મઞ્જુશ્રીનામસંગીતિ (અન્ય આવૃત્તિ) · શ્લોક 121-140

બાહુદણ્ડશતાક્ષેપઃ પદનિક્ષેપનર્તનઃ
શ્રીમચ્છતભુજાભોગો ગગનાભોગનર્તનઃ ॥

એકપાદતલાક્રાન્ત મહીમણ્ડતલે સ્થિતઃ
બ્રહ્માણ્ડશિખરાક્રાન્ત પાદાઙ્ગુષ્ઠનખે સ્થિતઃ ॥

એકાર્થો ઽદ્વયધર્માર્થઃ પરમાર્થો ઽવિનશ્વરઃ
નાનાવિજ્ઞપ્તિરૂપાર્થશ્ ચિત્તવિજ્ઞાનસન્તતિ ॥

અશેષભાવાર્થરતિઃ શૂન્યતારતિર્ અગ્રધીઃ
ભવરાગાદ્યતીતશ્ ચ ભવત્રયમહારતિઃ ॥

શુદ્ધશુભ્રાભ્રધવલઃ શરચ્ચન્દ્રાંશુસુપ્રભઃ
બાલાર્કમણ્ડલચ્છાયો મહારાગનખપ્રભઃ ॥

ઇન્દ્રનીલાગ્રસચ્ચીરો મહાનીલકચાગ્રધૃક્
મહામણિમયૂખશ્રીર્ બુદ્ધનિર્માણભૂષણઃ ॥

લોકધાતુશતાકમ્પી ઋદ્ધિપાદમહાક્રમઃ
મહાસ્મૃતિધરસ્ તત્ત્વશ્ ચતુઃસ્મૃતિસમાધિરાટ્ ॥

બોધ્યંગકુસુમામોદસ્ તથાગતગુણોદધિઃ
અષ્ટાઙ્ગમાર્ગનયવિત્ સમ્યક્સંબુદ્ધમાર્ગવિત્ ॥

સર્વસત્વમહાસઙ્ગો નિઃસઙ્ગો ગગનોપમઃ
સર્વસત્વમનોજાતઃ સર્વસત્વમનોજવઃ ॥

સર્વસત્વેન્દ્રિયાર્થજ્ઞઃ સર્વસત્વમનોહરઃ
પઞ્ચસ્કન્ધાર્થતત્વજ્ઞઃ પઞ્ચસ્કન્ધવિશુદ્ધધૃક્ ॥

સર્વનિર્યાણકોટિસ્થઃ સર્વનિર્યાણકોવિદઃ
સર્વનિર્યાણમાર્ગસ્થઃ સર્વનિર્યાણદેશકઃ ॥

દ્વાદશાઙ્ગભવોત્ખાતો દ્વાદશાકારશુદ્ધધૃક્
ચતુઃસત્યનયાકારો અષ્ટજ્ઞાનાવબોધધૃક્ ॥

દ્વાદશાકારસત્યાર્થઃ ષોડશાકારતત્ત્વવિત્
વિંશત્યાકારસંબોધિર્ વિબુદ્ધઃ સર્વવિત્ પરઃ ॥

અમેયબુદ્ધનિર્માણ કાયકોટિવિભાવકઃ
સર્વક્ષણાભિસમયઃ સર્વચિત્તક્ષણાર્થવિત્ ॥

નાનાયાનનયોપાય જગદર્થવિભાવકઃ
યાનત્રિતયનિર્યાત એકયાનફલે સ્થિતઃ ॥

ક્લેશધાતુવિશુદ્ધાત્મા કર્મધાતુક્ષયંકરઃ
ઓઘોદધિસમુત્તીર્ણો યોગકાન્તારનિઃસૃતઃ ॥

ક્લેશોપક્લેશસંક્લેશ સુપ્રહીણસવાસનઃ
પ્રજ્ઞોપાયમહાકરુણા અમોઘજગદર્થકૃત્ ॥

સર્વસંજ્ઞાપ્રહીણાર્થો વિજ્ઞાનાર્થો નિરોધધૃક્
સર્વસત્વમનોવિષયઃ સર્વસત્વમનોગતિઃ ॥

સર્વસત્વમનો ઽન્તસ્થસ્ તચ્ચિત્તસમતાંગતઃ
સર્વસત્વમનોહ્લાદી સર્વસત્વમનોરતિઃ ॥

સિદ્ધાન્તો વિભ્રમાપેતઃ સર્વભ્રાન્તિવિવર્જિતઃ
નિઃસન્દિગ્ધમતિસ્ ત્ર્યર્થઃ સર્વાર્થસ્ ત્રિગુણાત્મકઃ ॥