મત્સ્ય પુરાણ · અધ્યાય 80

અથાન્યામપિ વક્ષ્યામિ શોભનાં શુભસપ્તમીમ્
યામુપોષ્ય નરો રોગ શોકદુઃખૈઃ પ્રમુચ્યતે ॥

પુણ્યેન ચાશ્વયુજે માસિ કૃતસ્નાનજપઃ શુચિઃ
વાચયિત્વા તતો વિપ્રાન્ આરભેચ્છુભસપ્તમીમ્ ॥

કપિલાં પૂજયેદ્ભક્ત્યા ગન્ધમાલ્યાનુલેપનૈઃ
નમામિ સૂર્યસમ્ભૂતામ્ અશેષભુવનાલયામ્
ત્વામહં શુભકલ્યાણ શરીરાં સર્વસિદ્ધયે ॥

અથ કૃત્વા તિલપ્રસ્થં તામ્રપાત્રેણ સંયુતમ્
કાઞ્ચનં વૃષભં તદ્વદ્ ગન્ધમાલ્યગુડાન્વિતૈઃ ॥

ફલૈર્ નાનાવિધૈર્ ભક્ષ્યૈર્ ઘૃતપાયસસંયુતૈઃ
દદ્યાદ્દ્વિકાલવેલાયામ્ અર્યમા પ્રીયતામિતિ ॥

પઞ્ચગવ્યં ચ સંપ્રાશ્ય સ્વપેદ્ભૂમૌ વિમત્સરઃ
તતઃ પ્રભાતે સંજાતે ભક્ત્યા સમ્પૂજયેદ્દ્વિજાન્ ॥

અનેન વિધિના દદ્યાન્ માસિ માસિ સદા નરઃ
વાસસા વૃષભં હૈમં તદ્વદ્ગાં કાઞ્ચનોદ્ભવામ્ ॥

સંવત્સરાન્તે શયનમ્ ઇક્ષુદણ્ડગુડાન્વિતમ્
સોપધાનકવિશ્રામં ભાજનાસનસંયુતમ્ ॥

તામ્રપાત્રે તિલપ્રસ્થં સૌવર્ણં વૃષભં તથા
દદ્યાદ્વેદવિદે સર્વં વિશ્વાત્મા પ્રીયતામિતિ ॥

અનેન વિધિના વિદ્વાન્ કુર્યાદ્યઃ શુભસપ્તમીમ્
તસ્ય શ્રીર્વિપુલા કીર્તિર્ ભવેજ્જન્મનિ જન્મનિ ॥

અપ્સરોગણગન્ધર્વૈઃ પૂજ્યમાનઃ સુરાલયે
વસેદ્ગણાધિપો ભૂત્વા યાવદાભૂતસંપ્લવમ્
કલ્પાદાવવતીર્ણસ્તુ સપ્તદ્વીપાધિપો ભવેત્ ॥

બ્રહ્મહત્યાસહસ્રસ્ય ભ્રૂણહત્યાશતસ્ય ચ
નાશાયાલમિયં પુણ્યા પઠ્યતે શુભસપ્તમી ॥

ઇમાં પઠેદ્યઃ શૃણુયાન્મુહૂર્તં પશ્યેત્પ્રસઙ્ગાદપિ દીયમાનમ્
સો ઽપ્યત્ર સર્વાઘવિમુક્તદેહઃ પ્રાપ્નોતિ વિદ્યાધરનાયકત્વમ્ ॥

યાવત્સમાઃ સપ્ત નરઃ કરોતિ યઃ સપ્તમીં સપ્તવિધાનયુક્તામ્
સ સપ્તલોકાધિપતિઃ ક્રમેણ ભૂત્વા પદં યાતિ પરં મુરારેઃ ॥