મત્સ્ય પુરાણ · અધ્યાય 71

મોહાદ્વાપિ મદાદ્વાપિ યઃ પરસ્ત્રીં સમાશ્રયેત્
તસ્યાપિ નિષ્કૃતિં દેવ વદ સર્વકૃપાકર ॥

ભગવન્પુરુષસ્યેહ સ્ત્રિયાશ્ચ વિરહાદિકમ્
શોકવ્યાધિભયં દુઃખં ન ભવેદ્યેન તદ્વદ ॥

શ્રાવણસ્ય દ્વિતીયાયાં કૃષ્ણાયાં મધુસૂદનઃ
ક્ષીરાર્ણવે સપત્નીકઃ સદા વસતિ કેશવઃ ॥

તસ્યાં સમ્પૂજ્ય ગોવિન્દં સર્વાન્કામાન્સમશ્નુતે
ગોભૂહિરણ્યદાનાદિ સપ્તકલ્પશતાનુગમ્ ॥

અશૂન્યશયનં નામ દ્વિતીયા સંપ્રકીર્તિતા
તસ્યાં સમ્પૂજયેદ્વિષ્ણુમ્ એભિર્મન્ત્રૈર્વિધાનતઃ ॥

શ્રીવત્સધારિઞ્છ્રીકાન્ત શ્રીધામઞ્છ્રીપતે ઽવ્યય
ગાર્હસ્થ્યં મા પ્રણાશં મે યાતુ ધર્માર્થકામદમ્ ॥

અગ્નયો મા પ્રણશ્યન્તુ દેવતાઃ પુરુષોત્તમ
પિતરો મા પ્રણશ્યન્તુ માસ્તુ દામ્પત્યભેદનમ્ ॥

લક્ષ્મ્યા વિયુજ્યતે દેવ ન કદાચિદ્યથા ભવાન્
તથા કલત્રસમ્બન્ધો દેવ મા મે વિયુજ્યતામ્ ॥

લક્ષ્મ્યા ન શૂન્યો વરદ શય્યાં ત્વં શયનં ગતઃ
શય્યા મમાપ્યશૂન્યાસ્તુ તથૈવ મધુસૂદન ॥

ગીતવાદિત્રનિર્ઘોષં દેવદેવસ્ય કીર્તયેત્
ઘણ્ટા ભવેદશક્તસ્ય સર્વવાદ્યમયી યતઃ ॥

એવં સમ્પૂજ્ય ગોવિન્દમ્ અશ્નીયાત્તૈલવર્જિતમ્
નક્તમક્ષારલવણં યાવત્તત્સ્યાચ્ચતુષ્ટયમ્ ॥

તતઃ પ્રભાતે સંજાતે લક્ષ્મીપતિસમન્વિતામ્
દીપાન્નભાજનૈર્યુક્તાં શય્યાં દદ્યાદ્વિલક્ષણામ્ ॥

પાદુકોપાનહચ્છત્ત્ર ચામરાસનસંયુતામ્
અભીષ્ટોપસ્કરૈર્યુક્તાં શુક્લપુષ્પામ્બરાવૃતામ્ ॥

સોપધાનકવિશ્રામાં ફલૈર્નાનાવિધૈર્યુતામ્
તથાભરણધાન્યૈશ્ચ યથાશક્ત્યા સમન્વિતામ્ ॥

અવ્યઙ્ગાઙ્ગાય વિપ્રાય વૈષ્ણવાય કુટુમ્બિને
દાતવ્યા વેદવિદુષે ભાવેનાપતિતાય ચ ॥

તત્રોપવિશ્ય દામ્પત્યમ્ અલંકૃત્ય વિધાનતઃ
પત્ન્યાસ્તુ ભાજનં દદ્યાદ્ ભક્ષ્યભોજ્યસમન્વિતમ્ ॥

બ્રાહ્મણસ્યાપિ સૌવર્ણીમ્ ઉપસ્કરસમન્વિતામ્
પ્રતિમાં દેવદેવસ્ય સોદકુમ્ભાં નિવેદયેત્ ॥

એવં યસ્તુ પુમાન્કુર્યાદ્ અશૂન્યશયનં હરેઃ
વિત્તશાઠ્યેન રહિતો નારાયણપરાયણઃ ॥

ન તસ્ય પત્ન્યા વિરહઃ કદાચિદપિ જાયતે
નારી વા વિધવા બ્રહ્મન્ યાવચ્ચન્દ્રાર્કતારકમ્
ન વિરૂપૌ ન શોકાર્તૌ દમ્પતી ભવતઃ ક્વચિત્ ॥

ન પુત્રપશુરત્નાનિ ક્ષયં યાન્તિ પિતામહ
સપ્ત કલ્પસહસ્રાણિ સપ્ત કલ્પશતાનિ ચ
કુર્વન્નશૂન્યશયનં વિષ્ણુલોકે મહીયતે ॥