મત્સ્ય પુરાણ · અધ્યાય 74

ભગવન્ ભવસંસાર સાગરોત્તારકારક
કિંચિદ્વ્રતં સમાચક્ષ્વ સ્વર્ગારોગ્યસુખપ્રદમ્ ॥

સૌરં ધર્મં પ્રવક્ષ્યામિ નામ્ના કલ્યાણસપ્તમીમ્
વિશોકસપ્તમીં તદ્વત્ ફલાઢ્યાં પાપનાશિનીમ્ ॥

શર્કરાસપ્તમીં પુણ્યાં તથા કમલસપ્તમીમ્
મન્દારસપ્તમીં તદ્વચ્ છુભદાં શુભસપ્તમીમ્ ॥

સર્વાનન્તફલાઃ પ્રોક્તાઃ સર્વા દેવર્ષિપૂજિતાઃ
વિધાનમાસાં વક્ષ્યામિ યથાવદનુપૂર્વશઃ ॥

યદા તુ શુક્લસપ્તમ્યામ્ આદિત્યસ્ય દિનં ભવેત્
સા તુ કલ્યાણિની નામ વિજયા ચ નિગદ્યતે ॥

પ્રાતર્ગવ્યેન પયસા સ્નાનમસ્યાં સમાચરેત્
તતઃ શુક્લામ્બરઃ પદ્મમ્ અક્ષતાભિઃ પ્રકલ્પયેત્ ॥

પ્રાઙ્મુખો ઽષ્ટદલં મધ્યે તદ્વદ્વૃત્તાં ચ કર્ણિકામ્
પુષ્પાક્ષતાભિર્દેવેશં વિન્યસેત્સર્વતઃ ક્રમાત્ ॥

પૂર્વેણ તપનાયેતિ માર્તણ્ડાયેતિ ચાનલે
યામ્યે દિવાકરાયેતિ વિધાત્ર ઇતિ નૈરૃતે ॥

પશ્ચિમે વરુણાયેતિ ભાસ્કરાયેતિ ચાનિલે
સૌમ્યે વિકર્તનાયેતિ રવયે ચાષ્ટમે દલે ॥

આદાવન્તે ચ મધ્યે ચ નમો ઽસ્તુ પરમાત્મને
મન્ત્રૈરેભિઃ સમભ્યર્ચ્ય નમસ્કારાન્તદીપિતૈઃ ॥

શુક્લવસ્ત્રૈઃ ફલૈર્ભક્ષ્યૈર્ ધૂપમાલ્યાનુલેપનૈઃ
સ્થણ્ડિલે પૂજયેદ્ભક્ત્યા ગુડેન લવણેન ચ ॥

તતો વ્યાહૃતિમન્ત્રેણ વિસૃજેદ્દ્વિજપુંગવાન્
શક્તિતઃ પૂજયેદ્ભક્ત્યા ગુડક્ષીરઘૃતાદિભિઃ
તિલપાત્રં હિરણ્યં ચ બ્રાહ્મણાય નિવેદયેત્ ॥

એવં નિયમકૃત્સુપ્ત્વા પ્રાતરુત્થાય માનવઃ
કૃતસ્નાનજપો વિપ્રૈઃ સહૈવ ઘૃતપાયસમ્ ॥

ભુક્ત્વા ચ વેદવિદુષે બિડાલવ્રતવર્જિતે
ઘૃતપાત્રં સકનકં સોદકુમ્ભં નિવેદયેત્ ॥

પ્રીયતામત્ર ભગવાન્ પરમાત્મા દિવાકરઃ
અનેન વિધિના સર્વં માસિ માસિ વ્રતં ચરેત્ ॥

તતસ્ત્રયોદશે માસિ ગા વૈ દદ્યાત્ત્રયોદશ
વસ્ત્રાલંકારસંયુક્તાઃ સુવર્ણાસ્યાઃ પયસ્વિનીઃ ॥

એકામપિ પ્રદદ્યાદ્વા વિત્તહીનો વિમત્સરઃ
ન વિત્તશાઠ્યં કુર્વીત યતો મોહાત્પતત્યધઃ ॥

અનેન વિધિના યસ્તુ કુર્યાત્કલ્યાણસપ્તમીમ્
સર્વપાપવિનિર્મુક્તઃ સૂર્યલોકે મહીયતે
આયુરારોગ્યમૈશ્વર્યમ્ અનન્તમિહ જાયતે ॥

સર્વપાપહરા નિત્યં સર્વદૈવતપૂજિતા
સર્વદુષ્ટોપશમની સદા કલ્યાણસપ્તમી ॥

ઇમામનન્તફલદાં યસ્તુ કલ્યાણસપ્તમીમ્
શૃણોતિ પઠતે ચેહ સર્વપાપૈઃ પ્રમુચ્યતે ॥