મોક્ષોપાય · અધ્યાય 1.3

લાજપુષ્પાઞ્જલિવ્રાતૈર્ વિકીર્ણઃ પૌરવાસિભિઃ ।
સ વિવેશ ગૃહં શ્રીમાઞ્ જયન્તો વિષ્ટપં યથા ॥

પ્રણનામાથ પિતરં વસિષ્ઠં માતૃબાન્ધવાન્ ।
બ્રાહ્મણાન્ ગુરુવૃદ્ધાંશ્ ચ રાઘવઃ પ્રથમાગતઃ ॥

સુહૃદ્ભિર્ માતૃભિશ્ ચૈવ પિત્રા દ્વિજગણેન ચ ।
મુહુરાલિઙ્ગનાચારૈ રાઘવો ન મમૌ તદા ॥

તસ્મિન્ દૃઢૈર્ દાશરથૌ પ્રિયપ્રકથનૈર્ મિથઃ ।
જુઘૂર્ણુર્ મધુરૈર્ આશા મૃદુવંશસ્વનૈર્ ઇવ ॥

બહૂન્ય્ આસ દિનાન્ય્ અત્ર રામાગમનમ્ ઉત્સવઃ ।
મહાનન્દે જનાન્ મુઞ્ચન્ કેલિકોલાહલાકુલઃ ॥

ઉવાસ સ સુખં ગેહે તતઃ પ્રભૃતિ રાઘવઃ ।
વર્ણયન્ વિવિધાચારાન્ દેશાચારાન્ ઇતસ્ તતઃ ॥

પ્રાતર્ ઉત્થાય રામો ઽસૌ કૃત્વા સન્ધ્યાં યથાવિધિ ।
સભાસંસ્થં દદર્શેન્દ્રસમં સ્વપિતરં તદા ॥

કથાભિસ્ સુવિચિત્રાભિસ્ સ વસિષ્ઠાદિભિસ્ સહ ।
સ્થિત્વા દિનચતુર્ભાગં જ્ઞાનગર્ભાભિર્ આદૃતઃ ॥

જગામ પિત્રનુજ્ઞાતો મહત્યા સેનયાવૃતઃ ।
વરાહમહિષાકીર્ણં વનમ્ આખેટકેચ્છયા ॥

તત આગત્ય સદને કૃત્વા સ્નાનાદિકં ક્રમાત્ ।
સમિત્રબાન્ધવો ભુક્ત્વા નિનાય સસુહૃન્ નિશામ્ ॥

એવમ્પ્રાયદિનાચારો ભ્રાતૃભ્યાં સહ રાઘવઃ ।
આગત્ય તીર્થયાત્રાયાસ્ સમુવાસ પિતુર્ ગૃહે ॥

નૃપતિસંવ્યવહારમનોજ્ઞયા સુજનચેતસિ ચન્દ્રિકયા તથા ।
પરિનિનાય દિનાનિ સ ચેષ્ટયા શ્રુતસુધારસપેશલયાનઘઃ ॥