મોક્ષોપાય · અધ્યાય 3.128

અથ તાં મનસા ધ્યાયંસ્ તત્રૈવામીલિતેક્ષણઃ ।
આરબ્ધવાન્ મનોરાજ્યમ્ ઇદમ્ એકઃ કિલોશનાઃ ॥

એષા હિ લલના વ્યોમ્નિ સહસ્રનયનાલયે ।
સમ્પ્રાપ્તો ઽયમ્ અહં સ્વર્ગમ્ આલોલસુરસુન્દરમ્ ॥

ઇમે તે મૃદુમન્દારકુસુમોત્તંસસુન્દરાઃ ।
દ્રવત્કનકનિષ્ષ્યન્દવિલાસિવપુષસ્ સુરાઃ ॥

ઇમાસ્ તા લોચનોલ્લાસસૃષ્ટનીલાબ્જવૃષ્ટયઃ ।
મુગ્ધા હાસવિલાસિન્યઃ કાન્તા હરિણદૃષ્ટયઃ ॥

ઇમે તે કૌસ્તુભોદ્દ્યોતા અન્યોઽન્યપ્રતિબિમ્બિતાઃ ।
વિશ્વરૂપોપમાકારા મરુતો મત્તકાશિનઃ ॥

ઐરાવણકટામોદવિરક્તમધુપશ્રુતાઃ ।
ઇમાસ્ તાઃ કાકલીગીતા ગીર્વાણગણગીતયઃ ॥

ઇયં સા કનકામ્ભોજચરદ્વૈરિઞ્ચસારસા ।
મન્દાકિનીતટોદ્યાનવિશ્રાન્તસુરનાયિકા ॥

એતે તે યમચન્દ્રેન્દ્રસૂર્યાનિલજલાનલાઃ ।
લોકપાલાસ્ તનૂદ્દ્યોતકીર્ણદીપ્તોજ્જ્વલાર્ચિષઃ ॥

અયં સ સુરવિક્રાન્તહેતિકણ્ડૂયિતાનનઃ ।
ઐરાવણો રણદ્દન્તપ્રોતદૈત્યેન્દ્રમણ્ડલઃ ॥

ઇમે તે ભૂતલસ્થાના વ્યોમતારકતાં ગતાઃ ।
વૈમાનિકાશ્ ચલચ્ચારુહારચામરકુણ્ડલાઃ ॥

ઇમાસ્ તા વિવિધોદ્યાનમણિમન્દિરમણ્ડિતાઃ ।
વિમાનપઙ્ક્તયશ્ ચારુચામીકરમયાતપાઃ ॥

મેરૂપલતલાસ્ફાલશીકરાકીર્ણદેવતાઃ ।
એતાસ્ તાઃ કીર્ણમન્દારા ગઙ્ગાસલિલવીચયઃ ॥

એતાઃ પ્રસૃતમન્દારમઞ્જરીપુઞ્જપિઞ્જરાઃ ।
દોલાલોલાપ્સરશ્શ્રેણ્યશ્ શક્રોપવનવીથયઃ ॥

ઇમે તે કુન્દમન્દારમકરન્દસુગન્ધયઃ ।
ચન્દ્રાંશુનિકરાકારાઃ પારિજાતસમીરણાઃ ॥

પુષ્પકેસરનીહારપટવાસેરણોત્સુકૈઃ ।
લતાઙ્ગનાગણૈર્ વ્યાપ્તમ્ ઇદં તન્ નન્દનં વનમ્ ॥

કાન્તગીતરવાનન્દપ્રનર્તિતસુરાઙ્ગનૌ ।
ઇમૌ તૌ વલ્લકીસ્નિગ્ધસ્વરૌ નારદતુમ્બુરૂ ॥

ઇમે તે પુણ્યકર્તારો ભૂરિભૂષણભૂષિતાઃ ।
વ્યોમન્ય્ ઉડ્ડયમાનેષુ વિમાનેષુ સુખં સ્થિતાઃ ॥

મદમન્મથમત્તાઙ્ગ્ય ઇમાસ્ તાસ્ સુરયોષિતઃ ।
દેવેશ્વરં નિષેવન્તે વનં વનલતા ઇવ ॥

ચન્દ્રાંશુજાલકુસુમાશ્ ચિન્તામણિગુલુચ્છકાઃ ।
કલ્પવૃક્ષ ઇમે પક્વરત્નસ્તબકદન્તુરાઃ ॥

ઇહ તાવદ્ ઇમં શક્રમ્ અહમ્ આસનસંસ્થિતમ્ ।
દ્વિતીયમ્ ઇવ દેવેશં પૂજયૈવાભિવાદયે ॥

ઇતિ સઞ્ચિન્ત્ય શુક્રેણ મનસૈવ શચીપતિઃ ।
તેનાભિવાદિતસ્ તત્ર દ્વિતીય ઇવ વૈ ભૃગુઃ ॥

અથ સાદરમ્ ઉત્થાય શુક્રશ્ શક્રેણ પૂજિતઃ ।
ગૃહીતહસ્તમ્ આનીય સમીપ ઉપવેશિતઃ ॥

ધન્યસ્ ત્વદાગમેનાદ્ય સ્વર્ગો ઽયં શુક્ર શોભતે ।
ઉષ્યતાં ચિરમ્ એવેહ શક્ર ઇત્થમ્ ઉવાચ તમ્ ॥

અથ તત્રોપવિશ્યાસૌ ભાર્ગવશ્ શોભિતાનનઃ ।
શ્રિયં જહાર શશિનસ્ સકલસ્યામલસ્ય ચ ॥

સકલસુરગણાભિવન્દિતો ઽસૌ ભૃગુતનયશ્ શતમન્યુપાર્શ્વસંસ્થઃ ।
ચિરતરમ્ અતુલામ્ અવાપ તુષ્ટિં નરમતિમ્ ઉજ્ઝિતવાન્ અલં બભૂવ ॥