મૈત્રેયવ્યાકરણ · શ્લોક 71-90

સઙ્ઘે દત્ત્વા ચ દાનાનિ ચીવરં પાનભોજનમ્
વિવિધં ગ્લાનભૈષજ્યમ્ આગતા હિ મમાન્તિકમ્ ॥

કુઙ્કુમોદકસેકં ચ ચન્દનેનાનુલેપનમ્
દત્ત્વા શાક્યમુનેઃ સ્તૂપેષ્વ્ આગતા હિ મમાન્તિકમ્ ॥

શિક્ષાપદાનિ ચાદાય શાક્યસિંહસ્ય શાસને
પરિપાલ્ય યથાભૂતમ્ આગતા હિ મમાન્તિકમ્ ॥

ઉપોષધમ્ ઉપોષ્યેહ આર્યમ્ અષ્ટાઙ્ગિકં શુભમ્
ચતુર્દશીં પઞ્ચદશીં પક્ષસ્યેહાષ્ટમીં તથા
પ્રાતિહારિકપક્ષં ચાપ્ય્ અષ્ટાઙ્ગં સુસમાહિતમ્ ॥

શીલાનિ ચ સમાદાય સંપ્રાપ્તાનિ ચ શાસનમ્
બુદ્ધં ધર્મં ચ સઙ્ઘં ચ સત્ત્વાસ્ તે શાસનં ગતાઃ
કૃત્વા ચ કુશલં કર્મ મચ્છાસનમ્ ઉપાગતાઃ ॥

તેનૈતે પ્રેષિતાઃ સત્ત્વાઃ પ્રતીષ્ટાશ્ ચ મયાપ્ય્ અમી
ગણિશ્રેષ્ઠેણ મુનિના પરીતા ભૂરિમેધસા ॥

પ્રસન્નાં જનતાં દૃષ્ટ્વા સત્યાનિ કથયિષ્યતિ
શ્રુત્વા ચ તે તતો ધર્મં પ્રાપ્સ્યન્તિ પદમ્ ઉત્તમમ્ ॥

પ્રાતિહાર્યત્રયેણાસૌ શ્રાવકાન્ વિનયિષ્યતિ
સર્વે તે અસ્રવાસ્ તત્ર ક્ષિપયિષ્યન્તિ સુરતાઃ ॥

પ્રથમઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાઃ ષણ્નવતિકોટ્યઃ શ્રાવકાણાં ભવચ્છિદામ્ ॥

દ્વિતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાશ્ ચતુર્નવતિઃ કોટ્યઃ શાન્તાનાં ભૂરિમેધસામ્ ॥

તૃતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણા દ્વાવિંશતિઃ કોટ્યઃ શાન્તાનાં શાન્તચેતસામ્ ॥

ધર્મચક્રં પ્રવર્ત્યાથ વિનીય સુરમાનુષાન્
સાર્ધં શ્રાવકસઙ્ઘેન પુરે પિણ્ડં ચરિષ્યતિ ॥

તતઃ પ્રવિશતસ્ તસ્યાં રમ્યાં કેતુમતીં પુરીમ્
માન્દારકાણિ પુષ્પાનિ પતિષ્યન્તિ પુરોત્તમે
દેવતાઃ પ્રકરિષ્યન્તિ તસ્મિન્ પુરગતે મુનૌ ॥

ચત્વારશ્ ચ મહારાજાઃ શક્રશ્ ચ ત્રિદશાધિપઃ
બ્રહ્મા દેવગણૈઃ સાર્ધં પૂજાં તસ્ય કરિષ્યતિ ॥

ઉત્પલં કુમુદં પદ્મં પુણ્ડરીકં સુગન્ધિકમ્
અગુરું ચન્દનં ચાપિ દિવ્યં માલ્યં પતિષ્યતિ ॥

ચૈલક્ષેપં કરિષ્યન્તિ દેવપુત્રા મહર્દ્ધિકાઃ
તં લોકનાથમ્ ઉદ્વીક્ષ્ય પ્રવિશન્તં પુરોત્તમમ્ ॥

દિવ્યશ્ ચ તૂર્યનિર્ઘોષો દિવ્યં માલ્યં પતિષ્યતિ
દેવતા પ્રકરિષ્યન્તિ તસ્મિન્ પુરગતે મુનૌ ॥

યે તુ કેતુમતીં કે ચિદ્ વાસયિષ્યન્તિ માનુષાઃ
તે પિ તં પૂજયિષ્યન્તિ પ્રવિશન્તં પુરોત્તમમ્ ॥

પથિ ભૂમ્યાસ્તરં તત્ર મૃદુતૂલપિચોપમમ્
વિચિત્રં ચ શુભં માલ્યં વિકિરિષ્યન્તિ તે તદા ॥

છત્ત્રધ્વજપતાકાભિર્ અર્ચયિષ્યન્તિ માનુષાઃ
શુભૈશ્ ચ તૂર્યનિર્ઘોષૈઃ પ્રસન્નમનસો નરાઃ ॥