॥

આલોલકુન્તમુસુલાસિપરશ્વધાંશુશ્યામાયમાનમ્ ઇવ સાતપવારિપૂરૈઃ ।
એકાર્ણવં ભુવનકોશમ્ ઇવાચિરેણ કર્તું સમુદ્યતમ્ અગાધમ્ અનન્તપૂરૈઃ ॥