મત્સ્ય પુરાણ · અધ્યાય 76

અન્યામપિ પ્રવક્ષ્યામિ નામ્ના તુ ફલસપ્તમીમ્
યામુપોષ્ય નરઃ પાપાદ્ વિમુક્તઃ સ્વર્ગભાગ્ભવેત્ ॥

માર્ગશીર્ષે શુભે માસિ સપ્તમ્યાં નિયતવ્રતઃ
તામુપોષ્યાથ કમલં કારયિત્વા તુ કાઞ્ચનમ્ ॥

શર્કરાસંયુતં દદ્યાદ્ બ્રાહ્મણાય કુટુમ્બિને
રવિં કાઞ્ચનકં કૃત્વા પલસ્યૈકસ્ય ધર્મવિત્
દદ્યાદ્દ્વિકાલવેલાયાં ભાનુર્મે પ્રીયતામિતિ ॥

ભક્ત્યા તુ વિપ્રાન્સમ્પૂજ્ય ચાષ્ટમ્યાં ક્ષીરભોજનમ્
દત્ત્વા કુર્યાત્ફલયુતં યાવત્સ્યાત્કૃષ્ણેસપ્તમી ॥

તામપ્યુપોષ્ય વિધિવદ્ અનેનૈવ ક્રમેણ તુ
તદ્વદ્ધૈમફલં દત્ત્વા સુવર્ણકમલાન્વિતમ્ ॥

શર્કરાપાત્રસંયુક્તં વસ્ત્રમાલ્યસમન્વિતમ્
સંવત્સરં ચ તેનૈવ વિધિનોભયસપ્તમીમ્ ॥

ઉપોષ્ય દત્ત્વા ક્રમશઃ સૂર્યમન્ત્રમુદીરયેત્
ભાનુરર્કો રવિર્બ્રહ્મા સૂર્યઃ શક્રો હરિઃ શિવઃ
શ્રીમાન્વિભાવસુસ્ત્વષ્ટા વરુણઃ પ્રીયતામિતિ ॥

પ્રતિમાસં ચ સપ્તમ્યામ્ એકૈકં નામ કીર્તયેત્
પ્રતિપક્ષં ફલત્યાગમ્ એતત્કુર્વન્સમાચરેત્ ॥

વ્રતાન્તે વિપ્રમિથુનં પૂજયેદ્વસ્ત્રભૂષણૈઃ
શર્કરાકલશં દદ્યાદ્ ધેમપદ્મદલાન્વિતમ્ ॥

યથા ન વિફલાઃ કામાસ્ ત્વદ્ભક્તાનાં સદા રવે
તથાનન્તફલાવાપ્તિર્ અસ્તુ મે સપ્તજન્મસુ ॥

ઇમામનન્તફલદાં યઃ કુર્યાત્ફલસપ્તમીમ્
સર્વપાપવિશુદ્ધાત્મા સૂર્યલોકે મહીયતે ॥

સુરાપાનાદિકં કિંચિદ્ યદત્રામુત્ર વા કૃતમ્
તત્સર્વં નાશમાયાતિ યઃ કુર્યાત્ફલસપ્તમીમ્ ॥

કુર્વાણઃ સપ્તમીં ચેમાં સતતં રોગવર્જિતઃ
ભૂતાન્ભવ્યાંશ્ચ પુરુષાંસ્ તારયેદેકવિંશતિમ્
યઃ શૃણોતિ પઠેદ્વાપિ સો ઽપિ કલ્યાણભાગ્ભવેત્ ॥