મોક્ષોપાય · અધ્યાય 3.129

ઇતિ શુક્રઃ પુરં પ્રાપ્ય વૈબુધં સ્વેન ચેતસા ।
વિસસ્માર નિજં ભાવં પ્રાક્તનં વ્યસનં વિના ॥

મુહૂર્તમ્ અથ વિશ્રમ્ય તસ્ય પાર્શ્વે શચીપતેઃ ।
સ્વર્ગં વિહર્તુમ્ ઉત્તસ્થૌ સ્વર્વાસિપરિચોદિતઃ ॥

સ્વર્ગશ્રિયં સમાલોક્ય લોલલોચનલાઞ્છિતમ્ ।
સ્ત્રૈણં દ્રષ્ટું જગામાસૌ નલિનીમ્ ઇવ સારસઃ ॥

તત્ર તાં મૃગશાવાક્ષીં કાન્તામ્ અધ્યાગતામ્ અસૌ ।
દદર્શ વિપિનાન્તસ્સ્થાં ભૃઙ્ગશ્ ચૂતલતામ્ ઇવ ॥

તામ્ આલોક્ય લસલ્લોલવિલાસવલિતાકૃતિમ્ ।
આસીદ્ વિલીયમાનાઙ્ગો જ્યોત્સ્નયેન્દુમણિર્ યથા ॥

વિલીયમાનસર્વાઙ્ગસ્ તામ્ અવૈક્ષત કામિનીમ્ ।
ચન્દ્રકાન્ત ઇવ જ્યોત્સ્નાં શીતલાં ખે વિલાસિનીમ્ ॥

તેનાવલોકિતા સાપિ તત્પરાયણતાં ગતા ।
નિશાન્તે ચક્રવાકેન કાન્તેવ પરિકૂજિતા ॥

રસાદ્ વિકસતોર્ નૂનમ્ અન્યોઽન્યમ્ અનુરક્તયોઃ ।
પ્રાતર્ અર્કનલિન્યોર્ યા શોભા સૈવ તયોર્ અભૂત્ ॥

સઙ્કલ્પિતાર્થદાયિત્વાદ્ દેશસ્ય મદનેન સા ।
સર્વાઙ્ગં વિવશીકૃત્ય શુક્રાયૈવ સમર્પિતા ॥

પેતુસ્ સ્મરશરાસ્ તસ્યા મૃદુષ્વ્ અઙ્ગેષુ ભૂરિશઃ ।
પલાશેષ્વ્ ઇવ પદ્મિન્યા ધારા નવપયોમુચઃ ॥

સા બભૂવ સ્મરાધૂતા લોલાલિવલયાલકા ।
મન્દવાતવિનુન્નાયા મઞ્જર્યાસ્ સહધર્મિણી ॥

નીલનીરજનેત્રાં તાં હંસવારણગામિનીમ્ ।
મદનઃ ક્ષોભયામ્ આસ પૂરઃ કમલિનીમ્ ઇવ ॥

અથ તાં તાદૃશીં દૃષ્ટ્વા શુક્રસ્ સઙ્કલ્પિતાર્થભાક્ ।
તમસ્ સઙ્કલ્પયામ્ આસ સંહારમ્ ઇવ ભૂતકૃત્ ॥

ત્રિવિષ્ટપસ્ય દેશો ઽસૌ બભૂવ તિમિરાકુલઃ ।
ભૂલોકસ્યાન્ધતમસો લોકાલોકતટો યથા ॥

લજ્જાન્ધકારતીક્ષ્ણાંશૌ તસ્મિંસ્ તિમિરમણ્ડલે ।
પ્રતિષ્ઠામ્ આગતે તસ્ય મિથુનસ્યેવ મન્મથે ॥

તેષુ સર્વેષુ ભૂતેષુ ગતેષ્વ્ અભિમતાં દિશમ્ ।
તસ્માત્ પ્રદેશાદ્ ભૂલોકં દિનાન્તે વિહગેષ્વ્ ઇવ ॥

સા દીર્ઘધવલાપાઙ્ગા પ્રવૃદ્ધમદના તથા ।
આજગામ ભૃગોઃ પુત્રં મયૂરી વારિદં યથા ॥

ધવલાગારમધ્યસ્થે પર્યઙ્કે પરિકલ્પિતે ।
વિવેશ ભાર્ગવસ્ તત્ર ક્ષીરોદ ઇવ માધવઃ ॥

સા પાદાવ્ અવલમ્બ્યાસ્ય વિવશેવ વરાનના ।
રરાજ ચ સુરેભસ્ય પાદલગ્નેવ પદ્મિની ॥

ઉવાચ ચેદં લલિતં લસત્સ્નેહોત્કયા ગિરા ।
વચો મધુરમ્ આનન્દિ વિલાસવલિતાક્ષરમ્ ॥

પશ્યામલેન્દુવદન મણ્ડલીકૃતકાર્મુકઃ ।
અબલામ્ અનુબધ્નાતિ મામ્ એષ કિમનઙ્ગકઃ ॥

પાહિ મામ્ અબલાં નાથ દીનાં ત્વચ્છરણામ્ ઇહ ।
કૃપણાશ્વાસનં સાધો વિદ્ધિ સચ્ચરિતવ્રતમ્ ॥

સ્નેહદૃષ્ટિમ્ અજાનદ્ભિર્ મૂઢૈર્ એવ મહામતે ।
પ્રણયા અવગણ્યન્તે ન રસજ્ઞૈઃ કદાચન ॥

અશઙ્કિતોપસમ્પન્નઃ પ્રણયો ઽન્યોઽન્યરક્તયોઃ ।
અધઃકરોતિ નિષ્યન્દં ચાન્દ્રમ્ આસ્વાદિતં પ્રિય ॥

ન તથા સુખયત્ય્ એષા ચેતસ્ ત્રિભુવનેશતા ।
યથા પરસ્પરાનન્દી સ્નેહઃ પ્રથમરક્તયોઃ ॥

ત્વત્પાદસ્પર્શનેનેયં સમાશ્વસ્તાસ્મિ માનદ ।
ચન્દ્રપાદપરામૃષ્ટા યથા નિશિ કુમુદ્વતી ॥

સંસ્પર્શામૃતપાનેન તવ જીવામિ સુન્દર ।
ચન્દ્રાંશુરસપાનેન ચકોરી ચપલા યથા ॥

મામ્ ઇમાં ચરણાલીનાં ભ્રમરીં કરપલ્લવૈઃ ।
આલિઙ્ગ્યામૃતસમ્પૂર્ણે સત્પદ્મહૃદયે કુરુ ॥

ઇત્ય્ ઉક્ત્વા પુષ્પમૃદ્વઙ્ગી સા તસ્ય પતિતોરસિ ।
વ્યાઘૂર્ણિતાલિનયના સુતરાવ્ ઇવ મઞ્જરી ॥

તૌ દમ્પતી તત્ર વિલાસકાન્તૌ વિલેસતુસ્ તાસુ વનસ્થલીષુ ।
કિઞ્જલ્કગૌરાનિલઘૂર્ણિતાસુ મત્તૌ દ્વિરેફાવ્ ઇવ પદ્મિનીષુ ॥