માર્કંડેય પુરાણ · અધ્યાય 73

ઇતિ શ્રીમાર્કણ્ડેયપુરાણે ઔત્તમમન્વન્તરે દ્વિસપ્તતિતમો ઽધ્યાયઃ
ત્રિસપ્તતિતમો ઽધ્યાયઃ- 73
માર્કણ્ડેય ઉવાચ
મન્વન્તરે તૃતીયે ઽસ્મિન્ ઔત્તમસ્ય પ્રજાપતેઃ ।
દેવાનિન્દ્રમૃષીન્ ભૂપાન્ નિબોધ ગદતો મમ

સ્વધામાનસ્તથા દેવા યથાનામાનુકારિણઃ ।
સત્યાખ્યશ્ચ દ્વિતીયો ઽન્યસ્ત્રિદશાનાં તથા ગણઃ

તૃતીયે તુ ગણે દેવાઃ શિવાખ્યા મુનિસત્તમ ।
શિવાઃ સ્વરૂપતસ્તે તુ શ્રુતાઃ પાપપ્રણાશનાઃ

પ્રતર્દનાખ્યશ્ચ ગણો દેવાનાં મુનિસત્તમ ।
ચતુર્થસ્તત્ર કથિત ઔત્તમસ્યાન્તરે મનોઃ

વશવર્તિનઃ પઞ્ચમે ઽપિ દેવાસ્તત્ર ગણે દ્વિજ ।
યથાખ્યાતસ્વરૂપાસ્તુ સર્વ એવ મહામુને

એતે દેવગણાઃ પઞ્ચ સ્મૃતા યજ્ઞભુજસ્તથા ।
મન્વન્તરે મનુશ્રેષ્ઠે સર્વે દ્વાદશકા ગણાઃ

તેષામિન્દ્રો મહાભાગસ્ત્રૈલોક્યે સ ગુરુર્ભવેત્ ।
શતં ક્રતૂનામાહૃત્ય સુશાન્તિર્નામ નામતઃ

યસ્યોપસર્ગનાશાય નામાક્ષરવિભૂષિતા ।
અદ્યાપિ માનવૈર્ગાથા ગીયતે તુ મહીતલે

શુશાન્તિર્દેવરાટ્ કાન્તઃ શુશાન્તિં સ પ્રયચ્છતિ ।
સહિતઃ શિવસત્યાદ્યૈસ્તથૈવ વશવર્તિભિઃ

અજઃ પરશુચિર્દિવ્યો મહાબલપરાક્રમઃ ।
પુત્રસ્તસ્ય મનોરાસન્ વિખ્યાતાસ્ત્રિદશોપમાઃ

તત્સૂતિસમ્ભવૈર્ભૂમિઃ પાલિતાભૂન્નરેશ્વરૈઃ ।
યાવન્મન્વન્તર તસ્ય મનોરુત્તમતેજસઃ

ચતુર્યુગાનાં સંખ્યાતા સાધિકા હ્યેકસપ્તતિઃ ।
કૃતત્રેતાદિસંજ્ઞાનાં યાન્યુક્તાનિ યુગે મયા

સ્વતેજસા હિ તપસો વરિષ્ઠસ્ય મહાત્મનઃ ।
તનયાશ્ચાન્તરે તસ્મિન્ સપ્ત સપ્તર્ષયો ઽભવન્

તૃતીયમેતત્કથિતં તવ મન્વન્તરં મયા ।
તામસસ્ય ચતુર્થન્તુ મનોરન્તરમુચ્યતે

વિયોનિજન્મનો યસ્ય યશસા દ્યોતિતં જગત્ ।
જન્મ તસ્ય મનોર્બ્રહ્મન્ ! શ્રુયતાં ગદતો મમ

અતીન્દ્રિયમશેષાણાં મનૂનાઞ્ચરિતન્તથા ।
તથા જન્માપિ વિજ્ઞેયં પ્રભાવશ્ચ મહાત્મનામ્