મહાયાનસૂત્રાલંકાર (અન્ય આવૃત્તિ) · અધ્યાય 8

પ્રભાવાધિકારઃ મહાયાનસૂત્રાલંકારે સપ્તમઃ
અષ્ટમો ઽધિકારઃ
બોધિસત્ત્વપરિપાકે સંગ્રહઃ શ્લોકઃ ।
રૂચિઃ પ્રસાદઃ પ્રશમો ઽનુકમ્પના ક્ષમાથ મેધા પ્રબલત્વમેવ ચ ।
અહાર્યતાઙ્ગૈઃ સમુપેતતા ભૃશં જિનાત્મજે તત્પરિપાકલક્ષણમ્

સુમિત્રતાદિત્રયમુગ્રવીર્યતા પરાર્ધનિષ્ઠોત્તમધર્મસંગ્રહઃ ।
કૃપાલુસદ્ધર્મમહાપરિગ્રહે મતં હિ સમ્યક્પરિપાકલક્ષણમ્

ગુણજ્ઞતાથાશુસમાધિલાભિતા ફલાનુભૂતિર્મનસો ઽધ્યભેદ[દ્ય?]તા ।
જિનાત્મજે શાસ્તરિ સંપ્રપત્તયે મતં હિ સમ્યક્પરિપાકલક્ષણમ્

સુસંવૃત્તિઃ ક્લિષ્ટવિતર્કવર્જના નિરન્તરાયો ઽથ શુભાભિરામતા ।
જીનાત્મજે ક્લેશવિનોદનાયતન્ મતં હિ સમ્યક્પરિપાકલક્ષણમ્

કૃપા પ્રકૃત્યા પરદુઃખદર્શનં નિહીનચિત્તસ્ય ચ સંપ્રવર્જનમ્ ।
વિશેષગત્વં જગદગ્રજન્મતા પરાનુકમ્પાપરિપાકલક્ષણમ્

ધૃતિઃ પ્રકૃત્યા પ્રતિસંખ્યભાવના સુદઃખશીતાદ્યધિવાસના સદા ।
વિશેષગામિત્વશુભાભિરામતા મતં ક્ષમાયાઃ પરિપાકલક્ષણમ્

વિપાકશુદ્ધિઃ શ્રવણાદ્યમોષતા પ્રવિષ્ટતા સૂક્તદુરૂક્તયોસ્તથા ।
સ્મૃતેર્મહાબુદ્ધયુદયે ચ યોગ્યતા સુમેધતાયાઃ પરિપાકલક્ષણમ્

શુભદ્વયેન દ્વયધાતુપુષ્ટતા ફલોદયે ચાશ્રયયોગ્યતા પરા ।
મનોરથાપ્તિર્જગદગ્રભૂતતા બલોપલમ્ભે પરિપાકલક્ષણમ્

સુધર્મતાયુક્તિવિચારણાશયો વિશેષલાભઃ પરપક્ષદૂષણમ્ ।
પુનઃ સદા મારનિરન્તરાયતા અહાર્યતાયાઃ પરિપાકલક્ષણમ્

શુભાચયો ઽથાશ્રયયત્નયોગ્યતા વિવેકતોદગ્રશુભાભિરામતા ।
જિનાત્મજે હ્યઙ્ગસમન્વયે પુનર્મતં હિ સમ્યક્પરિપાકલક્ષણમ્

ઇતિ નવવિધવસ્તુપાચિતાત્મા પરપરિપાચનયોગ્યતામુપેતઃ ।
શુભ[ધર્મ]મયસતતપ્રવર્ધિતાત્મા ભવતિ સદા જગતો ઽગ્રબન્ધુભૂતઃ

વ્રણે ઽપિ ભોજ્યે પરિપાક ઇષ્યતે યથૈવ તત્સ્રાવણભોગયોગ્યતા ।
તથાશ્રયે ઽસ્મિન્દ્વયપક્ષશાન્તતા[તાં]તથોપભોગત્વસુશાન્તપક્ષતા [મુશન્તિપક્વતામ્]

વિપાચનોક્તા પરિપાચના તથા પ્રપાચના ચાપ્યનુપાચનાપરા ।
સુપાચના[ચા]પ્યધિપાચના મતા નિપાચનોત્પાચનના ચ દેહિષુ

હિતાશયેનેહ યથા જિનાત્મજો વ્યવસ્થિતઃ સર્વજગદ્વિપાચયન્ ।
તથા ન માતા ન પિતા ન બન્ધવઃ સુતેષુ બન્ધુષ્વપિ સુવ્યવસ્થિતાઃ

તથાજનો નાત્મનિ વત્સલો મતઃ કુતો ઽપિ સુસ્નિગ્ધપરાશ્રયે જને ।
યથા કૃપાત્મા પરસત્વવત્સલો હિતે સુખે ચૈવ નિયોજનાત્મતઃ

ન બોધિસત્ત્વસ્ય શરીરભોગયોઃ પરેષ્વદેયં પુનરસ્તિ સર્વથા ।
અનુગ્રહેણ દ્વિવિધેન પાચયન્ પરં સમૈર્દાનગુણૈર્ન તૃપ્યતે

સદાપ્રકૃત્યાધ્યવિહિંસકઃ સ્વયં રતો ઽપ્રમત્તો ઽત્ર પરં નિવેશયન્ ।
પરંપરાનુગ્રહકૃત્ દ્વિધા પરે વિપાકનિષ્યન્દગુણેન પાચકઃ

પરે ઽપકારિણ્યુપકારિબુદ્ધિમાન્ પ્રમર્ષયન્નુગ્રમપિ વ્યતિક્રમમ્ ।
ઉપાયચિત્તૈરપકારમર્ષણૈઃ શુભે સમાદાપયતે ઽપકારિણઃ

પુનઃ સ યત્નં પરમં સમાશ્રિતો ન ખિદ્યતે કલ્પસહસ્રકોટિભિઃ ।
જિનાત્મજઃ સ[ત્ત્વ]ગણં પ્રપાચયન્ પરૈકચિત્તસ્ય શુભસ્ય કારણાત્

વશિત્વમાગમ્ય મનસ્યનુત્તરં પરં સમાવર્જયતે ઽત્ર શાસને ।
નિહત્ય સર્વામવમાનકામતાં શુભેન સંવર્ધયતે ચ તં પુનઃ

સ તત્વભાવાર્થનયે સુનિશ્ચિતઃ કરોતિ સત્વાન્સુવિનીત સંશયાન્ ।
તતશ્ચ તે તજ્જિનશાસનાદરાદ્ વિવર્ધયન્તે સ્વપરં ગુણૈઃ શુભૈઃ

ઇતિ સુગતિગતૌ શુભત્રયે વા જગદખિલં કૃપયા સ બોધિસત્ત્વઃ ।
તનુપરમવિમધ્યમપ્રકારૈર્વિનયતિ લોકસમાનભાવગત્યા