મૈત્રેયવ્યાકરણ (અન્ય આવૃત્તિ) · શ્લોક 81-100

તૃતીયઃ સન્નિપાતોસ્ય શ્રાવકાણાં ભવિષ્યતિ ।
પૂર્ણાઃ દ્વાવિંશતિ કોટ્યઃ શાન્તાનાં શાન્તચેતસાં

ધર્મચક્રં પ્રવર્ત્યાથ વિનીય સુરમાનુષાન્ ।
સાર્ધં શ્રાવકસંઘેણ પુરે પિણ્ડં ચરિષ્યતિ

તતઃ પ્રવિશતસ્તસ્યાં રમ્યાં કેતુમતીં પુરીં ।
માન્દારકાણિ પુષ્પાણિ પતિષ્યન્તિ પુરોત્તમે ॥
દેવતાઃ પ્રકિરિષ્યન્તિ તસ્મિન્ પુરગતે મુનૌ

ચત્વારશ્ચ મહારાજા શક્રશ્ચ ત્રિદશાધિપઃ ।
બ્રહ્મા દેવગણૈઃ સાર્ધં પૂજાં તસ્ય કરિષ્યતિ

ઉત્પલં કુમુદં પદ્મં પુણ્ડરીકં સુગન્ધિકં ।
અગુરું ચન્દનં ચાપિ દિવ્યં માલ્યં પતિષ્યતિ

ચૈલક્ષેપં કરિષ્યન્તિ દેવપુત્રા મહર્દ્ધિકાઃ ।
તં લોકનાથમુદ્વીક્ષપ પ્રવિશન્તં પુરોત્તમમ્

દિવ્યશ્ચ તૂર્યનિર્ઘોષો દિવ્યં માલ્યં પતિષ્યતિ ।
દેવતા પ્રકિરિષ્યન્તિ તસ્મિન્ પુરગતે મુનૌ

યે તુ કેતુમતીં કેચિત્ વાસયષ્યન્તિ માનુષાઃ ।
તેપિ તં પૂજયિષ્યન્તિ પ્રવિશન્તં પુરોત્તમમ્

પથિ ભૂમ્યાસ્તરં તત્ર મૃદુતૂલપિચોપમમ્ ।
વિચિત્રઞ્ચ શુભં માલ્યં વિકિરિષ્યન્તિ તે તદા

છત્રધ્વજપતાકભિરર્ચયિષ્યન્તિ માનુષાઃ ।
શુભૈશ્ચ તૂર્યનિર્ઘોષૈઃ પ્રસન્નમનસો નરાઃ

તં ચ શક્રઃ સહસ્રાક્ષો દેવરાજઃ શચીપતિઃ ।
પ્રહૃષ્ટઃ પ્રાઞ્જલિર્ભૂત્વા મૈત્રેયં સ્તોષ્યતે જિનમ્

નમસ્તે પુરુષાજન્ય નમસ્તે પુરુષોત્તમ ।
અનુકમ્પસ્વ જનતાં ભગવન્નગ્રપુગ્દલ

મહર્દ્ધિકો દેવપુત્રસ્તસ્ય મારો ભવિષ્યતિ ।
સ ચાપિ પ્રાઞ્જલિર્ભૂત્વા સ્તોષ્યતે લોકનાયકમ્

શુદ્ધાવાસ સહસ્રૈશ્ચ બહુભિઃ પરિવારિતઃ ।
પ્રવેક્ષ્યતે ચ મૈત્રેયો લોકનાથો વિનાયકઃ

બ્રાહ્મણપરિવારેણ બ્રહ્મા ચાપિ ગિરાસ્ફુટમ્ ।
કથયિષ્યતિ સદ્ધર્મં બ્રાહ્મં ઘોષમુદીરયન્

આકીર્ણા પૃથિવી સર્વા અર્હદ્ભિશ્ચ ભવિષ્યતિ ।
ક્ષીણાશ્રવૈર્વાન્તદોષૈઃ પ્રહીણભવબન્ધનૈઃ

હૃષ્ટા દેવમનુષ્યાશ્ચ ગન્ધર્વા યક્ષરાક્ષસાઃ ।
શાસ્તુઃ પૂજાં કરિષ્યન્તિ નાગાશ્ચાપિ મહર્દ્ધિકાઃ

તે વૈ નૂનં ભવિષ્યન્તિ ચ્યાનઘાચ્છિન્નસંશયાઃ ।
ઉત્ક્ષિપ્તપરિખાઃ ધીરા અનાદાના નિરુત્સકાઃ ॥
બ્રહ્મચર્યઞ્ચરિષ્યન્તિ મૈત્રેયસ્યાનુશાસને

તે ઽપિ નૂનં ભવિષ્યન્તિ અમમા અપરિગ્રહાઃ ।
અજાતરૂપરજતા અનિકેતા અસંસ્તવાઃ ।
બ્રહ્મચર્યઞ્ચરિષ્યન્તિ યે મૈત્રેયાનુશાસને

તે વૈ પારં ગમિષ્યન્તિ છિત્વા જાલમેવ ભુજાત્ ।
ધ્યાનાનિ ચોપસંપદ્ય પ્રીતિસૌખ્યસમન્વિતાઃ ।
બ્રહ્મચર્યઞ્ચરિષ્યન્તિ મૈત્રેયસ્યાનુશાસને