મૈત્રેયવ્યાકરણ · શ્લોક 65-84

પ્રાણિનાં તત્ર સમયે સહસ્રાણિ શતાનિ ચ
પ્રવ્રજ્યામ્ ઉપયાસ્યન્તિ મૈત્રેયસ્યાનુશાસને ॥

તતઃ કારુણિકઃ શાસ્તા મૈત્રેયો દ્વિપદોત્તમઃ
સમિતિં વ્યવલોક્યાથ ઇદમ્ અર્થં પ્રવક્ષ્યતે ॥

સર્વે તે શાક્યમુનિના મુનિશ્રેષ્ઠેન તાયિના
અર્થતો લોકનાથેન દૃષ્ટાઃ સદ્ધર્મધાતુના
આરોપિતા મોક્ષમાર્ગે નિક્ષિપ્તા મમ શાસને ॥

છત્રધ્વજપતાકાભિર્ ગન્ધમાલ્યાનુલેપનૈઃ
કૃત્વા શાક્યમુનેઃ પૂજાં હ્ય્ આગતા મમ શાસને ॥

કુંકુમોદકસેકેન ચન્દનેનાનુલેપનમ્
દત્ત્વા શાક્યમુનેઃ સ્તૂપે હ્ય્ આગતા મમ શાસને ॥

બુદ્ધં ધર્મં ચ સંઘં ચ ગત્વા તુ શરણં સદા
કૃત્વા તુ કુશલં કર્મ હ્ય્ આગતા મમ શાસને ॥

શિક્ષાપદાન્ સમાદાય શાક્યસિંહસ્ય શાસને
પ્રતિપાદ્ય યથાભૂતં હ્ય્ આગતા મમ શાસને ॥

દત્ત્વા સંઘે ચ દાનાનિ ચીવરં પાનભોજનમ્
વિચિત્રં ગ્લાનભૈષજ્યં હ્ય્ આગતા મમ શાસને ॥

ચતુર્દશીં પઞ્ચદશીં પક્ષસ્યેહાષ્ટમીં તથા
પ્રાતિહારકપક્ષં ચ અષ્ટાઙ્ગં સુસમાહિતઃ
ઉપવાસમ્ ઉપોષ્યેહ હ્ય્ આગતા મમ શાસને ॥

પ્રાતિહાર્યત્રયેણાસૌ શ્રાવકાન્ વિનયિષ્યતિ
સર્વે તે સાસ્રવાન્ ધર્માન્ ક્ષયયિષ્યન્તિ સુરતાઃ ॥

પ્રથમઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાઃ ષણ્નવતિ કોટ્યઃ શ્રાવકાણાં ભવિષ્યતિ ॥

દ્વિતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણાશ્ ચતુર્નવતિ કોટ્યઃ ક્લેશમુક્તા ક્ષણાટ્ ॥

તૃતીયઃ સન્નિપાતો ઽસ્ય શ્રાવકાણાં ભવિષ્યતિ
પૂર્ણા દ્વાનવતિ કોટ્યો મુક્તાનાં શાન્તચેતસામ્ ॥

ધર્મચક્રં પ્રવર્ત્યાથ વિનીય સુરમાનુષાન્
સાર્ધં શ્રાવકસંઘેન પુરે પિણ્ડં ચરિષ્યતિ ॥

તતઃ પ્રવેશતસ્ તસ્ય રમ્યાં કેતુમતીપુરીમ્
માન્દારવાણિ પુષ્પાનિ પતિષ્યન્તિ પુરોત્તમે
દેવતાઃ પ્રક્રમિષ્યન્તિ તસ્મિન્ પુરે ગતે મુનૌ ॥

ચત્વારશ્ ચ મહારાજાનઃ શક્રશ્ ચ ત્રિદશાધિપઃ
બ્રહ્મ દેવગણૈઃ સાર્ધં પૂજાં તસ્ય વિધાસ્યતિ ॥

ઉત્પલં કુમુદં પદ્મં પુણ્ડરીકં સુગન્ધિકમ્
અગુરું ચન્દનં ચૈવ દિવ્યમાલ્યં તથૈવ ચ ॥

ચૈલક્ષેપં વિધાસ્યન્તિ દેવપુત્રા મહર્દ્ધિકાઃ
તં લોકનાથમ્ ઉદ્વીક્ષ્ય પ્રવિશન્તં પુરોત્તમમ્ ॥

પથિ તત્ર સ્થિતા ભૂમિર્ મૃદુસ્ તૂલપિચૂપમા
વિચિત્રં ચ તતો માલ્યં વિકરિષ્યન્તિ તે પથિ ॥

છત્ત્રધ્વજપતાકાભિર્ ગન્ધમાલ્યાનુલેપનૈઃ
શુભૈશ્ ચ તૂર્યનિર્ઘોષૈઃ પ્રસન્નમનસો નરાઃ
શાસ્તુઃ પૂજાં કરિષ્યન્તિ દેવપુત્રા મહર્દ્ધિકાઃ ॥