મૈત્રેયવ્યાકરણ · શ્લોક 25-44

પિઙ્ગલશ્ ચ કલિઙ્ગેષુ મિથિલાયામ્ ચ પાણ્ડુકઃ
એલાપત્રશ્ ચ ગાન્ધારે શંખો વારાણસીપુરે ॥

ચતુર્ભિર્ એભિર્ નિધિભિઃ સ રાજા સુસમન્વિતઃ
ભવિષ્યતિ મહાવીરઃ શતપુણ્યફલાર્પિતઃ ॥

બ્રાહ્મણસ્ તસ્ય રાજ્ઞો ઽથ સુબ્રહ્મા નામ્ના પુરોહિતઃ
બહુશ્રુતશ્ ચતુર્વેદી ઉપધ્યાયો ભવિષ્યતિ ॥

અધ્યાપકો મન્ત્રધરઃ સ્મૃતિવાન્ વેદપારગઃ
કૈટાભે ચ સ નિર્ઘણ્ટે પદવ્યાકરણે તથા ॥

તસ્ય બ્રહ્મવતી નામ તદા ભાર્યા ભવિષ્યતિ
દર્શનીયા પ્રાસાદિકા અભિરૂપા યશસ્વિની ॥

તુષિતેભ્યસ્ તતશ્ ચ્યુત્વા મૈત્રેયો હ્ય્ અગ્રપુદ્ગલઃ
તસ્યાઃ કુક્ષૌ સ નિયતં પ્રતિસન્ધિં ગ્રહિષ્યતિ ॥

દશ માસાંશ્ ચ નિખિલાન્ ધારયિત્વા મહાદ્યુતિમ્
સુપુષ્પિતે ચ ઉદ્યાને ગત્વા મૈત્રેયમાતરઃ ॥

ન નિષણ્ણા નિપન્ના વા સ્થિતા સા બ્રહ્મચારિણી
દ્રુમસ્ય શાખામ્ આલમ્બ્ય મૈત્રેયં જનયિષ્યતિ ॥

નિષ્ક્રમિષ્યતિ પાર્શ્વેન દક્ષિણાઙ્ગે નરોત્તમઃ
અભ્રકૂટાદ્ યથા સૂર્યો નિર્ગતશ્ ચ પ્રભાયતે ॥

કરિષ્યતે સમાલોકં સનરામરવન્દિતઃ
અલિપ્તો ગર્ભપઙ્કેન પદ્મં ચૈવ યથામ્ભુવા
ત્રૈધાતુકમ્ ઇદં સર્વં પ્રભયા પૂરયિષ્યતિ ॥

પદે પદે નિધાનં ચ પદ્મં પદ્મં ભવિષ્યતિ
દિશશ્ ચતસ્રો ઉદ્વીક્ષ્ય વાચં પ્રવ્યાહરિષ્યતિ
ઇયં મે પશ્ચિમા જાતિર્ નાસ્તિ ભૂયઃ પુનર્ભવઃ ॥

ન પુનર્ આગમિષ્યામિ નિર્વાસ્યામિ નિરાશ્રવઃ
શીતોષ્ણવારિધારાભિઃ સ્નાપયિષ્યન્તિ પુન્નગાઃ ॥

દિવ્યાસુરાણિ પુષ્પાણિ પતિષ્યન્તિ નભસ્તલાત્
શ્વેતં તસ્ય સુરાશ્ છત્ત્રં ધારયિષ્યન્તિ મૂર્ધનિ ॥

હૃષ્ટશ્ ચૈવ સહસ્રાક્ષો દેવરાજઃ શચીપતિઃ
પ્રગ્રહીષ્યતિ કુમારં તં દ્વાત્રિંશલક્ષ્ણાન્વિતમ્
શ્રિયા જ્વલન્તં મૈત્રેયં માતુર્ હસ્તે પ્રદાસ્યતિ ॥

મનોરમાં ચ શિવિકાં નાનારત્નવિભુષિતામ્
આરૂઢાં પુત્રસહિતાં વહિષ્યન્તિ ચ દેવતાઃ ॥

તતસ્ તૂર્યસહસ્રેષુ વાદ્યમાનેષુ તત્પુરમ્
પ્રવિષ્ટમાત્રે મૈત્રેયે પુષ્પવર્ષં પતિષ્યતિ ॥

તસ્મિંશ્ ચ દિવસે નાર્યો ગુર્વિણ્યઃ પ્રસવિષ્યન્તિ
સર્વાસ્ તા જનયિષ્યન્તિ પુત્રાન્ ક્ષેમેણ સ્વસ્તિના ॥

દૃષ્ટ્વૈવં પુત્રં સુબ્રહ્મા દ્વાત્રિંશદ્વરલક્ષણમ્
પ્રત્યવેક્ષ્ય સુમન્ત્રેણ તતઃ પ્રીતો ભવિષ્યતિ ॥

ગતિદ્વયં કુમારસ્ય યથા મન્ત્રેષુ દૃશ્યતે
નરાધિપશ્ ચક્રવર્તી બુદ્ધો વા દ્વીપદોત્તમઃ ॥

સ ચ યૌવનસંપ્રાપ્તો મૈત્રેયો હ્ય્ અગ્રપુદ્ગલઃ
ચિન્તયિષ્યતિ ધર્માત્મા દુઃખિતા ખલ્વ્ ઇયં પ્રજા ॥