મત્સ્ય પુરાણ · અધ્યાય 62

સૌભાગ્યારોગ્યફલદમ્ અમુત્રાક્ષય્યકારકમ્
ભુક્તિમુક્તિપ્રદં દેવ તન્મે બ્રૂહિ જનાર્દન ॥

યદુમાયાઃ પુરા દેવ ઉવાચ પુરસૂદનઃ
કૈલાસશિખરાસીનો દેવ્યા પૃષ્ટસ્તદા કિલ ॥

કથાસુ સમ્પ્રવૃત્તાસુ ધર્મ્યાસુ લલિતાસુ ચ
તદિદાનીં પ્રવક્ષ્યામિ ભુક્તિમુક્તિફલપ્રદમ્ ॥

શૃણુષ્વાવહિતા દેવિ તથૈવાનન્તપુણ્યકૃત્
નરાણામથ નારીણામ્ આરાધનમનુત્તમમ્ ॥

નભસ્યે વાથ વૈશાખે પુણ્યમાર્ગશિરસ્ય ચ
શુક્લપક્ષે તૃતીયાયાં સુસ્નાતો ગૌરસર્ષપૈઃ ॥

ગોરોચનં સગોમૂત્રમ્ ઉષ્ણં ગોશકૃતં તથા
દધિચન્દનસમ્મિશ્રં લલાટે તિલકં ન્યસેત્
સૌભાગ્યારોગ્યદં યસ્માત્ સદા ચ લલિતાપ્રિયમ્ ॥

પ્રતિપક્ષં તૃતીયાસુ પુમાનાપીતવાસસી
ધારયેદથ રક્તાનિ નારી ચેદથ સંયતા ॥

વિધવા ધાતુરક્તાનિ કુમારી શુક્લવાસસી
દેવીં તુ પઞ્ચગવ્યેન તતઃ ક્ષીરેણ કેવલમ્
સ્નાપયેન્મધુના તદ્વત્ પુષ્પગન્ધોદકેન ચ ॥

પૂજયેચ્છુક્લપુષ્પૈશ્ચ ફલૈર્નાનાવિધૈરપિ
ધાન્યકાજાજિલવણૈર્ ગુડક્ષીરઘૃતાન્વિતૈઃ ॥

શુક્લાક્ષતતિલૈરર્ચ્યાં તતો દેવીં સદાર્ચયેત્
પાદાદ્યભ્યર્ચનં કુર્યાત્ પ્રતિપક્ષં વરાનને ॥

વરદાયૈ નમઃ પાદૌ તથા ગુલ્ફૌ નમઃ શ્રિયૈ
અશોકાયૈ નમો જઙ્ઘે પાર્વત્યૈ જાનુની તથા ॥

ઊરૂ મઙ્ગલકારિણ્યૈ વામદેવ્યૈ તથા કટિમ્
પદ્મોદરાયૈ જઠરમ્ ઉરઃ કામશ્રિયૈ નમઃ ॥

કરૌ સૌભાગ્યદાયિન્યૈ બાહૂ હરમુખશ્રિયૈ
મુખં દર્પણવાસિન્યૈ સ્મરદાયૈ સ્મિતં નમઃ ॥

ગૌર્યૈ નમસ્તથા નાસામ્ ઉત્પલાયૈ ચ લોચને
તુષ્ટ્યૈ લલાટમલકાન્ કાત્યાયન્યૈ શિરસ્તથા ॥

નમો ગૌર્યૈ નમો ધિષ્ણ્યૈ નમઃ કાન્ત્યૈ નમઃ શ્રિયૈ
રમ્ભાયૈ લલિતાયૈ ચ વાસુદેવ્યૈ નમો નમઃ ॥

એવં સમ્પૂજ્ય વિધિવદ્ અગ્રતઃ પદ્મમાલિખેત્
પત્ત્રૈર્દ્વાદશભિર્યુક્તં કુઙ્કુમેન સકર્ણિકમ્ ॥

પૂર્વેણ વિન્યસેદ્ગૌરીમ્ અપર્ણાં ચ તતઃ પરમ્
ભવાનીં દક્ષિણે તદ્વદ્ રુદ્રાણીં ચ તતઃ પરમ્ ॥

વિન્યસેત્પશ્ચિમે સૌમ્યાં સદા મદનવાસિનીમ્
વાયવ્યે પાટલામુગ્રામ્ અન્તરેણ તતો ઽપ્યુમામ્ ॥

મધ્યે યથાસ્વં માંસાઙ્ગાં મઙ્ગલાં કુમુદાં સતીમ્
રુદ્રં ચ મધ્યે સંસ્થાપ્ય લલિતાં કર્ણિકોપરિ
કુસુમૈરક્ષતૈર્વાર્ભિર્ નમસ્કારેણ વિન્યસેત્ ॥

ગીતમઙ્ગલનિર્ઘોષાન્ કારયિત્વા સુવાસિનીઃ
પૂજયેદ્રક્તવાસોભી રક્તમાલ્યાનુલેપનૈઃ
સિન્દૂરં સ્નાનચૂર્ણં ચ તાસાં શિરસિ પાતયેત્ ॥

