મત્સ્ય પુરાણ · અધ્યાય 46

ઐક્ષ્વાકી સુષુવે શૂરં ખ્યાતમદ્ભુતમીઢુષમ્
પૌરુષાજ્જજ્ઞિરે શૂરાદ્ ભોજાયાં પુત્રકા દશ ॥

વસુદેવો મહાબાહુઃ પૂર્વમાનકદુન્દુભિઃ
દેવમાર્ગસ્તતો જજ્ઞે તતો દેવશ્રવાઃ પુનઃ ॥

અનાધૃષ્ટિઃ શિનિશ્ચૈવ નન્દશ્ચૈવ સસૃઞ્જયઃ
શ્યામઃ શમીકઃ સંયૂપઃ પઞ્ચ ચાસ્ય વરાઙ્ગનાઃ ॥

શ્રુતકીર્તિઃ પૃથા ચૈવ શ્રુતાદેવી શ્રુતશ્રવાઃ
રાજાધિદેવી ચ તથા પઞ્ચૈતા વીરમાતરઃ ॥

કૃતસ્ય તુ શ્રુતાદેવી સુગ્રીવં સુષુવે સુતમ્
કૈકેય્યાં શ્રુતકીર્ત્યાં તુ જજ્ઞે સો ઽનુવ્રતો નૃપઃ ॥

શ્રુતશ્રવસિ ચૈદ્યસ્ય સુનીથઃ સમપદ્યત
બહુશો ધર્મચારી સ સંબભૂવારિમર્દનઃ ॥

અથ સખ્યેન વૃદ્ધે ઽસૌ કુન્તિભોજે સુતાં દદૌ
એવં કુન્તી સમાખ્યાતા વસુદેવસ્વસા પૃથા ॥

વસુદેવેન સા દત્તા પાણ્ડોર્ભાર્યા હ્ય્ અનિન્દિતા
પાણ્ડોરર્થેન સા જજ્ઞે દેવપુત્રાન્ મહારથાન્ ॥

ધર્માદ્યુધિષ્ઠિરો જજ્ઞે વાયોર્જજ્ઞે વૃકાદેરઃ
ઇન્દ્રાદ્ધનંજયશ્ ચૈવ શક્રતુલ્યપરાક્રમઃ ॥

માદ્રવત્યાં તુ જનિતાવ્ અશ્વિભ્યાભિતિ શુશ્રુમ
નકુલઃ સહદેવશ્ચ રૂપશીલગુણાન્વિતૌ ॥

રોહિણી પૌરવી નામ ભાર્યા હ્ય્ આનકદુન્દુભેઃ
લેભે જ્યેષ્ઠં સુતં રામં સારણં ચ સુતં પ્રિયમ્ ॥

દુર્દમં દમનં સુભ્રું પિણ્ડારકમહાહનૂ
ચિત્રાક્ષ્યૌ દ્વે કુમાર્યૌ તુ રોહિણ્યાં જજ્ઞિરે તદા ॥

દેવક્યાં જજ્ઞિરે શૌરેઃ સુષેણઃ કીર્તિમાનપિ
ઉદાસી ભદ્રસેનશ્ચ ઋષિવાસસ્તથૈવ ચ
ષષ્ઠો ભદ્રવિદેહશ્ચ કંસઃ સર્વાનઘાતયત્ ॥

પ્રથમા યા અમાવાસ્યા વાર્ષિકી તુ ભવિષ્યતિ
તસ્યાં જજ્ઞે મહાબાહુઃ પૂર્વં કૃષ્ણઃ પ્રજાપતિઃ ॥

અનુજા ત્વ્ અભવત્કૃષ્ણા સુભદ્રા ભદ્રભાષિણી
દેવક્યાં તુ મહાતેજા જજ્ઞે શૂરો મહાયશાઃ ॥

સહદેવસ્તુ તામ્રાયાં જજ્ઞે શૌરિઃ કુલોદ્વહઃ
ઉપાસઙ્ગધરં લેભે તનયં દેવરક્ષિતા
એકાં કન્યાં ચ સુભગાં કંસસ્તામ્ અભ્યઘાતયત્ ॥

વિજયં રોચમાનં ચ વર્ધમાનં તુ દેવલમ્
એતે સર્વે મહાત્માનો હ્ય્ ઉપદેવ્યાં પ્રજજ્ઞિરે ॥

અવગાહો મહાત્મા ચ વૃકદેવ્યામજાયત
વૃકદેવ્યાં સ્વયં જજ્ઞે નન્દકો નામ નામતઃ ॥

સપ્તમં દેવકીપુત્રં મદનં સુષુવે નૃપ
ગવેષણં મહાભાગં સંગ્રામેષ્વપરાજિતમ્ ॥

શ્રદ્ધાદેવ્યા વિહારે તુ વને હિ વિચરન્પુરા
વૈશ્યાયામદધાચ્છૌરિઃ પુત્રં કૌશિકમગ્રજમ્ ॥

સુતનૂ રથરાજી ચ શૌરેરાસ્તાં પરિગ્રહૌ
પુણ્ડ્રશ્ચ કપિલશ્ચૈવ વસુદેવાત્મજૌ બલૌ ॥

જરા નામ નિષાદો ઽભૂત્ પ્રથમઃ સ ધનુર્ધરઃ
સૌભદ્રશ્ચ ભવશ્ચૈવ મહાસત્ત્વૌ બભૂવતુઃ ॥

દેવભાગસુતશ્ચાપિ નામ્નાસાવ્ ઉદ્ધવઃ સ્મૃતઃ
પણ્ડિતં પ્રથમં પ્રાહુર્ દેવશ્રવઃસમુદ્ભવમ્ ॥

ઐક્ષ્વાક્યલભતાપત્યમ્ અનાધૃષ્ટેર્યશસ્વિની
નિધૂતસત્ત્વં શત્રુઘ્નં શ્રાદ્ધસ્તસ્માદજાયત ॥

કરૂષાયાનપત્યાય કૃષ્ણસ્તુષ્ટઃ સુતં દદૌ
સુચન્દ્રં તુ મહાભાગં વીર્યવન્તં મહાબલમ્ ॥

જામ્બવત્યાઃ સુતાવ્ એતૌ દ્વૌ ચ સત્કૃતલક્ષણૌ
ચારુદેષ્ણશ્ચ સામ્બશ્ચ વીર્યવન્તૌ મહાબલૌ ॥

તન્તિપાલશ્ચ તન્તિશ્ચ નન્દનસ્ય સુતાવ્ ઉભૌ
શમીકપુત્રાશ્ ચત્વારો વિક્રાન્તાઃ સુમહાબલાઃ
વિરાજશ્ચ ધનુશ્ચૈવ શ્યામશ્ચ સૃઞ્જયસ્તથા ॥

અનપત્યો ઽભવચ્છ્યામઃ શમીકસ્તુ વનં યયૌ
જુગુપ્સમાનો ભોજત્વં રાજર્ષિત્વમવાપ્તવાન્ ॥

કૃષ્ણસ્ય જન્માભ્યુદયં યઃ કીર્તયતિ નિત્યશઃ
શૃણોતિ માનવો નિત્યં સર્વપાપૈઃ પ્રમુચ્યતે ॥