મત્સ્ય પુરાણ · અધ્યાય 79

અથાતઃ સમ્પ્રવક્ષ્યામિ સર્વપાપપ્રણાશિનીમ્
સર્વકામપ્રદાં રમ્યાં નામ્ના મન્દારસપ્તમીમ્ ॥

માઘસ્યામલપક્ષે તુ પઞ્ચમ્યાં લઘુભુઙ્નરઃ
દન્તકાષ્ઠં તતઃ કૃત્વા ષષ્ઠીમુપવસેદ્બુધઃ ॥

વિપ્રાન્ સમ્પૂજયિત્વા તુ મન્દારં પ્રાશયેન્નિશિ
તતઃ પ્રભાત ઉત્થાય કૃત્વા સ્નાનં પુનર્દ્વિજાન્ ॥

ભોજયેચ્છક્તિતઃ કૃત્વા મન્દારકુસુમાષ્ટકમ્
સૌવર્ણં પુરુષં તદ્વત્ પદ્મહસ્તં સુશોભનમ્ ॥

પદ્મં કૃષ્ણતિલૈઃ કૃત્વા તામ્રપાત્રે ઽષ્ટપત્ત્રકમ્
હૈમમન્દારકુસુમૈર્ ભાસ્કરાયેતિ પૂર્વતઃ ॥

નમસ્કારેણ તદ્વચ્ચ સૂર્યાયેત્યાનલે દલે
દક્ષિણે તદ્વદર્કાય તથાર્યમ્ણે ચ નૈરૃતે ॥

પશ્ચિમે વેદધામ્ને ચ વાયવ્યે ચણ્ડભાનવે
પૂષ્ણેત્યુત્તરતઃ પૂજ્યમ્ આનન્દાયેત્યતઃ પરમ્ ॥

કર્ણિકાયાં ચ પુરુષં સર્વાત્મન ઇતિ ન્યસેત્
શુક્લવસ્ત્રૈઃ સમાવેષ્ટ્ય ભક્ષ્યૈર્માલ્યફલાદિભિઃ ॥

એવમભ્યર્ચ્ય તત્સર્વં દદ્યાદ્વેદવિદે પુનઃ
ભુઞ્જીતાતૈલલવણં વાગ્યતઃ પ્રાઙ્મુખો ગૃહી ॥

અનેન વિધિના સર્વં સપ્તમ્યાં માસિ માસિ ચ
કુર્યાત્સંવત્સરં યાવદ્ વિત્તશાઠ્યવિવર્જિતઃ ॥

એતદેવ વ્રતાન્તે તુ નિધાય કલશોપરિ
ગોભિર્વિભવતઃ સાર્ધં દાતવ્યં ભૂતિમિચ્છતા ॥

નમો મન્દારનાથાય મન્દારભવનાય ચ
ત્વં રવે તારયસ્વાસ્માન્ સંસારભયસાગરાત્ ॥

અનેન વિધિના યસ્તુ કુર્યાન્મન્દારસપ્તમીમ્
વિપાપ્મા સ સુખી મર્ત્યઃ કલ્પં ચ દિવિ મોદતે ॥

ઇમામઘૌઘપટલ ભીષણધ્વાન્તદીપિકામ્
ગચ્છન્પ્રગૃહ્ય સંસારે સર્વાર્થાંશ્ચ લભેન્નરઃ ॥

મન્દારસપ્તમીમ્ એતામ્ ઈપ્સિતાર્થફલપ્રદામ્
યઃ પઠેચ્છૃણુયાદ્વાપિ સર્વપાપૈઃ પ્રમુચ્યતે ॥