મહાયાનસૂત્રાલંકાર · અધ્યાય 2

પ્રકૃતિપ્રદુષ્ટ ઇતિ પ્રકૃતિસાવદ્યઃ । તસ્માદુપેક્ષૈવ વરમ્ । કસ્માત્ । સા હ્યદોષા । પ્રતિઘાતસ્તુ સદોષઃ ।
। મહાયાનસૂત્રાલંકારે મહાયાનસિદ્ધ્યધિકારઃ પ્રથમઃ ॥
દ્વિતીયો ઽધિકારઃ
શરણગમનવિશેષસંગ્રહશ્લોકઃ ।
રત્નાનિ યો હિ શરણપ્રગતો ઽત્ર યાને જ્ઞેયઃ સ એવ પરમઃ શરણ[ણં] ગતાનામ્ ।
સર્વત્રગાભ્યુપગમાધિગમાભિભૂતિભેદૈશ્ચતુર્વિધમયાર્થવિશેષણેન

સ એવ પરમઃ શરણં ગતાનામિતિ । કેન કારણેન । ચતુર્વિધસ્વભાવાર્થવિશેષણેન । ચતુર્વિધો ઽર્થઃ સર્વત્રગાભ્યુપગમાધિગમાભિભૂતિભેદતો વેદિતવ્યઃ । સર્વત્રગાર્થઃ । અભ્યુપગમાર્થઃ । અધિગમાર્થઃ । અભિભવાર્થઃ । તે પુનરુત્તરત્ર નિર્દેક્ષ્યન્તે ।
તથાપ્યત્ર શરણપ્રગતાનાં બહુદુષ્કરકાર્યત્વાત્ કેચિન્નોત્સહન્તે । શ્લોકઃ ।
યસ્માદાદૌ દુષ્કર એષ વ્યવસાયો દુઃસાધો ઽસૌ નૈકસહસ્રૈરપિ કલ્પૈઃ ।
સિદ્ધો યસ્માત્સત્ત્વહિતાધાનમહાર્થસ્તસ્માદગ્રે યાન ઇહાગ્રશરણાર્થઃ

એતેન તસ્ય શરણગમનવ્યવસાયસ્ય પ્રણિધાનપ્રતિપત્તિવિશેષાભ્યાં યશોહેતુત્વં દર્શયતિ । ફલપ્રાપ્તિવિશેષેણ મહાર્થત્વમ્ ।
પૂર્વાધિકૃતે સર્વત્રગાર્થે શ્લોકઃ ।
સર્વાન્ સત્ત્વાંસ્તારયિતું યઃ પ્રતિપન્નો
યાને જ્ઞાને સર્વગતે કૌશલ્યયુક્તઃ ।
યો નિર્વાણે સંસરણે ઽપ્યેકરસો ઽસૌ [સંસૃતિશાન્ત્યેકરસો ઽસૌ]
જ્ઞેયો ધીમાનેષ હિ સર્વત્રગ એવમ્

એતેન ચતુર્વિધં સર્વત્રગાર્થં...........................
અસાંકેતિકં ધર્મતાઅપ્રાતિલમ્ભિકં ચેતિ પ્રભેદલક્ષણા પ્રવૃત્તિરૌદારિકસૂક્ષ્મપ્રભેદેન ।
શરણપ્રતિપત્તિવિશેષણે શ્લોકઃ ।
શરણગતિમિમાં ગતો મહાર્થાં ગુણગણવૃદ્ધિમુપૈતિ સો ઽપ્રમેયામ્ ।
સ્ફુરતિ જગદિદં કૃપાશયેન પ્રથયતિ ચાપ્રતિમં મહા[ર્ય]ધર્મમ્