મહાયાનસૂત્રાલંકાર · અધ્યાય 15

નિગમનશ્લોકો ગતાર્થઃ ।
॥ મહાયાનસૂત્રાલંકારે અવવાદાનુશાસન્યધિકારશ્ચતુર્દશઃ ॥
પઞ્ચદશો ઽધિકારઃ
ઉદ્દાનમ્
અધિમુક્તેર્બહુલતા ધર્મપર્યેષ્ટિદેશને
પ્રતિપત્તિસ્તથા સમ્યગવવાદાનુશાસનં

ઉપાયસહિતકર્મવિભાગે ચત્વારઃ શ્લોકાઃ ।
યથા પ્રતિષ્ઠા વનદેહિપર્વતપ્રવાહિનીનાં પૃથિવી સમન્તતઃ ।
તથૈવ દાનાદિશુભસ્ય સર્વતો બુધેષુ કર્મ ત્રિવિધં નિરુચ્યતે

અનેન શ્લોકેન સમુત્થાનોપાયં દર્શયતિ । સર્વપ્રકારસ્ય દાનાદિશુભસ્ય પારમિતાબોધિપક્ષાદિકસ્ય કર્મત્રયસમુત્થિતત્વાત્ । બુધેષ્વિતિ બોધિસત્ત્વેષુ । વનાદિગ્રહણમુપભોજ્યા સ્થિરસ્થિરવસ્તુનિદર્શનાર્થમ્ ।
સુદુષ્કરૈઃ કર્મભિરુદ્યતાત્મનાં વિચિત્રરૂપૈર્બહુકલ્પનિર્ગતૈઃ ।
ન કાયવાક્ચિત્તમયસ્ય કર્મણો જિનાત્મજાનાં ભવતીહ સંનતિઃ

યથા વિષાચ્છસ્રમહાશનાદ્[ને] રિપોર્નિવારયેદાત્મહિતઃ સ્વમાશ્રયં ।
નિહીનયાનાદ્વિવિધાજ્જિનાત્મજો નિવારયેત્કર્મ તથા ત્રયાત્મકં

આભ્યાં શ્લોકાભ્યાં વ્યુત્થાનોપાયં દર્શયતિ । મહાયાનખેદાન્યયાનપાતવ્યુત્થાનાદ્યથાક્રમં । સંનતિઃ ખેદ ઇત્યર્થઃ । વિષાદિસાધર્મ્યં હીનયાનપ્રતિસંયુક્તસ્ય કર્મણો હીનયાનચિત્તપરિણામનાત્ મહાયાને કુશલમૂલસમુચ્છેદનાત્ અનુત્પન્નકુશલમૂલાનુત્પાદાય । ઉત્પન્ન કુશલમૂલ[સ?]સ્ય ધ્વંસનાત્ । બુદ્ધત્વસંપત્પ્રાપ્તિવિબન્ધનાચ્ચ ।
ન કર્મિણઃ કર્મ ન કર્મણઃ ક્રિયાં સદાવિકલ્પઃ સમુદીક્ષતે ત્રિધા ।
તતો ઽસ્ય તત્કર્મ વિશુદ્ધિપારગં ભવત્યનન્તં તદુપાયસંગ્રહાત્