મોક્ષોપાય · અધ્યાય 3.116

રાજસૂયફલં પ્રાપ્તં લવણેન ખિલ પ્રભો ।
પ્રમાણં કિમ્ ઇવાત્ર સ્યાત્ કલ્પનાજાલશમ્બરે ॥

યદા શામ્બરિકઃ કાલે સમ્પ્રાપ્તો લાવણીં સભામ્ ।
તદાહમ્ અવસં તત્ર તત્ પ્રત્યક્ષેણ દૃષ્ટવાન્ ॥

અહં સભ્યૈસ્ તતસ્ તત્ર ગતે શમ્બરકારિણિ ।
કિમ્ એતદ્ ઇતિ યત્નેન પૃષ્ટશ્ ચ લવણેન ચ ॥

ચિન્તયિત્વા મયા દૃષ્ટ્વા તત્ર યત્ કથિતં તતઃ ।
શૃણુ તત્ તે પ્રવક્ષ્યામિ રામ શામ્બરિકેહિતમ્ ॥

રાજસૂયસ્ય કર્તારો યે હિ તે દ્વાદશાબ્દિકમ્ ।
આપદ્દુઃખં પ્રાપ્નુવન્તિ નાનાકારદશામયમ્ ॥

અતશ્ શક્રેણ ગગનાદ્ દુઃખાય લવણસ્ય સઃ ।
પ્રહિતો દેવદૂતો હિ રામ શામ્બરિકાકૃતિઃ ॥

રાજસૂયક્રિયાકર્તુસ્ તસ્ય દત્ત્વા મહાપદમ્ ।
અગચ્છત્ સ્વનભોમાર્ગં સુરસિદ્ધનિષેવિતમ્ ॥

ભાવરાશિસ્ તથા બોધે સર્વો યાત્ય્ એકપિણ્ડતામ્ ।
વિચિત્રમૃદ્ભાણ્ડગણો યથાપક્વો જલે સ્થિતઃ ॥