મત્સ્ય પુરાણ · અધ્યાય 84

અથાતઃ સમ્પ્રવક્ષ્યામિ લવણાચલમુત્તમમ્
યત્પ્રદાનાન્નરો લોકાન્ આપ્નોતિ શિવસંયુતાન્ ॥

ઉત્તમઃ ષોડશદ્રોણૈઃ કર્તવ્યો લવણાચલઃ
મધ્યમઃ સ્યાત્તદર્ધેન ચતુર્ભિરધમઃ સ્મૃતઃ ॥

વિત્તહીનો યથાશક્ત્યા દ્રોણાદૂર્ધ્વં તુ કારયેત્
ચતુર્થાંશેન વિષ્કમ્ભ પર્વતાન્કારયેત્પૃથક્ ॥

વિધાનં પૂર્વવત્કુર્યાદ્ બ્રહ્માદીનાં ચ સર્વદા
તદ્વદ્ધેમમયાન્સર્વાંલ્ લોકપાલાન્નિવેશયેત્ ॥

સરાંસિ કામદેવાદીંસ્ તદ્વદત્રાપિ કારયેત્
કુર્યાજ્જાગરણં ચાપિ દાનમન્ત્રાન્નિબોધત ॥

સૌભાગ્યસરઃ સમ્ભૂતો યતો ઽયં લવણો રસઃ
તદ્દાનકર્તૃકત્વેન ત્વં માં પાહિ નગોત્તમ ॥

યસ્માદન્નરસાઃ સર્વે નોત્કટા લવણં વિના
પ્રિયં ચ શિવયોર્નિત્યં તસ્માચ્છાન્તિં પ્રયચ્છ મે ॥

વિષ્ણુદેહસમુદ્ભૂતં યસ્માદારોગ્યવર્ધનમ્
તસ્માત્પર્વતરૂપેણ પાહિ સંસારસાગરાત્ ॥

અનેન વિધિના યસ્તુ દદ્યાલ્લવણપર્વતમ્
ઉમાલોકે વસેત્કલ્પં તતો યાતિ પરાં ગતિમ્ ॥