મત્સ્ય પુરાણ · અધ્યાય 67

ચન્દ્રાદિત્યોપરાગે તુ યત્સ્નાનમભિધીયતે
તદહં શ્રોતુમિચ્છામિ દ્રવ્યમન્ત્રવિધાનવિત્ ॥

યસ્ય રાશિં સમાસાદ્ય ભવેદ્ગ્રહણસમ્પ્લવઃ
તસ્ય સ્નાનં પ્રવક્ષ્યામિ મન્ત્રૌષધવિધાનતઃ ॥

ચન્દ્રોપરાગં સમ્પ્રાપ્ય કૃત્વા બ્રાહ્મણવાચનમ્
સમ્પૂજ્ય ચતુરો વિપ્રાઞ્ શુક્લમાલ્યાનુલેપનૈઃ ॥

પૂર્વમેવોપરાગસ્ય સમાસાદ્યૌષધાદિકમ્
સ્થાપયેચ્ ચતુરઃ કુમ્ભાન્ અવ્રણાન્સાગરાનિતિ ॥

ગજાશ્વરથ્યાવલ્મીક સંગમાદ્ધ્રદગોકુલાત્
રાજદ્વારપ્રદેશાચ્ચ મૃદમાનીય ચાક્ષિપેત્ ॥

પઞ્ચગવ્યં ચ કુમ્ભેષુ શુદ્ધમુક્તાફલાનિ ચ
રોચનાં પદ્મશઙ્ખૌ ચ પઞ્ચરત્નસમન્વિતમ્ ॥

સ્ફટિકં ચન્દનં શ્વેતં તીર્થવારિ સસર્ષપમ્
રાજદન્તં સકુમુદં તથૈવોશીરગુગ્ગુલમ્
એતત્સર્વં વિનિક્ષિપ્ય કુમ્ભેષ્વાવાહયેત્સુરાન્ ॥

સર્વે સમુદ્રાઃ સરિતસ્ તીર્થાનિ જલદા નદાઃ
આયાન્તુ યજમાનસ્ય દુરિતક્ષયકારકાઃ ॥

યો ઽસૌ વજ્રધરો દેવ આદિત્યાનાં પ્રભુર્મતઃ
સહસ્રનયનશ્ચેન્દ્રો ગ્રહપીડાં વ્યપોહતુ ॥

મુખં યઃ સર્વદેવાનાં સપ્તાર્ચિરમિતદ્યુતિઃ
ચન્દ્રોપરાગસમ્ભૂતામ્ અગ્નિઃ પીડાં વ્યપોહતુ ॥

યઃ કર્મસાક્ષી ભૂતાનાં ધર્મો મહિષવાહનઃ
યમશ્ચન્દ્રોપરાગોત્થાં મમ પીડાં વ્યપોહતુ ॥

રક્ષોગણાધિપઃ સાક્ષાત્ પ્રલયાનલસંનિભઃ
ખડ્ગવ્યગ્રો ઽતિભીમશ્ચ રક્ષઃપીડાં વ્યપોહતુ ॥

નાગપાશધરો દેવઃ સાક્ષાન્મકરવાહનઃ
સ જલાધિપતિશ્ ચન્દ્ર ગ્રહપીડાં વ્યપોહતુ ॥

પ્રાણરૂપેણ યો લોકાન્ પાતિ કૃષ્ણમૃગપ્રિયઃ
વાયુશ્ચન્દ્રોપરાગોત્થાં પીડામત્ર વ્યપોહતુ ॥

યો ઽસૌ નિધિપતિર્દેવઃ ખડ્ગશૂલગદાધરઃ
ચન્દ્રોપરાગકલુષં ધનદો મે વ્યપોહતુ ॥

યો ઽસાવિન્દુધરો દેવઃ પિનાકી વૃષવાહનઃ
ચન્દ્રોપરાગજાં પીડાં વિનાશયતુ શંકરઃ ॥

ત્રૈલોક્યે યાનિ ભૂતાનિ સ્થાવરાણિ ચરાણિ ચ
બ્રહ્મવિષ્ણ્વર્કયુક્તાનિ તાનિ પાપં દહન્તુ વૈ ॥

એવમામન્ત્ર્ય તૈઃ કુમ્ભૈર્ અભિષિક્તો ગુણાન્વિતૈઃ
ઋગ્યજુઃસામમન્ત્રૈશ્ચ શુક્લમાલ્યાનુલેપનૈઃ
પૂજયેદ્વસ્ત્રગોદાનૈર્ બ્રાહ્મણાનિષ્ટદેવતાઃ ॥

એતાનેવ તતો મન્ત્રાન્ વિલિખેત્ કરકાન્વિતાન્
વસ્ત્રપટ્ટે ઽથવા પદ્મે પઞ્ચરત્નસમન્વિતાન્ ॥

યજમાનસ્ય શિરસિ નિદધ્યુસ્તે દ્વિજોત્તમાઃ
તતો ઽતિવાહયેદ્વેલામ્ ઉપરાગાનુગામિનીમ્ ॥

પ્રાઙ્મુખઃ પૂજયિત્વા તુ નમસ્યન્નિષ્ટદેવતામ્
ચન્દ્રગ્રહે વિનિર્વૃત્તે કૃતગોદાનમઙ્ગલઃ
કૃતસ્નાનાય તં પટ્ટં બ્રાહ્મણાય નિવેદયેત્ ॥

અનેન વિધિના યસ્તુ ગ્રહસ્નાનં સમાચરેત્
ન તસ્ય ગ્રહપીડા સ્યાન્ ન ચ બન્ધુજનક્ષયઃ ॥

પરમાં સિદ્ધિમાપ્નોતિ પુનરાવૃત્તિદુર્લભામ્
સૂર્યગ્રહે સૂર્યનામ સદા મન્ત્રેષુ કીર્તયેત્ ॥

અધિકાઃ પદ્મરાગાઃ સ્યુઃ કપિલાં ચ સુશોભનામ્
પ્રયચ્છેચ્ચ નિશાં પત્યે ચન્દ્રસૂર્યોપરાગયોઃ ॥

ય ઇદં શૃણુયાન્નિત્યં શ્રાવયેદ્વાપિ માનવઃ
સર્વપાપવિનિર્મુક્તઃ શક્રલોકે મહીયતે ॥