મત્સ્ય પુરાણ · અધ્યાય 73

અથાતઃ શૃણુ ભૂપાલ પ્રતિશુક્રં પ્રશાન્તયે
યાત્રારમ્ભે ઽવસાને ચ તથા શુક્રોદયે ત્વિહ ॥

રાજતે વાથ સૌવર્ણે કાંસ્યપાત્રે ઽથવા પુનઃ
શુક્લપુષ્પામ્બરયુતે સિતતણ્ડુલપૂરિતે ॥

વિધાય રાજતં શુક્રં શુચિમુક્તાફલાન્વિતમ્
મન્ત્રેણાનેન તત્સર્વં સામગાય નિવેદયેત્ ॥

નમસ્તે સર્વલોકેશ નમસ્તે ભૃગુનન્દન
કવે સર્વાર્થસિદ્ધ્યર્થં ગૃહાણાર્ઘ્યં નમો ઽસ્તુ તે ॥

એવમસ્યોદયે કુર્વન્ યાત્રાદિષુ ચ ભારત
સર્વાન્કામાનવાપ્નોતિ વિષ્ણુલોકે મહીયતે ॥

યાવચ્છુક્રસ્ય ન હૃતા પૂજા સા માલ્યકૈઃ શુભૈઃ
વટકૈઃ પૂરિકાભિશ્ચ ગોધૂમૈશ્ચણકૈરપિ
તાવદન્નં ન ચાશ્નીયાત્ ત્રિભિઃ કામાર્થસિદ્ધયે ॥

તદ્વદ્વાચસ્પતેઃ પૂજાં પ્રવક્ષ્યામિ યુધિષ્ઠિર
સુવર્ણપાત્રે સૌવર્ણમ્ અમરેશપુરોહિતમ્ ॥

પીતપુષ્પામ્બરયુતં કૃત્વા સ્નાત્વાથ સર્ષપૈઃ
પલાશાશ્વત્થયોગેન પઞ્ચગવ્યજલેન ચ ॥

પીતાઙ્ગરાગવસનો ઘૃતહોમં તુ કારયેત્
પ્રણમ્ય ચ ગવા સાર્ધં બ્રાહ્મણાય નિવેદયેત્ ॥

નમસ્તે ઽઙ્ગિરસાં નાથ વાક્પતે ચ બૃહસ્પતે
ક્રૂરગ્રહૈઃ પીડિતાનામ્ અમૃતાય નમો નમઃ ॥

સંક્રાન્તાવસ્ય કૌન્તેય યાત્રાસ્વભ્યુદયેષુ ચ
કુર્વન્બૃહસ્પતેઃ પૂજાં સર્વાન્કામાન્સમશ્નુતે ॥