મત્સ્ય પુરાણ · અધ્યાય 78

અતઃ પરં પ્રવક્ષ્યામિ તદ્વત્કમલસપ્તમીમ્
યસ્યાઃ સંકીર્તનાદેવ તુષ્યતીહ દિવાકરઃ ॥

વસન્તામલસપ્તમ્યાં સ્નાતઃ સન્ગૌરસર્ષપૈઃ
તિલપાત્રે ચ સૌવર્ણે વિધાય કમલં શુભમ્ ॥

વસ્ત્રયુગ્માવૃતં કૃત્વા ગન્ધપુષ્પૈઃ સમર્ચયેત્
નમઃ કમલહસ્તાય નમસ્તે વિશ્વધારિણે ॥

દિવાકર નમસ્તુભ્યં પ્રભાકર નમો ઽસ્તુ તે
તતો દ્વિકાલવેલાયામ્ ઉદકુમ્ભસમન્વિતામ્ ॥

વિપ્રાય દદ્યાત્સમ્પૂજ્ય વસ્ત્રમાલ્યવિભૂષણૈઃ
શક્ત્યા ચ કપિલાં દદ્યાદ્ અલંકૃત્ય વિધાનતઃ ॥

અહોરાત્રે ગતે પશ્ચાદ્ અષ્ટમ્યાં ભોજયેદ્દ્વિજાન્
યથાશક્ત્યથ ભુઞ્જીત માંસતૈલવિવર્જિતમ્ ॥

અનેન વિધિના શુક્લ સપ્તમ્યાં માસિ માસિ ચ
સર્વં સમાચરેદ્ભક્ત્યા વિત્તશાઠ્યવિવર્જિતઃ ॥

વ્રતાન્તે શયનં દદ્યાત્ સુવર્ણકમલાન્વિતમ્
ગાં ચ દદ્યાત્સ્વશક્ત્યા તુ સુવર્ણાઢ્યાં પયસ્વિનીમ્ ॥

ભાજનાસનદીપાદીન્ દદ્યાદ્ ઇષ્ટાનુપસ્કરાન્
અનેન વિધિના યસ્તુ કુર્યાત્કમલસપ્તમીમ્
લક્ષ્મીમનન્તામભ્યેતિ સૂર્યલોકે મહીયતે ॥

કલ્પે કલ્પે તતો લોકાન્ સપ્તગત્વા પૃથક્પૃથક્
અપ્સરોભિઃ પરિવૃતસ્ તતો યાતિ પરાં ગતિમ્ ॥

યઃ પશ્યતીદં શૃણુયાચ્ચ મર્ત્યઃ પઠેચ્ચ ભક્ત્યાથ મતિં દદાતિ
સો ઽપ્યત્ર લક્ષ્મીમચલામવાપ્ય ગન્ધર્વવિદ્યાધરલોકભાક્સ્યાત્ ॥