મત્સ્ય પુરાણ · અધ્યાય 75

વિશોકસપ્તમીં તદ્વદ્ વક્ષ્યામિ મુનિપુંગવ
યામુપોષ્ય નરઃ શોકં ન કદાચિદિહાશ્નુતે ॥

માઘે કૃષ્ણતિલૈઃ સ્નાત્વા ષષ્ઠ્યાં વૈ શુક્લપક્ષતઃ
કૃતાહારઃ કૃસરયા દન્તધાવનપૂર્વકમ્
ઉપવાસવ્રતં કૃત્વા બ્રહ્મચારી ભવેન્નિશિ ॥

તતઃ પ્રભાત ઉત્થાય કૃતસ્નાનજપઃ શુચિઃ
કૃત્વા તુ કાઞ્ચનં પદ્મમ્ અર્કાયેતિ ચ પૂજયેત્
કરવીરેણ રક્તેન રક્તવસ્ત્રયુગેન ચ ॥

યથા વિશોકં ભુવનં ત્વયૈવાદિત્ય સર્વદા
તથા વિશોકતા મે ઽસ્તુ ત્વદ્ભક્તિઃ પ્રતિજન્મ ચ ॥

એવં સમ્પૂજ્ય ષષ્ઠ્યાં તુ ભક્ત્યા સમ્પૂજયેદ્દ્વિજાન્
સુપ્ત્વા સંપ્રાશ્ય ગોમૂત્રમ્ ઉત્થાય કૃતનૈત્યકઃ ॥

સમ્પૂજ્ય વિપ્રાનન્નેન ગુડપાત્રસમન્વિતમ્
તદ્વસ્ત્રયુગ્મં પદ્મં ચ બ્રાહ્મણાય નિવેદયેત્ ॥

અતૈલલવણં ભુક્ત્વા સપ્તમ્યાં મૌનસંયુતઃ
તતઃ પુરાણશ્રવણં કર્તવ્યં ભૂતિમિચ્છતા ॥

અનેન વિધિના સર્વમ્ ઉભયોરપિ પક્ષયોઃ
કૃત્વા યાવત્પુનર્માઘ શુક્લપક્ષસ્ય સપ્તમી ॥

વ્રતાન્તે કલશં દદ્યાત્ સુવર્ણકમલાન્વિતમ્
શય્યાં સોપસ્કરાં દદ્યાત્ કપિલાં ચ પયસ્વિનીમ્ ॥

અનેન વિધિના યસ્તુ વિત્તશાઠ્યવિવર્જિતઃ
વિશોકસપ્તમીં કુર્યાત્ સ યાતિ પરમાં ગતિમ્ ॥

યાવજ્જન્મસહસ્રાણાં સાગ્રં કોટિશતં ભવેત્
તાવન્ન શોકમભ્યેતિ રોગદૌર્ગત્યવર્જિતઃ ॥

યં યં પ્રાર્થયતે કામં તં તમાપ્નોતિ પુષ્કલમ્
નિષ્કામઃ કુરુતે યસ્તુ સ પરં બ્રહ્મ ગચ્છતિ ॥

યઃ પઠેચ્છૃણુયાદ્વાપિ વિશોકાખ્યાં ચ સપ્તમીમ્
સો ઽપીન્દ્રલોકમાપ્નોતિ ન દુઃખી જાયતે ક્વચિત્ ॥