મત્સ્ય પુરાણ · અધ્યાય 63

અથાન્યામપિ વક્ષ્યામિ તૃતીયાં પાપનાશિનીમ્
રસકલ્યાણિનીમેતાં પુરાકલ્પવિદો વિદુઃ ॥

માઘમાસે તુ સમ્પ્રાપ્તે તૃતીયાં શુક્લપક્ષતઃ
પ્રાતર્ગવ્યેન પયસા તિલૈઃ સ્નાનં સમાચરેત્ ॥

સ્નાપયેન્મધુના દેવીં તથૈવેક્ષુરસેન ચ
ગન્ધોદકેન તુ પુનર્ લેપયેત્કુઙ્કુમેન તુ
દક્ષિણાઙ્ગાનિ સમ્પૂજ્ય તતો વામાનિ પૂજયેત્ ॥

લલિતાયૈ નમો દેવ્યાઃ પાદૌ ગુલ્ફૌ તતો ઽર્ચયેત્
જઙ્ઘાં જાનું તથા શાન્ત્યૈ તથૈવોરું શ્રિયૈ નમઃ ॥

મદાલસાયૈ તુ કટિમ્ અમલાયૈ તથોદરમ્
સ્તનૌ મદનવાસિન્યૈ કુમુદાયૈ ચ કન્દરામ્ ॥

ભુજં ભુજાગ્રં માધવ્યૈ કમલાયૈ મુખસ્મિતે
ભૂલલાટં ચ રુદ્રાણ્યૈ શંકરાયૈ તથાલકાન્ ॥

મુકુટં વિશ્વવાસિન્યૈ શિરઃ કાન્ત્યૈ તથાર્ચયેત્
મદનાયૈ લલાટં તુ મોહનાયૈ પુનર્ભ્રુવૌ ॥

નેત્રે ચન્દ્રાર્ધધારિણ્યૈ તુષ્ટ્યૈ ચ વદનં પુનઃ
ઉત્કણ્ઠિન્યૈ નમઃ કણ્ઠમ્ અમૃતાયૈ નમઃ સ્તનૌ ॥

રમ્ભાયૈ વામકુક્ષિં ચ વિશોકાયૈ નમઃ કટિમ્
હૃદયં મન્મથાધિષ્ણ્યૈ પાટલાયૈ તથોદરમ્ ॥

કટિં સુરતવાસિન્યૈ તથોરું ચમ્પકપ્રિયે
જાનુજઙ્ઘે નમો ગૌર્યૈ ગાયત્ર્યૈ ઘુટિકે નમઃ ॥

ધરાધરાયૈ પાદૌ તુ વિશ્વકાયૈ નમઃ શિરઃ
નમો ભવાન્યૈ કામિન્યૈ કામદેવ્યૈ જગત્પ્રિયે ॥

આનન્દાયૈ સુનન્દાયૈ સુભદ્રાયૈ નમો નમઃ
એવં સમ્પૂજ્ય વિધિવદ્ દ્વિજદામ્પત્યમ્ અર્ચયેત્
ભોજયિત્વાન્નપાનેન મધુરેણ વિમત્સરઃ ॥

જલપૂરિતં તથા કુમ્ભં શુક્લામ્બરયુગદ્વયમ્
દત્ત્વા સુવર્ણકમલં ગન્ધમાલ્યૈઃ સમર્ચયેત્ ॥

પ્રીયતામત્ર કુમુદા ગૃહ્ણીયાલ્લવણવ્રતમ્
અનેન વિધિના દેવી માસિ માસિ સદાર્ચયેત્ ॥

લવણં વર્જયેન્માઘે ફાલ્ગુને ચ ગુડં પુનઃ
તૈલં રાજિં તથા ચૈત્રે વર્જ્યં ચ મધુ માધવે ॥

પાનકં જ્યેષ્ઠમાસે તુ આષાઢે ચાથ જીરકમ્
શ્રાવણે વર્જયેત્ક્ષીરં દધિ ભાદ્રપદે તથા ॥

ઘૃતમાશ્વયુજે તદ્વદ્ ઊર્જે વર્જ્યં ચ માક્ષિકમ્
ધાન્યકં માર્ગશીર્ષે તુ પૌષે વર્જ્યા ચ શર્કરા ॥

વ્રતાન્તે કરકં પૂર્ણમ્ એતેષાં માસિ માસિ ચ
દદ્યાદ્દ્વિકાલવેલાયાં પૂર્ણપાત્રેણ સંયુતમ્ ॥

લડ્ડુકાઞ્છ્વેતવર્ણાંશ્ચ સંયાવમથ પૂરિકાઃ
ઘારિકાન્ અપ્યપૂપાંશ્ચ પિષ્ટાપૂપાંશ્ચ મણ્ડકાન્ ॥

ક્ષીરં શાકં ચ દધ્યન્નમ્ ઇણ્ડર્યો ઽશોકવર્તિકાઃ
માઘાદિક્રમશો દદ્યાદ્ એતાનિ કરકોપરિ ॥

કુમુદા માધવી ગૌરી રમ્ભા ભદ્રા જયા શિવા
ઉમા રતિઃ સતી તદ્વન્ મઙ્ગલા રતિલાલસા ॥

ક્રમાન્માઘાદિ સર્વત્ર પ્રીયતામિતિ કીર્તયેત્
સર્વત્ર પઞ્ચગવ્યેન પ્રાશનં સમુદાહૃતમ્
ઉપવાસી ભવેન્નિત્યમ્ અશક્તે નક્તમિષ્યતે ॥

પુનર્માઘે તુ સમ્પ્રાપ્તે શર્કરાં કરકોપરિ
કૃત્વા તુ કાઞ્ચનીં ગૌરીં પઞ્ચરત્નસમન્વિતામ્ ॥

હૈમીમઙ્ગુષ્ઠમાત્રાં ચ સાક્ષસૂત્રકમણ્ડલુમ્
ચતુર્ભુજામિન્દુયુતાં સિતનેત્રપટાવૃતામ્ ॥

તદ્વદ્ગોમિથુનં શુક્લં સુવર્ણાસ્યં સિતામ્બરમ્
સવસ્ત્રભાજનં દદ્યાદ્ ભવાની પ્રીયતામિતિ ॥

અનેન વિધિના યસ્તુ રસકલ્યાણિનીવ્રતમ્
કુર્યાત્સ સર્વપાપેભ્યસ્ તત્ક્ષણાદેવ મુચ્યતે ॥

નવાર્બુદસહસ્રં તુ ન દુઃખી જાયતે નરઃ
સુવર્ણકમલં ગૌરિ માસિ માસિ દદન્નરઃ
અગ્નિષ્ટોમસહસ્રસ્ય યત્ફલં તદવાપ્નુયાત્ ॥

નારી વા કુરુતે યા તુ કુમારી વા વરાનને
વિધવા યા તથા નારી સાપિ તત્ફલમાપ્નુયાત્
સૌભાગ્યારોગ્યસમ્પન્ના ગૌરીલોકે મહીયતે ॥

ઇતિ પઠતિ શૃણોતિ શ્રાવયેદ્યઃ પ્રસઙ્ગાત્ કલિકલુષવિમુક્તઃ પાર્વતીલોકમેતિ
મતિમપિ ચ નરાણાં યો દદાતિ પ્રિયાર્થં વિબુધપતિવિમાને નાયકઃ સ્યાદમોઘઃ ॥