મહાસુભાષિતસંગ્રહ · શ્લોક 9035-9054

કલુષં મધુરં ચામ્ભઃ સર્વં સર્વત્ર સાંપ્રતમ્ ।
અનાર્જવજનસ્યેવ કૃતકવ્યાહૃતં વચઃ ॥

કલેરન્તે ભવિષ્યન્તિ નરરૂપેણ રાક્ષસાઃ ।
મનુષ્યાન્ ભક્ષયિષ્યન્તિ વિત્તતો ન શરીરતઃ ॥

કલેર્દોષનિધે રાજન્ન્ અસ્તિ હ્યેકો મહાન્ ગુણઃ ।
કીર્તિનાદેવ કૃષ્ણસ્ય મુક્તબન્ધઃ પરં વ્રજેત્ ॥
કલૌ કરાલે ન સુખં લભેત પક્ષદ્વયાદેવ વિરોધકાલે ।
મધ્યસ્થતા પ્રત્યુત નિન્દ્યતેઽપિ સમન્તતો હા સ કલે પ્રભાવઃ ॥

કલૌ કલે ખલે મિત્રે પુત્રે દુર્વ્યસનાન્વિતે ।
તસ્કરેષુ પ્રવૃદ્ધેષુ લુબ્ધે રાજ્ઞિ ધનેન કિમ્ ॥

કલૌ ગઙ્ગા કાશ્યાં ત્રિપુરહરપુર્યાં ભગવતી પ્રશસ્તા દેવાનામપિ ભવતિ સેવ્યાનુદિવસમ્ ।
ઇતિ વ્યાસો બ્રૂતે મુનિજનધુરીણો હરિકથા- સુધાપાનસ્વસ્થો ગલિતભવબન્ધોઽતુલમતિઃ ॥

કલૌ જગપત્પતિં વિષ્ણું સર્વસ્રષ્ટારમીશ્વરમ્ ।
નાર્ચયિષ્યન્તિ મૈત્રેય પાખણ્ડોપહતા જનાઃ ॥

કલૌ દશસહસ્રેષુ હરિસ્ત્યજતિ મેદિનીમ્ ।
તદર્ધં જાહ્લવીતોયં તદર્ધં ગ્રામદેવતાઃ ॥
કલૌ યુગે કલ્મષમાનસાનામ્ અન્યત્ર ધર્મે ખલુ નાધિકારઃ ।
રામેતિ વર્ણદ્વયમાદરેણ સદા જપન્મુક્તિમુપેતિ જન્તુઃ ॥

કલ્કી કલ્કં હરતુ જગતઃ સ્ફૂર્જદૂજૈસ્વિતેજા વેદોચ્છેદસ્ફુરિતદુરિતધ્વંસને ધૂમકેતુઃ ।
યેનોત્ક્ષિપ્ય ક્ષણમસિલતાં ધૂમવત્ કલ્મષેચ્છાન્ મ્લેચ્છાન્ હત્વા દલિતકલિનાકારિ સત્યાવતારઃ ॥

કલ્પક્ષોણિરુહોઽયમિત્યનુદિનં ભૂમીસુરૈર્ભાવ્યસે કામોઽસાવિતિ કામિનીભિરભિતશ્ચિત્તે ચિરં ચિન્ત્યસે ।
શ્રીનારાયણ એવ કેવલમિતિ પ્રેમ્ણા શ્રિયા ધ્યાયસે ત્વં કાલોઽયમિતિ પ્રતિક્ષિતિધરૈરેકોઽપ્યનેકાત્મભૃત્ ॥

કલ્પતરુકામદોગ્ધ્રી- ચિન્તામણિધનદશઙ્ખાનામ્ ।
રચિતો રજોભરપયસ્ તેજઃશ્ચાસાન્તરામ્બરૈરેષઃ ॥

કલ્પદ્રુમઃ કલ્પિતમેવ સૂતે સા કામધુક્ કામિતમેવ દોગ્ધિ ।
ચિન્તામણિશ્ચિન્તિતમેવ દત્તે સતાં હિ સઙ્ગઃ સકલં પ્રસૂતે ॥

કલ્પદ્રુમાન્ વિગતવાઞ્છજને સુમેરૌ રત્નાન્યગાધસલિલે સરિતામધીશે ।
ધાત્રા શ્રિયં નિદધતા પ્રખલેષુ નિત્યમ્ અત્યુજ્જ્વલઃ ખલુ ઘટે નિહિતઃ પ્રદીપઃ ॥

કલ્પદ્રુમાશ્ચ સન્તશ્ચ નાર્હન્તિ સમશીર્ષિકામ્ ।
અર્થિનાં પ્રાર્થિતાઃ પૂર્વે ફલન્ત્યન્યે સ્વયં યતઃ ॥

કલ્પદ્રુમૈઃ કિં કનકાચલસ્થૈઃ પરોપકારપ્રતિલમ્ભદુઃસ્થૈઃ ।
વરં કરીરો મરુમાર્ગવર્તી યઃ પાન્થસાર્થં કુરુતે કૃતાર્થમ્ ॥

કલ્પદ્રુમો ન જાનાતિ ન દદાતિ બૃહસ્પતિઃ ।
અયં તુ જગતીજાનિર્ જાનાતિ ચ દદાતિ ચ ॥

કલ્પદ્રુમોઽપિ કાલે ન ભવેદ્ યદિ ફલપ્રદઃ ।
કો વિશેષસ્ તદા તસ્ય વન્યૈરન્યમહીરુહૈઃ ॥
કલ્પદ્રોરપિ કલ્પદ્રુર્ મહતોઽપિ મણેર્મણિઃ ।
દેવાનામપિ પૂજ્યોઽસિ કિયત્ તે મમ પૂરણમ્ ॥

કલ્પયતિ યેન વૃત્તિં સદસિ ચ સદ્ભિઃ પ્રશસ્યતે યેન ।
સ ગુણસ્ તેન ગુણવતા વિવર્ધનીયશ્ચ રક્ષ્યશ્ચ ॥
કલ્પયેદેકશઃ પક્ષ રોમશ્મશ્રુકચાન્નખાન્ ।
ન ચાત્મદશનાગ્રેણ સ્વપાણિભ્યાં ચ નોત્તમઃ ॥

કલ્પવૃક્ષશિખરેષુ સંપ્રતિ પ્રસ્ફુરદ્ભિરવિકલ્પસુન્દરિ ।
હારયષ્ટિગણનામિવાંશુભિઃ કર્તુમુદ્યતકુતૂહલઃ શશી ॥

કલ્પસ્થાયિ ન જીવિતમ્ ઐશ્વર્યં નાપ્યતે ચ યદભિમતમ્ ।
લોકસ્ તથાપ્યકાર્યં કુરુતે કાર્યં કિમુદ્દિશ્ય ॥

કલ્પાન્તક્રૂરકેલિઃ ક્રતુકદનકરઃ કુન્દકર્પૂરકાન્તિઃ ક્રીડન્ કૈલાસકૂટે કલિતકુમુદિનીકામુકઃ કાન્તકાયઃ ।
કઙ્કાલક્રીડનોત્કઃ કલિતકલકલઃ કાલકાલીકલત્રઃ કાલિન્દીકાલકણ્ઠઃ કલયતુ કુશલં કોઽપિ કાપાલિકો નઃ ॥