મત્સ્ય પુરાણ · અધ્યાય 112

ભ્રાતૃભિઃ સહિતઃ સર્વૈર્ દ્રૌપદ્યા સહ ભાર્યયા
બ્રાહ્મણેભ્યો નમસ્કૃત્ય ગુરૂન્દેવાનતર્પયત્ ॥

વાસુદેવો ઽપિ તત્રૈવ ક્ષણેનાભ્યાગતસ્તદા
પાણ્ડવૈઃ સહિતૈઃ સર્વૈઃ પૂજ્યમાનસ્તુ માધવઃ ॥

કૃષ્ણેન સહિતૈઃ સર્વૈઃ પુનરેવ મહાત્મભિઃ
અભિષિક્તઃ સ્વરાજ્યે ચ ધર્મપુત્રો યુધિષ્ઠિરઃ ॥

એતસ્મિન્નન્તરે ચૈવ માર્કણ્ડેયો મહામુનિઃ
તતઃ સ્વસ્તીતિ ચોક્ત્વા તુ ક્ષણાદાશ્રમમાગમત્ ॥

યુધિષ્ઠિરો ઽપિ ધર્માત્મા ભ્રાતૃભિઃ સહિતો ઽવસત્
મહાદાનં તતો દત્ત્વા ધર્મપુત્રો મહામનાઃ ॥

યસ્ત્વિદં કલ્ય ઉત્થાય માહાત્મ્યં પઠતે નરઃ
પ્રયાગં સ્મરતે નિત્યં સ યાતિ પરમં પદમ્
મુચ્યતે સર્વપાપેભ્યો રુદ્રલોકં સ ગચ્છતિ ॥

મમ વાક્યં ચ કર્તવ્યં મહારાજ બ્રવીમ્યહમ્
નિત્યં જપસ્વ જુહ્વસ્વ પ્રયાગે વિગતજ્વરઃ ॥

પ્રયાગં સ્મર વૈ નિત્યં સહાસ્માભિર્યુધિષ્ઠિર
સ્વયં પ્રાપ્સ્યસિ રાજેન્દ્ર સ્વર્ગલોકં ન સંશયઃ ॥

પ્રયાગમનુગચ્છેદ્વા વસતે વાપિ યો નરઃ
સર્વપાપવિશુદ્ધાત્મા રુદ્રલોકં સ ગચ્છતિ ॥

પ્રતિગ્રહાદુપાવૃત્તઃ સંતુષ્ટો નિયતઃ શુચિઃ
અહંકારનિવૃત્તશ્ચ સ તીર્થફલમશ્નુતે ॥

અકોપનશ્ચ સત્યશ્ચ સત્યવાદી દૃઢવ્રતઃ
આત્મોપમશ્ચ ભૂતેષુ સ તીર્થફલમશ્નુતે ॥

ઋષિભિઃ ક્રતવઃ પ્રોક્તા દેવૈશ્ચાપિ યથાક્રમમ્
ન હિ શક્યા દરિદ્રેણ યજ્ઞાઃ પ્રાપ્તું મહીપતે ॥

બહૂપકરણા યજ્ઞા નાનાસમ્ભારવિસ્તરાઃ
પ્રાપ્યન્તે પાર્થિવૈરેતૈઃ સમૃદ્ધૈર્વૈ નરૈઃ ક્વચિત્ ॥

યો દરિદ્રૈરપિ વિધિઃ શક્યઃ પ્રાપ્તું નરેશ્વર
તુલ્યો યજ્ઞફલૈઃ પુણ્યૈસ્ તન્નિબોધ યુધિષ્ઠિર ॥

ઋષીણાં પરમં ગુહ્યમ્ ઇદં ભરતસત્તમ
તીર્થાનુગમનં પુણ્યં યજ્ઞેભ્યો ઽપિ વિશિષ્યતે ॥

દશ તીર્થસહસ્રાણિ તિસ્રઃ કોટ્યસ્તથાપગાઃ
માઘમાસે ગમિષ્યન્તિ ગઙ્ગાયાં ભરતર્ષભ ॥

સ્વસ્થો ભવ મહારાજ ભુઙ્ક્ષ્વ રાજ્યમકણ્ટકમ્
પુનર્દ્રક્ષ્યસિ રાજેન્દ્ર યજમાનો વિશેષતઃ ॥

ઇત્યુક્ત્વા સ મહાભાગો માર્કણ્ડેયો મહાતપાઃ
યુધિષ્ઠિરસ્ય નૃપતેસ્ તત્રૈવાન્તરધીયત ॥

તતસ્તત્ર સમાપ્લાવ્ય ગાત્રાણિ સગણો નૃપઃ
યથોક્તેનાથ વિધિના પરાં નિર્વૃતિમાગમત્ ॥

તથા ત્વમપિ દેવર્ષે પ્રયાગાભિમુખો ભવ
અભિષેકં તુ કૃત્વાદ્ય કૃતકૃત્યો ભવિષ્યસિ ॥

એવમુક્ત્વાથ નન્દીશસ્ તત્રૈવાન્તરધીયત
નારદો ઽપિ જગામાશુ પ્રયાગાભિમુખસ્તથા ॥

તત્ર સ્નાત્વા ચ જપ્ત્વા ચ વિધિદૃષ્ટેન કર્મણા
દાનં દત્ત્વા દ્વિજાગ્ર્યેભ્યો ગતઃ સ્વભવનં તદા ॥