મત્સ્ય પુરાણ · અધ્યાય 64

તથૈવાન્યાં પ્રવક્ષ્યામિ તૃતીયાં પાપનાશિનીમ્
નામ્ના ચ લોકે વિખ્યાતામ્ આર્દ્રાનન્દકરીમિમામ્ ॥

યદા શુક્લતૃતીયાયામ્ આષાઢર્ક્ષં ભવેત્ક્વચિત્
બ્રહ્મર્ક્ષં વા મૃગર્ક્ષં વા હસ્તો મૂલમથાપિ વા
દર્ભગન્ધોદકૈઃ સ્નાનં તદા સમ્યક્સમાચરેત્ ॥

શુક્લમાલ્યામ્બરધરઃ શુક્લગન્ધાનુલેપનઃ
ભવાનીમર્ચયેદ્ભક્ત્યા શુક્લપુષ્પૈઃ સુગન્ધિભિઃ
મહાદેવેન સહિતામ્ ઉપવિષ્ટાં મહાસને ॥

વાસુદેવ્યૈ નમઃ પાદૌ શંકરાય નમો હરમ્
જઙ્ઘે શોકવિનાશિન્યૈ આનન્દાય નમઃ પ્રભો ॥

રમ્ભાયૈ પૂજયેદૂરૂ શિવાય ચ પિનાકિનઃ
અદિત્યૈ ચ કટિં દેવ્યાઃ શૂલિનઃ શૂલપાણયે ॥

માધવ્યૈ ચ તથા નાભિમ્ અથ શમ્ભોર્ભવાય ચ
સ્તનાવાનન્દકારિણ્યૈ શંકરસ્યેન્દુધારિણે ॥

ઉત્કણ્ઠિન્યૈ નમઃ કણ્ઠં નીલકણ્ઠાય વૈ હરમ્
કરાવુત્પલધારિણ્યૈ રુદ્રાય ચ જગત્પતે
બાહૂ ચ પરિરમ્ભિણ્યૈ ત્રિશૂલાય હરસ્ય ચ ॥

દેવ્યા મુખં વિલાસિન્યૈ વૃષેશાય પુનર્વિભોઃ
સ્મિતં સસ્મેરલીલાયૈ વિશ્વવક્ત્રાય વૈ વિભો ॥

નેત્રે મદનવાસિન્યૈ વિશ્વધામ્ને ત્રિશૂલિનઃ
ભ્રુવૌ નૃત્યપ્રિયાયૈ તુ તાણ્ડવેશાય શૂલિનઃ ॥

દેવ્યા લલાટમિન્દ્રાણ્યૈ હવ્યવાહાય વૈ વિભોઃ
સ્વાહાયૈ મુકુટં દેવ્યા વિભોર્ગઙ્ગાધરાય વૈ ॥

વિશ્વકાયૌ વિશ્વમુખૌ વિશ્વપાદકરૌ શિવૌ
પ્રસન્નવદનૌ વન્દે પાર્વતીપરમેશ્વરૌ ॥

એવં સમ્પૂજ્ય વિધિવદ્ અગ્રતઃ શિવયોઃ પુનઃ
પદ્મોત્પલાનિ રજસા નાનાવર્ણેન કારયેત્ ॥

શઙ્ખચક્રે સકટકે સ્વસ્તિકાઙ્કુશચામરાન્
યાવન્તઃ પાંસવસ્તત્ર રજસઃ પતિતા ભુવિ
તાવદ્વર્ષસહસ્રાણિ શિવલોકે મહીયતે ॥

ચત્વારિ ઘૃતપાત્રાણિ સહિરણ્યાનિ શક્તિતઃ
દત્ત્વા દ્વિજાય કરકમ્ ઉદકાન્નસમન્વિતમ્
પ્રતિપક્ષં ચતુર્માસં યાવદેતન્નિવેદયેત્ ॥

તતસ્તુ ચતુરો માસાન્ પૂર્વવત્કરકોપરિ
ચત્વારિ સક્તુપાત્રાણિ તિલપાત્રાણ્યતઃ પરમ્ ॥

ગન્ધોદકં પુષ્પવારિ ચન્દનં કુઙ્કુમોદકમ્
અપક્વં દધિ દુગ્ધં ચ ગોશૃઙ્ગોદકમેવ ચ ॥

પિષ્ટોદકં તથા વારિ કુષ્ઠચૂર્ણાન્વિતં પુનઃ
ઉશીરસલિલં તદ્વદ્ યવચૂર્ણોદકં પુનઃ ॥

તિલોદકં ચ સંપ્રાશ્ય સ્વપેન્માર્ગશિરાદિષુ
માસેષુ પક્ષદ્વિતયં પ્રાશનં સમુદાહૃતમ્ ॥

સર્વત્ર શુક્લપુષ્પાણિ પ્રશસ્તાનિ સદાર્ચને
દાનકાલે ચ સર્વત્ર મન્ત્રમેતમુદીરયેત્ ॥

ગૌરી મે પ્રીયતાં નિત્યમ્ અઘનાશાય મઙ્ગલા
સૌભાગ્યાયાસ્તુ લલિતા ભવાની સર્વસિદ્ધયે ॥

સંવત્સરાન્તે લવણં ગુડકુમ્ભં ચ સર્જિકામ્
ચન્દનં નેત્રપટ્ટં ચ સહિરણ્યામ્બુજેન તુ ॥

ઉમામહેશ્વરં હૈમં તદ્વદિક્ષુફલૈર્યુતમ્
સતૂલાવરણાં શય્યાં સવિશ્રામાં નિવેદયેત્
સપત્નીકાય વિપ્રાય ગૌરી મે પ્રીયતામિતિ ॥

આર્દ્રાનન્દકરી નામ્ના તૃતીયૈષા સનાતની
યામુપોષ્ય નરો યાતિ શમ્ભોર્યત્પરમં પદમ્ ॥

ઇહ લોકે સદાનન્દમ્ આપ્નોતિ ધનસમ્પદઃ
આયુરારોગ્યસમ્પત્ત્યા ન કશ્ચિચ્છોકમાપ્નુયાત્ ॥

નારી વા કુરુતે યા તુ કુમારી વિધવા ચ યા
સાપિ તત્ફલમાપ્નોતિ દેવ્યનુગ્રહલાલિતા ॥

પ્રતિપક્ષમુપોષ્યૈવં મન્ત્રાર્ચનવિધાનવિત્
રુદ્રાણીલોકમભ્યેતિ પુનરાવૃત્તિદુર્લભમ્ ॥

ય ઇદં શૃણુયાન્નિત્યં શ્રાવયેદ્વાપિ માનવઃ
શક્રલોકે સ ગન્ધર્વૈઃ પૂજ્યતે ઽપિ યુગત્રયમ્ ॥

આનન્દદાં સકલદુઃખહરાં તૃતીયાં યા સ્ત્રી કરોત્યવિધવા વિધવાથ વાપિ
સા સ્વે ગૃહે સુખશતાન્યનુભૂય ભૂયો ગૌરીપદં સદયિતા દયિતા પ્રયાતિ ॥