મત્સ્ય પુરાણ · અધ્યાય 66

મધુરા ભારતી કેન વ્રતેન મધુસૂદન
તથૈવ જનસૌભાગ્યમ્ અતિવિદ્યાસુ કૌશલમ્ ॥

અભેદશ્ચાપિ દમ્પત્યોસ્ તથા બન્ધુજનેન ચ
આયુશ્ચ વિપુલં પુંસાં તન્મે કથય માધવ ॥

સમ્યક્પૃષ્ટં ત્વયા રાજઞ્ છૃણુ સારસ્વતં વ્રતમ્
યસ્ય સંકીર્તનાદેવ તુષ્યતીહ સરસ્વતી ॥

યો યદ્ભક્તઃ પુમાન્કુર્યાદ્ એતદ્વ્રતમનુત્તમમ્
તદ્વાસરાદૌ સમ્પૂજ્ય વિપ્રાનેતાન્સમાચરેત્ ॥

અથવાદિત્યવારેણ ગ્રહતારાબલેન ચ
પાયસં ભોજયેદ્વિપ્રાન્ કૃત્વા બ્રાહ્મણવાચનમ્ ॥

શુક્લવસ્ત્રાણિ દત્ત્વા ચ સહિરણ્યાનિ શક્તિતઃ
ગાયત્રીં પૂજયેદ્ભક્ત્યા શુક્લમાલ્યાનુલેપનૈઃ ॥

યથા ન દેવિ ભગવાન્ બ્રહ્મલોકે પિતામહઃ
ત્વાં પરિત્યજ્ય સંતિષ્ઠેત્ તથા ભવ વરપ્રદા ॥

વેદાઃ શાસ્ત્રાણિ સર્વાણિ ગીતનૃત્યાદિકં ચ યત્
ન વિહીનં ત્વયા દેવિ તથા મે સન્તુ સિદ્ધયઃ ॥

લક્ષ્મીર્મેધા ધરા પુષ્ટિર્ ગૌરી તુષ્ટિઃ પ્રભા મતિઃ
એતાભિઃ પાહિ ચાષ્ટાભિસ્ તનુભિર્માં સરસ્વતિ ॥

એવં સમ્પૂજ્ય ગાયત્રીં વીણાક્ષમણિધારિણીમ્
શુક્લપુષ્પાક્ષતૈર્ ભક્ત્યા સકમણ્ડલુપુસ્તકામ્
મૌનવ્રતેન ભુઞ્જીત સાયં પ્રાતસ્તુ ધર્મવિત્ ॥

પઞ્ચમ્યાં પ્રતિપક્ષં ચ પૂજયેદ્બ્રહ્મવાસિનીમ્
તથૈવ તણ્ડુલપ્રસ્થં ઘૃતપાત્રેણ સંયુતમ્
ક્ષીરં દદ્યાદ્ધિરણ્યં ચ ગાયત્રી પ્રીયતામિતિ ॥

સંધ્યાયાં ચ તથા મૌનમ્ એતત્કુર્વન્સમાચરેત્
નાન્તરા ભોજનં કુર્યાદ્ યાવન્માસાસ્ત્રયોદશ ॥

સમાપ્તે તુ વ્રતે કુર્યાદ્ ભોજનં શુક્લતણ્ડુલૈઃ
પૂર્વં સવસ્ત્રયુગ્મં ચ દદ્યાદ્વિપ્રાય ભોજનમ્ ॥

દેવ્યા વિતાનં ઘણ્ટાં ચ સિતનેત્રે પયસ્વિનીમ્
ચન્દનં વસ્ત્રયુગ્મં ચ દદ્યાચ્ચ શિખરં પુનઃ ॥

તથોપદેષ્ટારમપિ ભક્ત્યા સમ્પૂજયેદ્ગુરુમ્
વિત્તશાઠ્યેન રહિતો વસ્ત્રમાલ્યાનુલેપનૈઃ ॥

અનેન વિધિના યસ્તુ કુર્યાત્સારસ્વતં વ્રતમ્
વિદ્યાવાનર્થસંયુક્તો રક્તકણ્ઠશ્ચ જાયતે ॥

સરસ્વત્યાઃ પ્રસાદેન બ્રહ્મલોકે મહીયતે
નારી વા કુરુતે યા તુ સાપિ તત્ફલગામિની ॥

બ્રહ્મલોકે વસેદ્ રાજન્ યાવત્ કલ્પાયુતત્રયમ્ ॥

સારસ્વતં વ્રતં યસ્તુ શૃણુયાદપિ યઃ પઠેત્
વિદ્યાધરપુરે સો ઽપિ વસેત્કલ્પાયુતત્રયમ્ ॥