મત્સ્ય પુરાણ · અધ્યાય 28

યઃ પરેષાં નરો નિત્યમ્ અતિવાદાંસ્તિતિક્ષતિ
દેવયાનિ વિજાનીહિ તેન સર્વમિદં જિતમ્ ॥

યઃ સમુત્પતિતં ક્રોધં નિગૃહ્ણાતિ હયં યથા
સ યન્તેત્યુચ્યતે સદ્ભિર્ ન યો રશ્મિષુ લમ્બતે ॥

યઃ સમુત્પતિતં ક્રોધમ્ અક્રોધને નિયચ્છતિ
દેવયાનિ વિજાનીહિ તેન સર્વમિદં જિતમ્ ॥

યઃ સમુત્પતિતં કોપં ક્ષમયૈવ નિરસ્યતિ
યથોરગસ્ત્વચં જીર્ણાં સ વૈ પુરુષ ઉચ્યતે ॥

યસ્તુ ભાવયતે ધર્મં યો ઽતિમાત્રં તિતિક્ષતિ
યશ્ચ તપ્તો ન તપતિ ભૃશં સો ઽર્થસ્ય ભાજનમ્ ॥

યો યજેદશ્વમેધેન માસિ માસિ શતં સમાઃ
યસ્તુ કુપ્યેન્ન સર્વસ્ય તયોરક્રોધનો વરઃ ॥

યે કુમારાઃ કુમાર્યશ્ચ વૈરં કુર્યુરચેતસઃ
નૈતત્પ્રાજ્ઞસ્તુ કુર્વીત વિદુસ્તે ન બલાબલમ્ ॥

વેદાહં તાત બાલાપિ કાર્યાણાં તુ ગતાગતમ્
ક્રોધે ચૈવાતિવાદે વા કાર્યસ્યાપિ બલાબલે ॥

શિષ્યસ્યાશિષ્યવૃત્તં હિ ન ક્ષન્તવ્યં બુભૂષુણા
અસત્સંકીર્ણવૃત્તેષુ વાસો મમ ન રોચતે ॥

પુંસો યે નાભિનન્દન્તિ વૃત્તેનાભિજનેન ચ
ન તેષુ નિવસેત્પ્રાજ્ઞઃ શ્રેયોર્થી પાપબુદ્ધિષુ ॥

યે નૈનમભિજાનન્તિ વૃત્તેનાભિજનેન ચ
તેષુ સાધુષુ વસ્તવ્યં સ વાસઃ શ્રેષ્ઠ ઉચ્યતે ॥

તન્મે મથ્નાતિ હૃદયમ્ અગ્નિકલ્પમિવારણમ્
વાગ્દુરુક્તં મહાઘોરં દુહિતુર્વૃષપર્વણઃ ॥

ન હ્ય્ અતો દુષ્કરં મન્યે તાત લોકેષ્વપિ ત્રિષુ
યઃ સપત્નશ્રિયં દીપ્તાં હીનશ્રીઃ પર્યુપાસતે ॥