સિન્દૂરકુઙ્કુમસ્નાનમ્ અતીવેષ્ટતમં યતઃ
તથોપદેષ્ટારમપિ પૂજયેદ્યત્નતો ગુરુમ્
ન પૂજ્યતે ગુરુર્યત્ર સર્વાસ્તત્રાફલાઃ ક્રિયાઃ ॥

નભસ્યે પૂજયેદ્ગૌરીમ્ ઉત્પલૈરસિતૈઃ સદા
બન્ધુજીવૈરાશ્વયુજે કાર્ત્તિકે શતપત્ત્રકૈઃ ॥

જાતીપુષ્પૈર્માર્ગશીર્ષે પૌષે પીતૈઃ કુરણ્ટકૈઃ
કુન્દકુઙ્કુમપુષ્પૈસ્તુ દેવીં માઘે તુ પૂજયેત્
સિન્દુવારેણ જાત્યા વા ફાલ્ગુને ઽપ્યર્ચયેદુમામ્ ॥

ચૈત્રે તુ મલ્લિકાશોકૈર્ વૈશાખે ગન્ધપાટલૈઃ
જ્યેષ્ઠે કમલમન્દારૈર્ આષાઢે ચ નવામ્બુજૈઃ
કદમ્બૈરથ માલત્યા શ્રાવણે પૂજયેત્સદા ॥

ગોમૂત્રં ગોમયં ક્ષીરં દધિ સર્પિઃ કુશોદકમ્
બિલ્વપત્ત્રાર્કપુષ્પં ચ યવાન્ગોશૃઙ્ગવારિ ચ ॥

પઞ્ચગવ્યં ચ બિલ્વં ચ પ્રાશયેત્ક્રમશસ્તદા
એતદ્ભાદ્રપદાદ્યં તુ પ્રાશનં સમુદાહૃતમ્ ॥

પ્રતિપક્ષં ચ મિથુનં તૃતીયાયાં વરાનને
પૂજયિત્વાર્ચયેદ્ભક્ત્યા વસ્ત્રમાલ્યાનુલેપનૈઃ ॥

પુંસઃ પીતામ્બરે દદ્યાત્ સ્ત્રિયૈ કૌસુમ્ભવાસસી
નિષ્પાવાજાજિલવણમ્ ઇક્ષુદણ્ડગુડાન્વિતમ્
તસ્યૈ દદ્યાત્ફલં પુષ્પં સુવર્ણોત્પલસંયુતમ્ ॥

યથા ન દેવિ દેવેશસ્ ત્વાં પરિત્યજ્ય ગચ્છતિ
તથા મામ્ ઉદ્ધરાશેષ દુઃખસંસારસાગરાત્ ॥

કુમુદા વિમલાનન્તા ભવાની ચ સુધા શિવા
લલિતા કમલા ગૌરી સતી રમ્ભાથ પાર્વતી ॥

નભસ્યાદિષુ માસેષુ પ્રીયતામિત્યુદીરયેત્
વ્રતાન્તે શયનં દદ્યાત્ સુવર્ણકમલાન્વિતમ્ ॥

મિથુનાનિ ચતુર્વિંશદ્ દશ દ્વો ચ સમર્ચયેત્
અષ્ટૌ ષડ્વાપ્યથ પુનશ્ ચાનુમાસં સમર્ચયેત્ ॥

પૂર્વં દત્ત્વા તુ ગુરવે શેષાનપ્યર્ચયેદ્બુધઃ
ઉક્તાનન્તતૃતીયૈષા સદાનન્તફલપ્રદા ॥

સર્વપાપહરાં દેવિ સૌભાગ્યારોગ્યવર્ધિનીમ્
ન ચૈનાં વિત્તશાઠ્યેન કદાચિદપિ લઙ્ઘયેત્
નરો વા યદિ વા નારી વિત્તશાઠ્યાત્ પતત્યધઃ ॥

ગર્ભિણી સૂતિકા નક્તં કુમારી વાથ રોગિણી
યદ્યશુદ્ધા તદાન્યેન વારયેત્પ્રયતા સ્વયમ્ ॥

ઇમામનન્તફલદાં યસ્તૃતીયાં સમાચરેત્
કલ્પકોટિશતં સાગ્રં શિવલોકે મહીયતે ॥

વિત્તહીનો ઽપિ કુરુતે વર્ષત્રયમુપોષણૈઃ
પુષ્પમન્ત્રવિધાનેન સો ઽપિ તત્ફલમાપ્નુયાત્ ॥

નારી વા કુરુતે યા તુ કુમારી વિધવાથવા
સાપિ તત્ફલમાપ્નોતિ ગૌર્યનુગ્રહલાલિતા ॥

ઇતિ પઠતિ શૃણોતિ વા ય ઇત્થં ગિરિતનયાવ્રતમ્ ઇન્દ્રવાસસંસ્થઃ
મતિમપિ ચ દદાતિ સો ઽપિ દેવૈર્ અમરવધૂજનકિંનરૈશ્ચ પૂજ્યઃ ॥