મત્સ્ય પુરાણ · અધ્યાય 35

એવં સ નાહુષો રાજા યયાતિઃ પુત્રમીપ્સિતમ્
રાજ્યે ઽભિષિચ્ય મુદિતો વાનપ્રસ્થો ઽભવન્મુનિઃ ॥

ઉષિત્વા વનવાસં સ બ્રાહ્મણૈઃ સહ સંશ્રિતઃ
ફલમૂલાશનો દાન્તો યથા સ્વર્ગમિતો ગતઃ ॥

સ ગતઃ સ્વર્ગવાસં તુ ન્યવસન્મુદિતઃ સુખી
કાલસ્ય નાતિમહતઃ પુનઃ શક્રેણ પાતિતઃ ॥

વિવશઃ પ્રચ્યુતઃ સ્વર્ગાદ્ અપ્રાપ્તો મેદિનીતલમ્
સ્થિતશ્ચાસીદ્ અન્તરિક્ષે સ તદેતિ શ્રુતં મયા ॥

તત એવ પુનશ્ચાપિ ગતઃ સ્વર્ગમિતિ શ્રુતિઃ
રાજ્ઞા વસુમતા સાર્ધમ્ અષ્ટકેન ચ વીર્યવાન્
પ્રતર્દનેન શિબિના સમેત્ય કિલ સંસદિ ॥

કર્મણા કેન સ દિવં પુનઃ પ્રાપ્તો મહીપતિઃ
કથમિન્દ્રેણ ભગવન્ પાતિતો મેદિનીતલે ॥

સર્વમેતદ્ અશેષેણ શ્રોતુમિચ્છામિ તત્ત્વતઃ
કથ્યમાનં ત્વયા વિપ્ર દેવર્ષિગણસંનિધૌ ॥

દેવરાજસમો હ્ય્ આસીદ્ યયાતિઃ પૃથિવીપતિઃ
વર્ધનઃ કુરુવંશસ્ય વિભાવસુસમદ્યુતિઃ ॥

તસ્ય વિસ્તીર્ણયશસઃ સત્યકીર્તેર્ મહાત્મનઃ
શ્રોતુમિચ્છામિ દેવેશ દિવિ ચેહ ચ સર્વશઃ ॥

હન્ત તે કથયિષ્યામિ યયાતેરુત્તમાં કથામ્
દિવિ ચેહ ચ પુણ્યાર્થાં સર્વપાપપ્રણાશિનીમ્ ॥

યયાતિર્નાહુષો રાજા પૂરું પુત્રં કનીયસમ્
રાજ્યે ઽભિષિચ્ય મુદિતઃ પ્રવવ્રાજ વનં તદા ॥

અન્તેષુ સ વિનિક્ષિપ્ય પુત્રાન્ યદુપુરોગમાન્
ફલમૂલાશનો રાજા વને ઽસૌ ન્યવસચ્ચિરમ્ ॥

સ જિતાત્મા જિતક્રોધસ્ તર્પયન્ પિતૃદેવતાઃ
અગ્નીંશ્ચ વિધિવજ્જુહ્વન્ વાનપ્રસ્થવિધાનતઃ ॥

અતિથીન્ પૂજયન્નિત્યં વન્યેન હવિષા વિભુઃ
શિલોઞ્છવૃત્તિમાસ્થાય શેષાન્નકૃતભોજનઃ ॥

પૂર્ણં સહસ્રં વર્ષાણામ્ એવંવૃત્તિર્ અભૂન્નૃપઃ
અમ્બુભક્ષઃ સ ચાબ્દાંસ્ત્રીન્ આસીન્ નિયતવાઙ્મનાઃ ॥

તતસ્તુ વાયુભક્ષો ઽભૂત્ સંવત્સરમતન્દ્રિતઃ
પઞ્ચાગ્નિમધ્યે ચ તપસ્ તેપે સંવત્સરં પુનઃ ॥

એકપાદસ્થિતશ્ચાસીત્ ષણ્માસાન્ અનિલાશનઃ
પુણ્યકીર્તિસ્તતઃ સ્વર્ગં જગામાવૃત્ય રોદસી ॥