મત્સ્ય પુરાણ · અધ્યાય 85

અતઃ પરં પ્રવક્ષ્યામિ ગુડપર્વતમુત્તમમ્
યત્પ્રદાનાન્નરઃ સ્વર્ગમ્ આપ્નોતિ સુરપૂજિતમ્ ॥

ઉત્તમો દશભિર્ભારૈર્ મધ્યમઃ પઞ્ચભિર્મતઃ
ત્રિભિર્ભારૈઃ કનિષ્ઠઃ સ્યાત્ તદર્ધેનાલ્પવિત્તવાન્ ॥

તદ્વદામન્ત્રણં પૂજાં હેમવૃક્ષસુરાર્ચનમ્
વિષ્કમ્ભપર્વતાંસ્તદ્વત્ સરાંસિ વનદેવતાઃ ॥

હોમજાગરણં તદ્વલ્ લોકપાલાધિવાસનમ્
ધાન્યપર્વતવત્ કુર્યાદ્ ઇમં મન્ત્રમુદીરયેત્ ॥

યથા દેવેષુ વિશ્વાત્મા પ્રવરો ઽયં જનાર્દનઃ
સામવેદસ્તુ વેદાનાં મહાદેવસ્તુ યોગિનામ્ ॥

પ્રણવઃ સર્વમન્ત્રાણાં નારીણાં પાર્વતી યથા
તથા રસાનાં પ્રવરઃ સદૈવેક્ષુરસો મતઃ ॥

મમ તસ્માત્પરાં લક્ષ્મીં ગુડપર્વત દેહિ વૈ
યસ્માત્સૌભાગ્યદાયિન્યા ભ્રાતા ત્વં ગુડપર્વત
નિવાસશ્ચાપિ પાર્વત્યાસ્ તસ્માચ્છાન્તિં પ્રયચ્છ મે ॥

અનેન વિધિના યસ્તુ દદ્યાદ્ગુડમયં ગિરિમ્
પૂજ્યમાનઃ સ ગન્ધર્વૈર્ ગૌરીલોકે મહીયતે ॥

તતઃ કલ્પશતાન્તે તુ સપ્તદ્વીપાધિપો ભવેત્
આયુરારોગ્યસમ્પન્નઃ શત્રુભિશ્ચાપરાજિતઃ ॥