મહાયાનસૂત્રાલંકાર (અન્ય આવૃત્તિ) · અધ્યાય 5

મહાયાનસૂત્રાલંકારે ચિત્તોત્પાદાધિકારશ્ચતુર્થઃ
પઞ્ચમો ઽધિકારઃ
પ્રતિપત્તિલક્ષણે શ્લોકઃ ।
મહાશ્રયારમ્ભફલોદયાત્મિકા જિનાત્મજાનાં પ્રતિપત્તિરિષ્યતે ।
સદા મહાદાનમહાધિવાસના મહાર્થસંપાદનકૃત્યકારિકા

પરત્રલબ્ધ્વાત્મસમાનચિત્તતાં સ્વતો ઽધિ વા શ્રેષ્ઠતરેષ્ટતાં પરે ।
તથાત્મનો ઽન્યાર્થવિશિષ્ટસંજ્ઞિનઃ સ્વકાર્થતા કા કતમા પરાર્થતા

પરત્ર લોકો ન તથાતિનિર્દયઃ પ્રવર્તતે તાપનકર્મણારિપૌ ।
યથા પરાર્થં ભૃશદુઃખતાપને કૃપાત્મકઃ સ્વાત્મનિ સંપ્રવર્તતે

નિકૃષ્ટમધ્યોત્તમધર્મતાસ્થિતે સુદેશનાવર્જનતાઽવતારણા ।
વિનીતિરર્થે પરિપાચના શુભે તથાવવાદસ્થિતિબુદ્ધિમુક્તયઃ

ગુણૈર્વિશિષ્ટૈઃ સમુદાગમસ્તથા કુલોદયો વ્યાકરણાભિષિક્તતા ।
તથાગતજ્ઞાનમનુત્તરં પદં પરાર્થ એષ ત્ર્યધિકો દશાત્મકઃ

જનાનુરૂપા ઽવિપરીતદેશના નિરુન્નતા ચાપ્યમમા વિચક્ષણા ।
ક્ષમા ચ દાન્તા ચ સુદૂરગાઽક્ષયા જિનાત્મજાનાં પ્રતિપત્તિરુત્તમા

મહાભયે કામિજનઃ પ્રવર્તતે ચલે વિપર્યાસસુખે ભવપ્રિયઃ ।
પ્રતિસ્વમાધિપ્રશમે શમપ્રિયઃ સદા તુ સર્વાધિગ[શ]મે કૃપાત્મકઃ

જનો વિમૂઢઃ સ્વસુખાર્થમુદ્યતઃ સદા તદપ્રાપ્ય પરૈતિ દુઃખતામ્ ।
સદા તુ ધીરો હિ પરાર્થમુદ્યતો દ્વયાર્થમાધાય પરૈતિ નિર્વૃતિમ્

યથા યથા હ્યક્ષવિચિત્રગોચરે પ્રવર્તતે ચારગતો જિનાત્મજઃ ।
તથા તથા યુક્તસમાનતાપદૈર્હિતાય સત્ત્વેષ્વભિસંસ્કરોતિ તત્

સદા ઽસ્વતન્ત્રીકૃતદોષચેતને જને ન સંદોષમુપૈતિ બુદ્ધિમાન્ ।
અકામકારેણ હિ વિપ્રપત્તયો જને ભવન્તીતિ કૃપાવિવૃદ્ધિતઃ

ભવગતિસકલાભિભૂયગન્ત્રી પરમશમાનુગતા પ્રપત્તિરેવ ।
વિવિધગુણગણૈર્વિવર્ધમાના જગદુપગુ[ગૃ?]હ્ય સદા કૃપાશયેન