માર્કંડેય પુરાણ · અધ્યાય 80

ઇતિ શ્રીમાર્કણ્ડેયપુરાણે સાવર્ણિકે મન્વન્તરે વૈવસ્વતકીર્તનં નામૈકોનાશીતિતમો ઽધ્યાયઃ
અશીતિતમો ઽધ્યાયઃ- 80
ક્રૌષ્ટુકિરુવાચ
સ્વાયમ્ભુવાદ્યાઃ કથિતાઃ સપ્તૈતે મનવો મમ ।
તદન્તરેષુ યે દેવા રાજાનો મુનયસ્તથા

અસ્મિન્ કલ્પે સપ્ત યે ઽન્યે ભવિષ્યન્તિ મહામુને ।
મનવસ્તાન્ સમાચક્ષ્વ યે ચ દેવાદયશ્ચ યે

માર્કણ્ડેય ઉવાચ
કથિતસ્તવ સાવર્ણિશ્છાયાસંજ્ઞાસુતશ્ચ યઃ ।
પૂર્વજસ્ય મનોસ્તુલ્યઃ સ મનુર્ભવિતાષ્ટમઃ

રામો વ્યાસો ગાલવશ્ચ દીપ્તિમાન્ કૃપ એવ ચ ।
ઋષ્યશૃઙ્ગસ્તથા દ્રોણસ્તત્ર સપ્તર્ષયો ઽભવન્

સુતપાશ્ચામિતાભાશ્ચ મુખ્યાશ્ચૈવ ત્રિધા સુરાઃ ।
વિંશકઃ કથિતાશ્ચૈષાં ત્રયાણાં ત્રિગુણો ગણઃ

તપસ્તપ્તશ્ચ શક્રશ્ચ દ્યુતિર્જ્યોતિઃ પ્રભાકરઃ ।
પ્રભાસો દયિતો ધર્મસ્તેજોરશ્મિશ્ચિરક્રતુઃ

ઇત્યાદિકસ્તુ સુતપા દેવાનાં વિંશકો ગણઃ ।
પ્રભુર્વિભુર્વિભાસાદ્યસ્તથાન્યો વિંશકો ગણઃ

સુરાણામમિતાભાનાં તૃતીયમપિ મે શૃણુ ।
દમો દાન્તો ઋતઃ સોમો વિત્તાદ્યાશ્ચૈવ વિંશતિઃ

મુખ્યા હ્યેતે સમાખ્યાતા દેવા મન્વન્તરાધિપાઃ ।
મારીચસ્યૈવ તે પુત્રાઃ કશ્યપસ્ય પ્રજાપતેઃ

ભવિષ્યાશ્ચ ભવિષ્યન્તિ સાવર્ણસ્યાન્તરે મનોઃ ।
તેષામિન્દ્રો ભવિષ્યસ્તુ બલિર્વૈરોચનિર્મુને

પાતાલ આસ્તે યો ઽદ્યાપિ દૈત્યઃ સમયબન્ધનઃ ।
વિરજાશ્ચાર્વવીરશ્ચ નિર્મોહઃ સત્યવાક્ કૃતિઃ ।
વિષ્ણ્વાદ્યાશ્ચૈવ તનયાઃ સાવર્ણસ્ય મનોર્નૃપાઃ