મહાયાનસૂત્રાલંકાર (અન્ય આવૃત્તિ) · અધ્યાય 7

મહાયાનસૂત્રાલંકારે તત્વાધિકારઃ ષષ્ઠઃ
સપ્તમો ઽધિકારઃ
પ્રભાવલક્ષણવિભાગે શ્લોકઃ ।
ઉત્પત્તિવાક્ ચિત્તશુભાશુભાધિ તત્સ્થાનનિઃસારપદા પરોક્ષમ્ ।
જ્ઞાનં હિ સર્વત્રગસપ્રભેદેષ્વવ્યાહતં ધીરગતઃ પ્રભાવઃ

ધ્યાનં ચતુર્થં સુવિશુદ્ધમેત્ય નિષ્કલ્પનાજ્ઞાનપરિગ્રહેણ ।
યથાવ્યવસ્થાનમનસ્ક્રિયાતઃ પ્રભાવસિદ્ધિં પરમાં પરૈતિ

યેનાર્યદિવ્યાપ્રતિમૈર્વિહારૈર્ બ્રાહ્મૈશ્ચ નિત્યં વિહરત્યુદારૈઃ ।
બુદ્ધાંશ્ચ સત્ત્વાંશ્ચ સ દિક્ષુ ગત્વા સંમાનયત્યાનયતે વિશુદ્ધિમ્

માયોપમાન્પશ્યતિ લોકધાતૂન્સર્વાન્સસત્ત્વાન્સવિવર્તનાશાન્ ।
સંદર્શયત્યેવ ચ તાન્યથેષ્ટં વશી વિચિત્રૈરપિ સ પ્રકારૈઃ

રશ્મિપ્રમોક્ષૈર્ભૃશદુઃખિતાંશ્ચ આપાયિકાન્સ્વર્ગગતાન્કરોતિ ।
મારાન્વયાન્ ક્ષુબ્ધવિમાનશોભાન્ સંકમ્પયંસ્રાસયતે સમારાન્

સમાધિવિક્રીડિતમપ્રમેયં સંદર્શયત્યગ્રગણસ્યમધ્યે ।
સકર્મજન્મોત્તમનિર્મિતૈશ્ચ સત્ત્વાર્થમાતિષ્ઠતિ સર્વકાલમ્

જ્ઞાનવશિત્વાત્સમુપૈતિ શુદ્ધિં ક્ષેત્રં યથાકામનિદર્શનાય
અબુદ્ધનામેષુ[?] ચ બુદ્ધનામ સંશ્રાવણાત્તાન્ક્ષિપતે ઽન્યધાતૌ

શક્તો ભવત્યેવ ચ સત્વપાકે સંજાતપક્ષઃ શકુનિર્યથૈવ ।
બુદ્ધાત્પ્રશંસાં લભતે ઽતિમાત્રામ્ આદેયવાક્યો ભવતિ પ્રજાનામ્

ષડ્ધાપ્યભિજ્ઞા ત્રિવિધા ચ વિદ્યા અષ્ટૌ વિમોક્ષા ઽભિભુવસ્તથાઽષ્ટૌ ।
દશાપિ કૃત્સ્નાયતનાન્યમેયાઃ સમાધયો ધીરગતઃ પ્રભાવઃ

સ હિ પરમવશિત્વલબ્ધબુદ્ધિર્જગદવશં સ્વવશે વિધાય નિત્યમ્ ।
પરહિતકરણૈકતાભિરામશ્ચરતિ ભવેષુ હિ સિંહવત્સુધીરઃ