મત્સ્ય પુરાણ · અધ્યાય 117

આલોકયન્નદીં પુણ્યાં તત્સમીરહૃતશ્રમઃ
સ ગચ્છન્નેવ દદૃશે હિમવન્તં મહાગિરિમ્ ॥

ખમુલ્લિખદ્ભિર્બહુભિર્ વૃતં શૃઙ્ગૈસ્તુ પાણ્ડુરૈઃ
પક્ષિણામપિ સંચારૈર્ વિના સિદ્ધગતિં શુભામ્ ॥

નદીપ્રવાહસંજાત મહાશબ્દૈઃ સમન્તતઃ
અસંશ્રુતાન્યશબ્દં તં શીતતોયં મનોરમમ્ ॥

દેવદારુવનૈર્નીલૈઃ કૃતાધોવસનં શુભમ્
મેઘોત્તરીયકં શૈલં દદૃશે સ નરાધિપઃ ॥

શ્વેતમેઘકૃતોષ્ણીષં ચન્દ્રાર્કમુકુટં ક્વચિત્
હિમાનુલિપ્તસર્વાઙ્ગં ક્વચિદ્ધાતુવિમિશ્રિતમ્ ॥

ચન્દનેનાનુલિપ્તાઙ્ગં દત્તપઞ્ચાઙ્ગુલં યથા
શીતપ્રદં નિદાઘે ઽપિ શિલાવિકટસંકટમ્
સાલક્તકૈરપ્સરસાં મુદ્રિતં ચરણૈઃ ક્વચિત્ ॥

ક્વચિત્સંસ્પૃષ્ટસૂર્યાંશું ક્વચિચ્ ચ તમસાવૃતમ્
દરીમુખૈઃ ક્વચિદ્ભીમૈઃ પિબન્તં સલિલં મહત્ ॥

ક્વચિદ્વિદ્યાધરગણૈઃ ક્રીડદ્ભિરુપશોભિતમ્
ઉપગીતં તથા મુખ્યૈઃ કિંનરાણાં ગણૈઃ ક્વચિત્ ॥

આપાનભૂમૌ ગલિતૈર્ ગન્ધર્વાપ્સરસાં ક્વચિત્
પુષ્પૈઃ સંતાનકાદીનાં દિવ્યૈસ્તમ્ ઉપશોભિતમ્ ॥

સુપ્તોત્થિતાભિઃ શય્યાભિઃ કુસુમાનાં તથા ક્વચિત્
મૃદિતાભિઃ સમાકીર્ણં ગન્ધર્વાણાં મનોરમમ્ ॥

નિરુદ્ધપવનૈર્દેશૈર્ નીલશાદ્વલમણ્ડિતૈઃ
ક્વચિચ્ ચ કુસુમૈર્યુક્તમ્ અત્યન્તરુચિરં શુભમ્ ॥

તપસ્વિશરણં શૈલં કામિનામતિદુર્લભમ્
મૃગૈર્યથાનુચરિતં દન્તિભિન્નમહાદ્રુમમ્ ॥

યત્ર સિંહનિનાદેન ત્રસ્તાનાં ભૈરવં રવમ્
દૃશ્યતે ન ચ સંશ્રાન્તં ગજાનામાકુલં કુલમ્ ॥

તટાશ્ચ તાપસૈર્યત્ર કુઞ્જદેશૈરલંકૃતાઃ
રત્નૈર્યસ્ય સમુત્પન્નૈસ્ ત્રૈલોક્યં સમલંકૃતમ્ ॥

અહીનશરણં નિત્યમ્ અહીનજનસેવિતમ્
અહીનઃ પશ્યતિ ગિરિમ્ અહીનં રત્નસમ્પદા ॥

અલ્પેન તપસા યત્ર સિદ્ધિં પ્રાપ્સ્યન્તિ તાપસાઃ
યસ્ય દર્શનમાત્રેણ સર્વકલ્મષનાશનમ્ ॥

મહાપ્રપાતસમ્પાત પ્રપાતાદિગતામ્બુભિઃ
વાયુનીતૈઃ સદા તૃપ્તિ કૃતદેશં ક્વચિત્ક્વચિત્ ॥

સમાલબ્ધજલૈઃ શૃઙ્ગૈઃ ક્વચિચ્ ચાપિ સમુચ્છ્રિતૈઃ
નિત્યાર્કતાપવિષમૈર્ અગમ્યૈર્મનસા યુતમ્ ॥

દેવદારુમહાવૃક્ષ વ્રજશાખાનિરન્તરૈઃ
વંશસ્તમ્બવનાકારૈઃ પ્રદેશૈરુપશોભિતમ્ ॥

હિમછત્ત્રમહાશૃઙ્ગં પ્રપાતશતનિર્ઝરમ્
શબ્દલભ્યામ્બુવિષમં હિમસંરુદ્ધકન્દરમ્ ॥

દૃષ્ટ્વૈવ તં ચારુનિતમ્બભૂમિં મહાનુભાવઃ સ તુ મદ્રનાથઃ
બભ્રામ તત્રૈવ મુદા સમેતઃ સ્થાનં તદા કિંચિદથાસસાદ ॥