મત્સ્ય પુરાણ · અધ્યાય 8

આદિસર્ગશ્ચ યઃ સૂત કથિતો વિસ્તરેણ તુ
પ્રતિસર્ગશ્ચ યે યેષામ્ અધિપાસ્ તાન્વદસ્વ નઃ ॥

યદાભિષિક્તઃ સકલાધિરાજ્યે પૃથુર્ધરિત્ર્યામધિપો બભૂવ
તદૌષધીનામધિપં ચકાર યજ્ઞવ્રતાનાં તપસાં ચ ચન્દ્રમ્ ॥

નક્ષત્રતારાદ્વિજવૃક્ષગુલ્મ લતાવિતાનસ્ય ચ રુક્મગર્ભઃ
અપામધીશં વરુણં ધનાનાં રાજ્ઞાં પ્રભું વૈશ્રવણં ચ તદ્વત્ ॥

વિષ્ણું રવીણામધિપં વસૂનામ્ અગ્નિં ચ લોકાધિપતિશ્ચકાર
પ્રજાપતીનામધિપં ચ દક્ષં ચકાર શક્રં મરુતામધીશમ્ ॥

દૈત્યાધિપાનામથ દાનવાનાં પ્રહ્લાદમીશં ચ યમં પિતૄણામ્
પિશાચરક્ષઃપશુભૂતયક્ષ વેતાલરાજં ત્વ્ અથ શૂલપાણિમ્ ॥

પ્રાલેયશૈલં ચ પતિં ગિરીણામ્ ઈશં સમુદ્રં સસરિન્નદાનામ્
ગન્ધર્વવિદ્યાધરકિંનરાણામ્ ઈશં પુનશ્ચિત્રરથં ચકાર ॥

નાગાધિપં વાસુકિમુગ્રવીર્યં સર્પાધિપં તક્ષકમાદિદેશ
દિશાં ગજાનામધિપં ચકાર ગજેન્દ્રમૈરાવતનામધેયમ્ ॥

સુપર્ણમીશં પતતામથાશ્વ રાજાનમુચ્ચૈઃશ્રવસં ચકાર
સિંહં મૃગાણાં વૃષભં ગવાં ચ પ્લક્ષં પુનઃ સર્વવનસ્પતીનામ્ ॥

પિતામહઃ પૂર્વમથાભ્યષિઞ્ચચ્ ચૈતાન્પુનઃ સર્વદિશાધિનાથાન્
પૂર્વેણ દિક્પાલમ્ અથાભ્યષિઞ્ચન્ નામ્ના સુધર્માણમ્ અરાતિકેતુમ્ ॥

તતો ઽધિપં દક્ષિણતશ્ચકાર સર્વેશ્વરં શઙ્ખપદાભિધાનમ્
સ કેતુમન્તં ચ દિગીશમીશશ્ ચકાર પશ્ચાદ્ ભુવનાણ્ડગર્ભઃ ॥

હિરણ્યરોમાણમ્ ઉદગ્દિગીશં પ્રજાપતિર્ દેવસુતં ચકાર
અદ્યાપિ કુર્વન્તિ દિશામ્ અધીશાઃ શત્રૂન્ દહન્તસ્તુ ભુવો ઽભિરક્ષામ્ ॥

ચતુર્ભિર્ એભિઃ પૃથુનામધેયો નૃપો ઽભિષિક્તઃ પ્રથમં પૃથિવ્યામ્
ગતે ઽન્તરે ચાક્ષુષનામધેયે વૈવસ્વતાખ્યે ચ પુનઃ પ્રવૃત્તે
પ્રજાપતિઃ સો ઽસ્ય ચરાચરસ્ય બભૂવ સૂર્યાન્વયવંશચિહ્નઃ ॥