મોક્ષોપાય · અધ્યાય 3.23

ઇતિ સઙ્કથનં કૃત્વા તસ્યાં નિશિ વરાઙ્ગને ।
સુપ્તે પરિજને નૂનમ્ અથાન્તઃપુરમણ્ડપે ॥

દૃઢાખિલાર્ગલદ્વારગવાક્ષે દક્ષચેતસી ।
પુષ્પપૂરણસુસ્ફીતમાંસલામોદમન્થરે ॥

અમ્લાનમાલાવસનશવપાર્શ્વાસનસ્થિતે ।
સકલામલપૂર્ણેન્દુવદનોદ્દ્યોતિતાસ્પદે ॥

સમાધિસ્થાનકં ગત્વા તસ્થતુર્ નિશ્ચલાઙ્ગકે ।
રત્નસ્તમ્ભાદ્ ઇવોત્કીર્ણે ચિત્રભિત્તાવ્ ઇવાર્પિતે ॥

સર્વાસ્ તત્યજતુશ્ ચિન્તાસ્ સઙ્કોચં સમુપાગતે ।
દિવસાન્ત ઇવાબ્જિન્યૌ પ્રસૃતામોદલેખિકે ॥

બભૂવતુર્ ભૃશં શાન્તે શુદ્ધે સ્પન્દવિવર્જિતે ।
ગિરૌ શરદિ નિર્વાત ઇવ વૃષ્ટ્યાભ્રમાલિકે ॥

નિર્વિકલ્પસમાધાનાજ્ જહતુર્ વ્યોમ્નિ સંવિદમ્ ।
યથા કલ્પલતે કાન્તે પૂર્ણમ્ ઋત્વન્તરે રસમ્ ॥

અહં જગદ્ ઇતિ ભ્રાન્તેર્ દૃશ્યસ્યાદાવ્ અનુદ્ભવઃ ।
યદા તાભ્યામ્ અવગતસ્ સ્વાત્યન્તાભાવનાત્મકઃ ॥

તદા દૃશ્યપિશાચો ઽયમ્ અલમ્ અસ્તઙ્ગતસ્ તયોઃ ।
અસત્ત્વાદ્ એવ ચાસ્માકં શશશૃઙ્ગમ્ ઇવાનઘ ॥

આદાવ્ એવ હિ યન્ નાસ્તિ વર્તમાને ઽપિ તત્ તથા ।
ભાતં ચાભાતમ્ એવાતો મૃગતૃષ્ણામ્બુવજ્ જગત્ ॥

સ્વભાવઃ કેવલશ્ શાન્તસ્ સ્ત્રીદ્વયં તદ્ બભૂવ હ ।
ચન્દ્રાર્કાદિપદાર્થૌઘદૂરમુક્તમ્ ઇવામ્બરમ્ ॥

તેનૈવ જ્ઞાનદેહેન તતાર જ્ઞપ્તિદેવતા ।
માનુષી ત્વ્ ઇતરેણાશુ જ્ઞાનાજ્ઞાનાનુરૂપિણા ॥

ગેહાન્તર્ એવ પ્રાદેશમાત્રમ્ આરુહ્ય વૈ દિવઃ ।
બભૂવતુશ્ ચિદાકાશરૂપિણ્યૌ વ્યોમગાકૃતી ॥

અથ તે લલને લીલાલાને લલિતલોચને ।
સ્વભાવાચ્ ચેત્યસંવિત્તેર્ નભો દૂરમ્ ઇવાગતે ॥

તત્રસ્થે એકચિદ્વૃત્ત્યા પુપ્લુવાતે નભસ્તલમ્ ।
કોટિયોજનવિસ્તીર્ણં દૂરાદ્ દૂરતરાન્તરમ્ ॥

દૃશ્યાનુસન્ધાનનિજસ્વભાવાદ્ આકાશદેહે અપિ તે મિથો ઽત્ર ।
પરસ્પરાકારવિલોકનેન બભૂવતુસ્ સ્નેહપરે વયસ્યે ॥