મૈત્રેયવ્યાકરણ · શ્લોક 67-86

સ્ત્રીરત્નમ્ અથ શઙ્ખસ્ય વિશાખા નામ વિશ્રુતા
અશીતિભિશ્ ચતુર્ભિશ્ ચ સહસ્રૈઃ સા પુરસ્કૃતા
નારીણાં સહ નિષ્ક્રમ્ય પ્રવ્રજ્યામ્ ઉપયાસ્યતિ ॥

પ્રાણિનાં તત્ર સમયે સહસ્રાણિ શતાનિ ચ
પ્રવ્રજ્યામ્ ઉપયાસ્યન્તિ મૈત્રેયસ્યાનુશાસને ॥

તતઃ કારુણિકઃ શાસ્તા મૈત્રેયો દ્વિપદોત્તમઃ
સમિતિં વ્યવલોક્યાથ ઇદમ્ અર્થં પ્રવક્ષ્યતિ ॥

સર્વે તે શાક્યમુનિના મુનિશ્રેષ્ઠેન તાયિના
અર્થતો લોકનાથેન દૃષ્ટાઃ સદ્ધર્મધાતુના
રોપિતા મોક્ષમાર્ગણે વિક્ષિપ્તા મમ શાસને ॥

છત્ત્રધ્વજપતાકાભિર્ ગન્ધમાલ્યાનુલેપનૈઃ
કૃત્વા શાક્યમુનેઃ પૂજાં હ્ય્ આગતા મમ શાસને ॥

કુઙ્કુમોદકરસેન ચન્દનેનાનુલેપનમ્
દત્ત્વા શાક્યમુનેઃ સ્તૂપે હ્ય્ આગતા મમ શાસને ॥

બુદ્ધં ધર્મં ચ સઙ્ઘં ચ ગત્વા તુ શરણં સદા
કૃત્વા તુ કુશલં કર્મ આગતા મમ શાસને ॥

શિક્ષાપદાનિ સમાદાય x શાક્યમુનિશાસને
પ્રતિપાલ્ય યથાભૂતં હ્ય્ આગતા મમ શાસને ॥

દત્ત્વા સઙ્ઘે ચ દાનાનિ ચીવરપાનભોજનમ્
વિચિત્રં ગ્લાનભૈષજ્યં હ્ય્ આગતા મમ શાસને ॥

ચતુર્દશીં પઞ્ચદશીં પક્ષસ્યેહાષ્ટમીં તથા
પ્રાતિહારકપક્ષં ચ અષ્ટાઙ્ગં સુસમાહિતમ્
ઉપવાસમ્ ઉપોષિત્વા હ્ય્ આગતા મમ શાસને ॥

પ્રાતિહાર્યત્રયેણાસૌ શ્રાવકાન્ વેદયિષ્યતિ
સર્વે તે હ્ય્ અસ્રવાન્ ધર્માન્ ક્ષપયિષ્યન્તિ x x x ॥

પ્રથમઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાઃ ષણ્નવતિઃ કોટ્યઃ શ્રાવકાણાં ભવચ્છિદામ્ ॥

દ્વિતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાશ્ ચતુર્નવતિઃ કોટ્યો મુક્તાનાં ક્લેશબન્ધનાત્ ॥

તૃતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણા દ્વાનવતિઃ કોટ્યો મુક્તાનાં શાન્તચેતસામ્ ॥

ધર્મચક્રં પ્રવર્ત્યાથ વિનીય સુરમાનુષાન્
સાર્ધં શ્રાવકસઙ્ઘેન પુરે પિણ્ડં ચરિષ્યતિ ॥

તતઃ પ્રવિશતસ્ તસ્ય રમ્યાં કેતુમતીપુરીમ્
માન્દારવાણિ પુષ્પાનિ પતિષ્યન્તિ નરોત્તમે
દેવતાઃ પ્રકરિષ્યન્તિ તસ્મિન્ પુરગતે મુનૌ ॥

ચત્વારશ્ ચ મહારાજાઃ શક્રશ્ ચ ત્રિદશાધિપઃ
બ્રહ્મદેવગણૈઃ સાર્ધં પૂજાં તસ્ય કરિષ્યતિ ॥

ઉત્પલકુમુદપદ્મ પુણ્ડરીકસુગન્ધિકમ્
અગુરું ચન્દનં ચૈવ દિવ્યમાલાસ્ તથૈવ ચ ॥

ચૈલક્ષેપં કરિષ્યન્તિ દેવપુત્રા મહર્દ્ધિકાઃ
તં લોકનાથમ્ ઉદ્વીક્ષ્ય પ્રવિશન્તં પુરોત્તમમ્ ॥

પથિ ભૂમિઃ સ્થિતા તત્ર મૃદુતૂલપિચૂપમા
વિચિત્રં ચ શ્રુતં માલ્યં વિસ્તરિષ્યન્તિ તે પથિ ॥