મત્સ્ય પુરાણ · અધ્યાય 149

સુરાસુરાણાં સમ્મર્દસ્ તસ્મિન્નત્યન્તદારુણે
તુમુલો ઽતિમહાનાસીત્ સેનયોરુભયોરપિ ॥

ગર્જતાં દેવદૈત્યાનાં શઙ્ખભેરીરવેણ ચ
તૂર્યાણાં ચૈવ નિર્ઘોષૈર્ માતંગાનાં ચ બૃંહિતૈઃ ॥

હ્વેષતાં હયવૃન્દાનાં રથનેમિસ્વનેન ચ
જ્યાઘોષેણ ચ શૂરાણાં તુમુલો ઽતિમહાનભૂત્ ॥

સમાસાદ્યોભયે સેને પરસ્પરજયૈષિણામ્
રોષેણાતિપરીતાનાં ત્યક્તજીવિતચેતસામ્ ॥

સમાસાદ્ય તુ તે ઽન્યોન્યં પ્રક્રમેણ વિલોમતઃ
રથેનાસક્તપાદાતો રથેન ચ તુરંગમઃ ॥

હસ્તી પદાતિસંયુક્તો રથિના ચ ક્વચિદ્રથી
માતંગેનાપરો હસ્તી તુરંગૈર્બહુભિર્ગજઃ ॥

પદાતિરેકો બહુભિર્ ગજૈર્મત્તૈશ્ચ યુજ્યતે
તતઃ પ્રાસાશનિગદા ભિન્દિપાલપરશ્વધૈઃ ॥

શક્તિભિઃ પટ્ટિશૈઃ શૂલૈર્ મુદ્ગરૈઃ કુણપૈર્ગડૈઃ
ચક્રૈશ્ચ શઙ્કુભિશ્ચૈવ તોમરૈરઙ્કુશૈઃ સિતૈઃ ॥

કર્ણિનાલીકનારાચ વત્સદન્તાર્ધચન્દ્રકૈઃ
ભલ્લૈશ્ચ શતપત્ત્રૈશ્ચ શુકતુણ્ડૈશ્ચ નિર્મલૈઃ ॥

વૃષ્ટિરત્યદ્ભુતાકારા ગગને સમદૃશ્યત
સંપ્રચ્છાદ્ય દિશઃ સર્વાસ્ તમોમયમિવાકરોત્ ॥

ન પ્રાજ્ઞાયત તે ઽન્યોન્યં તસ્મિંસ્તમસિ સંકુલે
અલક્ષ્યં વિસૃજન્તસ્તે હેતિસંઘાતમુદ્ધતમ્ ॥

પતિતં સેનયોર્મધ્યે નિરીક્ષન્તે પરસ્પરમ્
તતો ધ્વજૈર્ભુજૈશ્છત્ત્રૈઃ શિરોભિશ્ચ સકુણ્ડલૈઃ ॥

ગજૈસ્તુરંગૈઃ પાદાતૈઃ પતદ્ભિઃ પતિતૈરપિ
આકાશસરસો ભ્રષ્ટૈઃ પઙ્કજૈરિવ ભૂઃ સ્તૃતા ॥

ભગ્નદન્તા ભિન્નકુમ્ભાશ્ છિન્નદીર્ઘમહાકરાઃ
ગજાઃ શલનિભાઃ પેતુર્ ધરણ્યાં રુધિરસ્રવાઃ ॥

ભગ્નેષાદણ્ડચક્રાક્ષા રથાશ્ચ શકલીકૃતાઃ
પેતુઃ શકલતાં યાતાસ્ તુરંગાશ્ચ સહસ્રશઃ ॥

તતો ઽસૃઘ્રદદુસ્તારા પૃથિવી સમજાયત
નદ્યશ્ચ રુધિરાવર્તા હર્ષદાઃ પિશિતાશિનામ્
વેતાલાક્રીડમભવત્ તત્સંકુલરણાજિરમ્ ॥