મત્સ્ય પુરાણ · અધ્યાય 107

શૃણુ રાજન્પ્રયાગસ્ય માહાત્મ્યં પુનરેવ તુ
યચ્છ્રુત્વા સર્વપાપેભ્યો મુચ્યતે નાત્ર સંશયઃ ॥

માનસં નામ તત્તીર્થં ગઙ્ગાયા ઉત્તરે તટે
ત્રિરાત્રોપોષિતો ભૂત્વા સર્વકામાનવાપ્નુયાત્ ॥

ગોભૂહિરણ્યદાનેન યત્ફલં પ્રાપ્નુયાન્નરઃ
સ તત્ફલમવાપ્નોતિ તત્તીર્થં સ્મરતે પુનઃ ॥

અકામો વા સકામો વા ગઙ્ગાયાં યો ઽભિપદ્યતે
મૃતસ્તુ લભતે સ્વર્ગં નરકં ચ ન પશ્યતિ ॥

અપ્સરોગણસંગીતૈઃ સુપ્તો ઽસૌ પ્રતિબુધ્યતે
હંસસારસયુક્તેન વિમાનેન સ ગચ્છતિ
બહુવર્ષસહસ્રાણિ સ્વર્ગં રાજેન્દ્ર ભુઞ્જતિ ॥

તતઃ સ્વર્ગાત્પરિભ્રષ્ટઃ ક્ષીણકર્મા દિવશ્ચ્યુતઃ
સુવર્ણમણિમુક્તાઢ્યે જાયતે વિપુલે કુલે ॥

ષષ્ટિતીર્થસહસ્રાણિ ષષ્ટિકોટ્યસ્તથાપગાઃ
માઘમાસે ગમિષ્યન્તિ ગઙ્ગાયમુનસંગમમ્ ॥

ગવાં શતસહસ્રસ્ય સમ્યગ્દત્તસ્ય યત્ફલમ્
પ્રયાગે માઘમાસે તુ ત્ર્યહસ્નાનાત્તુ તત્ફલમ્ ॥

ગઙ્ગાયમુનયોર્મધ્યે કર્ષાગ્નિં યસ્તુ સાધયેત્
અહીનાઙ્ગો હ્યરોગશ્ચ પઞ્ચેન્દ્રિયસમન્વિતઃ ॥

યાવન્તિ રોમકૂપાણિ તસ્ય ગાત્રેષુ દેહિનઃ
તાવદ્વર્ષસહસ્રાણિ સ્વર્ગલોકે મહીયતે ॥

તતઃ સ્વર્ગાત્પરિભ્રષ્ટો જમ્બૂદ્વીપપતિર્ભવેત્
સ ભુક્ત્વા વિપુલાન્ભોગાંસ્ તત્તીર્થં સ્મરતે પુનઃ ॥

જલપ્રવેશં યઃ કુર્યાત્ સંગમે લોકવિશ્રુતે
રાહુગ્રસ્તે તથા સોમે વિમુક્તઃ સર્વકિલ્બિષૈઃ ॥

સોમલોકમવાપ્નોતિ સોમેન સહ મોદતે
ષષ્ટિવર્ષસહસ્રાણિ સ્વર્ગલોકે મહીયતે ॥

સ્વર્ગે ચ શક્રલોકે ઽસ્મિન્ નૃષિગન્ધર્વસેવિતે
પરિભ્રષ્ટસ્તુ રાજેન્દ્ર સમૃદ્ધે જાયતે કુલે ॥

અધઃશિરાસ્તુ યો જ્વાલામ્ ઊર્ધ્વપાદઃ પિબેન્નરઃ
શતવર્ષસહસ્રાણિ સ્વર્ગલોકે મહીયતે ॥

પરિભ્રષ્ટસ્તુ રાજેન્દ્ર સો ઽગ્નિહોત્રી ભવેન્નરઃ
ભુક્ત્વા તુ વિપુલાન્ભોગાંસ્ તત્તીર્થં ભજતે પુનઃ ॥

યઃ સ્વદેહં તુ કર્તિત્વા શકુનિભ્યઃ પ્રયચ્છતિ
વિહગૈરુપભુક્તસ્ય શૃણુ તસ્યાપિ યત્ફલમ્ ॥

શતં વર્ષસહસ્રાણાં સોમલોકે મહીયતે
તસ્માદપિ પરિભ્રષ્ટો રાજા ભવતિ ધાર્મિકઃ ॥

ગુણવાન્ રૂપસમ્પન્નો વિદ્વાંશ્ચ પ્રિયવાચકઃ
ભુક્ત્વા તુ વિપુલાન્ભોગાંસ્ તત્તીર્થં ભજતે પુનઃ ॥

યામુને ચોત્તરે કૂલે પ્રયાગસ્ય તુ દક્ષિણે
ઋણપ્રમોચનં નામ તત્તીર્થં પરમં સ્મૃતમ્ ॥

એકરાત્રોષિતઃ સ્નાત્વા ઋણૈઃ સર્વૈઃ પ્રમુચ્યતે
સ્વર્ગલોકમવાપ્નોતિ અનૃણશ્ચ સદા ભવેત્ ॥